初春微风，好啱坐室外食嘢Chill吓。呢间中环手工Pizza店 “Abbraccio”有个大户外用餐区，坐籘椅梳化眺望大馆几好Feel。
好天气坐户外真系特别正。
开扬露天座位可眺望大馆，有种异国气氛。
行入“Abbraccio”先见到酒吧位，然后系一整排室内梳化卡位，有时仲会望到厨师手搓面团整Pizza㗎。想边食边影吓靓相，好推荐坐室外有中环夜景。
室内软皮卡位，系另一种浪漫情调。
晚餐可拣3 Courses $398/人(前菜/沙律 + 薄饼/意粉 + 甜品)、4 Courses $498/人(前菜/沙律 + 薄饼/意粉 + 肉扒 + 甜品)；或者直接单点都得。每日4:00pm-6:00pm都有Happiest Hour，拣啱时间嚟仲有Live Music表演㖭，即睇详情～
Happiest Hour优惠详情
每日4:00pm-6:00pm，惠顾红/白酒、啤酒、鸡尾酒、无酒精鸡尾酒均享买一送一。 |
Live Music表演！
逢星期四、五、六(9:00pm-11:00pm)特设Live Music表演，现场听歌饮酒更好Feel。 |
“Abbraccio”唔只得Pizza食，呢度嘅前菜、意粉同肉扒都几高质，睇吓有咩选择啦～
【前菜】
Polpetoni
好多熟客都会拣嘅Polpetoni，系义大利番茄汁肉丸洒满帕马森乾酪。肉丸自家手打Dry Aged牛肉，肉味特浓，口感几紮实。
Piovra
Piovra主角系弹牙八爪鱼，配埋24个月帕马森乾酪、柠檬汁、柑橘沙律酱。酸酸地几开胃，好啱食主菜前饮酒倾偈。
【沙律】
Insalata di Pollo
呢个沙律嘅鸡胸肉超多!! 做Gym操肌人士必食呀。加埋24个月巴马臣乾酪、微辣香料洋葱、香醋调味好有层次。
Frisella
望落好似迷你Pizza嘅前菜，其实下层系脆面包(Dough Crust)，比Pizza批底更烟韧。食之前，戳开圆碌碌嘅流心水牛乾酪(Burrata)好有仪式感。
【白酱薄饼】
Cacio e Pepe
呢度全部Pizza都系手工制，搓面团、新鲜出炉都可以透过玻璃见到。特制石窑炉高达450°C，高温环境将Pizza焗到外脆内轻韧㗎。乾酪控必食Cacio e Pepe～唔使多馀配料，成个Pizza都铺满马苏里拉乾酪、车打乾酪，一拎起即刻极量拉丝!! 铺满爆多乾酪嘅批底软绵绵啲，每啖都系乾酪味劲满足。
【创作薄饼】
Nduja di Manzo
如果你为Pizza而嚟，呢款Nduja di Manzo(晚市套餐+$48)好值得试，因为好难喺其他地方食到。主角系自家制牛肉Nduja肠，比一般香肠软绵有肉感，一入口就好香辣，同时又有多种乾酪、奶酪平衡吓。
【意粉】
Alla Bolognese
“Abbraccio”由外籍大厨主理，意粉、肉扒都做得高质。呢道Alla Bolognese望落系普通肉酱意粉，实际上系用慢煮牛肉做，完全无混入猪肉，所以牛味特浓㗎。
Salmone e Panna
想食啲海鲜解吓腻，Salmone e Panna有满满烟燻三文鱼，用白酒、白兰地煮制，富酒香又轻盈。
【肉扒】
Filetto牛柳
呢度有自己嘅熟成牛扒柜，其实净系嚟锯扒都好吸引。Filetto牛柳有220g，轻松一刀切到底好软嫩，入面仲系好粉红。大厨用咗鼠尾草、迷迭香突出肉味，一上枱就闻到好香啦。
【甜品】
Tiramisu Classico
点估到手工薄饼店，招牌之一系甜品—Tiramisu Classico。自家用意式软乾酪(Mascarpone)、可可粉、手指饼同Espresso制成，食落软绵绵几湿润，仲好重咖啡香，女生必食呀!!
Abbraccio
地址: 中环云咸街75-77号嘉兆商业大厦5楼
电话: 26333878