五道手抓餅專門店 (已結業)

首先，呢個位置成條街都佈滿小食店，俾我發現以前瘋薯既位置，轉左一間手抓餅店。衝動一試之後，非常後悔！環境衛生都欠佳，轉角連住後巷，店內設備簡漏又欠整潔。叫左個芝士免治牛手抓餅，個餅非常細，薄得泥，個面係脆，但壓到好扁冇咬口。芝士免治牛好少，薄薄一層，味道遍咸。而佢收緊30幾蚊，性價比低之餘，進食體驗亦都不太理想。😔想講有一間葵廣既手抓餅開左去旺角，可以睇下我既食評，去搵我講既呢間店試試，唔會令你失望！🤪

呢啲垃圾鋪頭簡直係浪費緊珍貴嘅糧食同社會資源。係熊貓叫外賣，得兩杯飲品都可以送漏一杯，另一杯所謂嘅黑糖珍珠鮮奶就係一杯奶水加幾粒唔知放左幾耐，硬過石春嘅珍珠。揀左個自選手抓餅，求其放塊隔夜漢堡，丟幾塊蘑菇落去，揀左芝士醬但送到嚟汁都無滴，話呢啲叫垃圾食物都侮辱左垃圾。仲有，最令人O咀嘅係送賣員送嚟嗰陣時係就咁徒手揸住杯嘢飲，一手拎住個餅，我打開門嗰下以為個外賣係外賣員自己買嘢返屋企食，換言之係零包裝，個外賣員仲同我講唔小心打瀉咗啲，主要原因係因為呢間垃圾站連比個袋去袋住啲嘢都無。幾十歲人都未試過d咁差嘅鋪頭，洗左成舊水就係買左一杯奶水同一舊乾爭爭嘅餅。你執咗佢咪阻住地球轉，返鄉下耕田咪出嚟呃飲呃食啦！

買左一個鹽酥雞滷肉飯加一杯黑糖珍珠撞奶先講個飯，啲飯係好似bb仔食*杰撻撻*嘅飯，仲要係變壞左酸酸地咁，入面嘅滷肉得個幾粒，仲要賣$56而杯黑糖珍珠撞奶就好似買咗一杯齋鮮奶咁，價錢$32，啲珍珠仲矜貴過乜咁，小到撈勻左杯嘢都係得啲鮮奶味真係難食到嘔

-炸雞炸到成舊黑曬唔講以為係炸烏雞-盒飯夠膽死幾十蚊淨係俾一著肉鬆，一隻蛋再加幾粒尾指指甲既肥滷肉-滷肉無味得黎有陣臭味平時都懶得寫食評但係咁Q難食真係忍L唔住

味道:手抓餅勁乾、難食、料又少、胡椒粉同醬汁唔均勻，唔值40幾蚊。環境:污糟！另外，疫情底下，煮野食果個唔戴口罩，又唔帶手套！有個員工食野係冇問題。但煮野食果個一路食野，一路煮野食。仲要同其他人吹水！而且向住煮野食方向講野。服務:3個後生仔係店入面，就算有人排隊都冇人理。真係！無言以對，都唔知點請人同做生意！明明有咁多爐，都唔用。等左差不多20分鐘先有份手抓餅。總結而言，浪費金錢同時間，唔會再有下次！

坦白講，好食係好食，但管理得唔好。去了買幾次，時間唔係晏，但每次想叫的食材都話冇哂，仲要唔係咩特別的食材，試過蛋同粟米都冇，企我後面的顧客又係要嗰樣冇嗰樣。其實唔係每日都會點算有咩食材用完然後補貨嘅咩？我仲要係叫你啲set喎，你出得menu，但咩都冇？仲試過有一次傍晚時份，去到話cut單，因為店員要食飯。你間店3,4個人同一時間食飯？唔係應該輪流放飯？我真係未見過旺角小食店因為食飯而停做生意，仲要係人流最多的時段？我好鍾意食手抓餅，講真四五十蚊一個真係好貴，我都唔理了，但個management真係好差，嘥左間店。

食物完全不乎圖文😪😪😪一打開飯盒有酸有怪味,一食滷肉係如酸左變左味,完全不能食,直接即時扔進垃圾桶,再叫其他外賣,很可怕,不好吃而且食物質素同衛生也很有問題！

買了一份邪惡風味 ($42) + 一份自選口味 ($42), 合共八十幾蚊, 其實呢個價格已經可以食兩個lunch, 而呢兩份嘅材料唔豐富、味道亦普通, 實在唔值呢個價錢~員工態度亦都麻麻, 當時無其他客人等緊, 凈係整我兩份都可以整錯... 而最大問題係, 兩位員工都唔戴口罩同手套去處理食物, 整整吓仲要走去撳電話, 呢個時勢唔戴口罩始終會有啲唔安心, 希望佢哋會正視衛生問題~比較過同類型嘅手抓餅小店, 呢間實在係性價比低, 應該唔會再幫襯了。

唔錯幾好食啲嘢飲都幾好飲就係有啲單調手肘餅我都買過五六次正常情況下都好快不過有時見佢哋幾忙可能等得比較耐我幾推薦佢哋個流心雞扒不過當然佢哋都係手肘餅最好食都算唔錯

垃圾餐廳買左兩個手抓餅，就係印度薄餅加d料，普通，但係價錢唔普通，四十幾一個，不過都唔緊要啦，咪當係有人幫我煎個餅最令我失望嘅係佢個鹽酥雞同埋小丸子，黑到炭咁，又硬又黑，本身諗住落去換個份就算，可惜嘅係再整嘅食品，都係一樣，唔知以為整嘅係炭。真心建議大家冇咩事就唔好吃呢間嘢