有时想食正宗咖喱真系唔知点揾。由外籍大厨主理嘅 “CHUTNEY”由外籍大厨煮理，唔只完美还原传统印度料理，印度宫廷风环境仲好靓𠻹。一入门口嘅悬垂金色绸绢已经好唯美，店内金色拱形天花用餐区，真系有种身处印度皇宫错觉。如果拍拖食饭嚟嚟去去都系食西餐，绝对可以嚟试吓精致印度菜。
印度香饭(Hyderabadi Dum Biryani)
鸡肉/羊肉/蔬菜选择
平时常见嘅印度料理都系咖喱为主，其实印度料理仲有好多学问。好似呢道印度香饭(Hyderabadi Dum Biryani)，就用咗“Dum”煮法，将印度长米、鸡肉、香料放入锅中，再用面团密封锅口，食材、香料精华会于锅中完美融合入晒味。
Hyderabadi Dum Biryani会原个上枱，再喺你面前切开焗到金黄色嘅面皮，蒸气喷出嗰吓劲香，用餐体验好圆满。食之前记住将甜甜哋嘅炒洋葱捞匀，每啖饭都有淡淡香料味之馀，鸡肉都好嫩又弹牙。
印度香辣鸡(Chicken Tikka)
相信大家对印度香辣鸡唔陌生，而“Chutney”吸引之处系有Tandoori大窑炉炭烤，瞬间高温可以锁住鸡肉肉汁。所以香辣鸡外层有阵炭香，但咬开一啲都唔干。
大厨特别为香港人减低辣味，如果自问好食得辣嘅大家，绝对可以叫佢哋加辣㗎。呢款传统料理会跟配辣辣地嘅青酱，想滑啲又无咁腻可以蘸奶酪酱。
烧盲鰽咖喱(Malabar Fish Curry)
平时多数食咖喱鸡、咖喱牛，呢道烧盲鰽咖喱嘅鱼味无肉类咁浓，反而更突出咖喱味。呢款咖喱唔系好辣，第一啖仲会觉得几甜，再慢慢渗出椰奶味，女生应该几钟意。
牛肉马萨拉(Beef Rara Masala)
其实Rara Masala系印度一种浓郁酱汁，浓中带辣。牛肉仲焖到入晒味，肉质腍到细细力咬落去已经化开。而且牛肉份量劲多，完全系肉控福音。叫多份印度烤饼包住牛肉食，一咬爆汁好正。
CHUTNEY
地址: 中环云咸街75-77号嘉兆商业大厦4楼
电话: 23300027