丼道 (上水廣場) (已結業)

過來上水換身份證，第一次行上水廣場！睇咗一圈發現都幾多野食，但係最想食深川丼🥹所以就來丼道試下。✨17:35入座，掃碼點餐，已經提示深川丼售罄💔店員姐姐話仲有一客，佢跑去幫我落單先。不過等佐5分鐘，廚房都係話賣曬，所以今次就試唔到深川丼😭✨點咗「咖喱吉列豬扒飯」，店內主打蘋果咖喱，食起身真係幾好！真係同在日本🇯🇵本地吃的咖喱一樣👍而且豬扒炸的岩岩好，唔會韌！每個定食都會送一杯凍茶🍵+一份椰菜沙律🥗唯一覺得不足就係，咖喱汁太少💔整個飯吃到一半就已經冇咖喱，希望之後可以改進多d咖喱汁。✨加點佐兩份小食「蟹肉可樂餅」，「串燒小紅薯」。 可樂餅裡面夠濕潤，唔會一口都係薯泥dry到爆，小紅薯夠香甜，兩款小食都好滿意👍總體服務好好，餐品質素又好，下次會再去幫襯！

喺附近返工，見到有新店開，我呢個專試新野，緊係會試下先。啱啱開左幾日去食，可能係試業中，上菜速度有啲耐，但都勉強可以接受，埋單時問下點解，原來食物係即叫即整，唔怪得之，個侍應都不停話唔好意思唔好意思。我係太陽蛋守衛者，緊係點月見牛肉丼，嗰粒係日本蛋，蛋味濃，加埋個丼飯汁，唔錯，份量都足夠，仲有個沙律同杯茶。隔左兩個禮拜，今日同同事又再去食過，都係同之前一樣要攞飛等位，我地坐左個望街景嘅高枱，係公司成日望住部電腦，望到條街隻眼仔都開心啲。同事叫左個豬扒丼，我緊係偷食一塊，脆度適中，加埋啲蛋汁一齊食，唔會乾憎憎。我係守衛者，今次點左個漢堡煎蛋咖哩意粉，個咖哩汁份量啱啱好，味道適中，又唔辣，啱哂我。兩次食品都滿意，唯一不同，今次上食物比之前快左，可能佢地已經整頓好，仲有印花儲，我咁近一定換到😎

中午來到上水廣場，看到新開的店，門外看看menu, 是丼飯和咖喱，丼飯有些在日本當地見過的款式，裝修亦頗為舒適，就進去試試。點了帶廣豚丼，豚肉烤得香口，油香滲入飯內，配上帶甜味的醬汁，當年在北海道帶廣吃豚丼的回憶就湧現了。丼飯附有椰菜絲沙律和蜂蜜烏龍茶，減少了吃烤豚的油膩感。值得一提近門口位置有一些關於日本飲食的書藉，可供客人自由取閱，一個人吃飯看看書就似在日本旅行的感覺。下次再來試吓萍果咖喱，旁邊的人點了好像很好吃。

上水新開左間餐廳，聽佢個名都知係食日本野🤣，經過見佢裝修幾靚，燈光光猛，於是就入左去試吓☺️～和風蘋果咖哩吉列豬扒飯賣相好靚，好有日本風❤️呢個吉列豬扒飯特別係在於佢 d咖哩係加左蘋果煮製😉，所以食落比較清甜，隻味唔似印度咖哩咁好辣，幾啱小朋友食😚，同埋佢 d咖哩比一般咖哩仲多左 d香料味，幾特別🤩！細心 d睇，會見到咖哩汁入面有 d蘿蔔碎同酸黃瓜粒😋，感覺健康d，食落會冇咁膩👍～吉列豬扒炸到好金黃，d炸粉厚度適中🙂，超級香脆鬆化，而豬扒肉質柔嫩😋，又 keep到肉汁，好食🤗！除左紅蘿蔔粒，佢仲有一大片蘋果做配菜😍，食落有驚喜！好清甜多汁😍！唔知係咪日本蘋果黎嘅呢？一個set仲有個沙津同杯凍有機烏龍茶😚～沙津係椰菜絲沙津，加左柚子汁之後，食落酸酸甜甜，可以解膩❤️！而杯烏龍茶一定唔可以唔讚吓，茶味超香淳🥰，入口仲好回甘！非常高質😋！

