想像喺泰国街头，畀香料香气、炭火烤肉嘅嘶嘶声包围，斋谂已经好想食泰国嘢喇!! 最近中环新开“BKK”主打曼谷、泰国东北部料理，集合两大地区美食精髓，以丰富香料完美结合甜、酸、辣、咸。
泰国风味 | 唯美木系环境
“BKK”以木元素贯彻全店，华美拱形天花俨如皇宫，仲有半露天位挂满弔灯好有情调，真系有种离开香港嘅放松感。呢度大部分食材都系泰国进口，好似青木瓜沙律(Som Tum)；抑或富风味嘅粉丝沙律(Yum Woon Sen)都好品嚐到酸辣、香草微妙平衡。
而呢度最最最吸引系炭烧烤肉！泰国沙嗲串烧用咗独特香料+浓郁花生酱调制，好有泰国街头风味。串烧烤肉则用炭火烧制，未食已经闻到炭火同烟燻香味啦。
【炭火烤肉】
沙嗲炭烧鸡肉
最地道嘅沙嗲串烧，浓郁沙嗲酱好重花生酱味。鸡肉外层烧到微焦，咬开又好juicy。
炭烧和牛配Nam Jim Jaew酱
炭烧和牛好有油香肉味，跟配嘅Nam Jim Jaew酱系泰国人常配烧肉、炸肉嘅酱汁嚟。以青柠汁、鱼露、辣椒粉等调制，酸辣带微甜，入口会有多种味道变化几惊喜。
【Soup & Salads】
如果你都好挂住泰国菜酸酸辣辣嘅爽快感，“BKK”就用泰国食材做出地道沙律风味。
依善青木瓜沙律(Isaan Som Tum)
泰国依善地区嘅着名料理—依善青木瓜沙律，用酸子酱汁、青木瓜、辣椒撞出酸辣。差唔多成个沙律都铺满青木瓜，真系可以大大啖爽食青木瓜呀!! 有时又会食到虾米、花生，咸甜交替有记忆点。
泰式辣味海鲜沙律(Phla Thale)
Phla、Thale泰文分别意指沙律、海鲜。恰如其名，沙律铺满多款辣味海鲜，全部都好轻韧爽弹，越咬越辣真系会上瘾呀。同时大厨巧妙加咗薄荷、香茅酱汁平衡辣度，辣得更有层次。
【Mains and Wok】
泰式咖喱虾(Choo Chee Kung)
Choo Chee Kung系泰国传统咖喱料理，大虾(Kung)作为主角真系超大只厚肉!! 特别选用新鲜虾，就算咖喱浓味都无遮盖鲜甜味。
当地Choo Chee Kung咖喱好浓郁，主要用红咖喱酱、椰奶、香料、柚子叶煮制，微辣富奶香，就算唔嗜辣都可以一试，捞饭一流呀。
和牛肋肉配马斯曼咖喱(Massaman Beef Short Rib Curry)
泰国地道马斯曼咖喱，以肉桂、丁香、豆蔻等煮制，风味浓郁，浓味控必食呀!! 和牛肋肉仲煮到好软腍，系一咬会慢慢化开嘅程度。
【泰式汤面】
椰汁牛肉咖喱汤面(Khao Soi)
泰国北部咖喱汤面以咖喱、椰汁煮制，可以想像到汤底比较浓郁。所以面条做到特别饱满弹牙，好挂到汤汁劲惹味。
泰式虾炒金边粉(Pad Thai with Prawns)
食泰国嘢点少得炒金边粉，呢度系用酸子酱、虾、花生等炒制，加埋鱼露、柠檬汁、辣椒等爆炒，虾肉同香料鲜味渗晒入金边粉，集合咗咸、甜、酸、辣多重味道。
【甜品】
“BKK”有多款色彩缤纷嘅泰国甜品，一定要食嘅当然系芒果糯米饭，熟透香甜芒果+软Q椰子饭，有时谂起都好想再食呀!! 同场仲有泰国Coconut Dumplings、Sago Namkarati等，好值得留肚食㗎。
凡惠顾任何食品，可获赠Welcome Drink 一杯
“BKK”由经验丰富泰国大厨主理，抱持对泰国料理熟悉及热爱，为你带嚟最地道泰国美食。
BKK
地址: 中环鸭巴甸街35号PMQ元创方A座Staunton地下SG09-SG14号舖
电话: 23300306