假期過咗午市時間2點幾入去食，叫咗一個刺身set同一個燉豚肉set。刺身飯不過不失，啲飯熱到好似啱啱喺電飯煲度不上嚟咁，唔似平時啲刺身飯。個豚肉set就勁啦，等咗半個鐘都未上，個刺身飯都已經食完，追咗兩次啲staff，有個女侍應行過嚟同我講等3至5分鐘就有，俾多5分鐘機會佢都係冇，最後成個set取消咗。所以見到張單點解明明兩個人食但埋單得1個餐。諗唔明間餐廳已經唔多客，但成半個鐘都冇嘢食。總結啲staff好似全部暑期工咁，一個正常啲可以幫到你嘅staff係0，絕對不會再幫襯👎👎

今日一家五口去試下，結果係我地吃過有史以來最難食丼飯1.滑蛋吉列豬扒丼(朱扒又硬又油)2.滑蛋鷄肉丼(D鷄係白烚雪鷄胸完全無味)3.鰻魚飯丼(食底我估一個成年人要叫三個先會飽，饅魚只用一個字去形容字無也特別)4.滑蛋和豚丼5帶廣豚肉丼(呢兩個D豬肉硬加無味)問侍應有無水，佢答我水要自己落單，按入去原來水係要6元，估計佢地新開無錢交水費😂買單走時送5個印花，即下次可以換小食一客，我只有同收銀講多謝晒唔使啦我唔會有下次，連一個平時唔咀刁嘅4歲幾小朋友吃左小小後都話唔食，間佢點解佢答好難食😂😂

同老婆返大陸 打算食個high tea再開始旅程 老婆就話想食日本菜 ….. 懶得自己搵 直接問商場客服後 直接上一層就搵到 ….餐廳裝修日本風格 感覺光猛舒服 服務員安排我地入座 有餐牌或者用QrCode落單… 我自己點左吉列魚柳配沙律凍茶 其他由皇太后發板 ….上菜速度算快… 10分鐘左右就有開始有野食 總結呢餐最食得好滿意 最開心既係皇太后 .. 未埋單就講定返香港要再黎食多餐 試埋其他刺身同埋小食。除咗食物質素有驚喜之外 原來佢唔收加一 如果係九龍區 呢餐一定冇咁抵食

因為買一送一吸入我入去幫襯，點知原來有配額，我當然無份啦 一場去到都入去試吓，環境好日系，味道都ok，鰻魚丼份量好細碗成$90，男士一定吾夠食，仲有鰻魚炭燒吾夠火候，比較冧身，反而甜品有驚喜此店無供應冷水，大熱天時，只供應熱水，迫你叫飲品，這點要扣分，好在午餐就免加一

1900入到餐廳，1905分叫左個餐，1945都仲未到齊，上餐速度差，叫員工跟左好多次都係咁。坐左咁耐一杯水都冇，等左40幾分鐘，遲過我地嘅隔離枱都食完，仲叫我地等5分鐘先上。精彩。聽講已經冇做外賣，剩係做堂食已經係咁，趕時間嘅小心啲，冇一個鐘走唔甩

上水廣場新開日本餐廳，新張優惠，指定時間主菜買一送一，名額有限，先到先得，食物新鮮，鰻魚都算肥美，芝士年糕點埋砂糖，正👍🏻，食物即叫即整，雖然小食果D製作可能需要多啲啲時間，但食住等ok嘅，味道賣相也不錯，最驚喜係唔使加一，唔知係新張優惠定點，服務也不錯，裝修也有心思，環境也舒服，會再幫襯.#日式#新店#上水#鰻魚#うなぎ#芝士#年糕#雪糕#icecream#意粉#🍝#さしみ#sashimi