蓝天白云嘅屯门黄金海岸，有一望无际大海景真系好靓。想坐低慢慢影相chill吓，可以去新开嘅法日fusion餐厅酒吧“Hakata Concepts”。
餐厅佔地接近5000呎，钟意食好嘢可以坐室内一嚐高级铁板烧、手握寿司席前料理；想睇靓景就拣户外大平台，坐喺藤波波入面饮cocktail食嘢好IGable，嚟啱时间仲可以睇埋日落𠻹。
“Hakata Concepts”唔只得靓景，更请嚟15年经验Louis师傅主理精致创作料理。师傅一直以传统日本方式学师，深入钻研寿司、刺身同铁板烧。加上本身热衷追求美学，所以每道料理都好唯美㗎。
【户外单点Menu+Cocktail】坐藤波波睇海景
户外平台可以拣单点menu同cocktail，全日任何时间嚟都得。单点menu同样由师傅匠心制作，大玩创意将法日料理完美融合。
钟意肉味十足嘅可拣流心乾酪安格斯。外型好似寿司咁，原来系煎到焦脆嘅手打安格斯汉堡，咬开入面仲会爆出乾酪㗎，再用芥末子酱代替日式酱汁，原来寿司同安格斯汉堡可以咁样玩。
同场仲有海胆拖罗三文鱼子军舰，用紫菜包住寿司饭、海胆、拖罗等等，有啲似墨西哥taco风味。
【室内席前料理】午市·晚市CP值高
呢度午市同晚市都有套餐拣，$498起CP值好高！午市(11:30am-3:00pm)可拣刺身寿司套餐，丰富啲嘅就有寿司刺身+铁板烧套餐，全部套餐均附热汤、甜品。不得不提日本文化中，一间店嘅热汤代表住师傅手艺，所以呢度既汤都落足心机自家熬制，有时会系鲷鱼汤、虾清汤等。
晚市套餐(6:00pm后)同样有刺身寿司套餐；又或铁板烧套餐一嚐空运海鲜铁板烧、日本空运A5和牛等。
放心讲出口味喜好 Louis师傅即席创作料理
席前料理最特别系可以同师傅交流，好似我哋食和牛时，师傅会提议拣3至4成熟最有油香。而我哋都有问返师傅，如果有人想食全熟呢？师傅就话都有方法煮到好好食，就系高温煎两边迅速锁住肉汁之馀，外层仲有种焦脆口感。如果你嚟食席前料理，不妨讲出你嘅口味／唔食嘅嘢，师傅会好有心机帮你设计料理㗎。
【度身订造Menu】真·Omakase
如果你想成个菜单都由师傅设计，可以提早致电订枱并讲低你嘅budget、口味喜好、任何食物敏感等，师傅设计好菜单后会同你确认一次，再由日本订购新鲜食材，到时嚟到坐低等食就得喇。2至3人度身订造餐牌大约提早3日；4人或以上想包场则建议提早一星期。
创意料理永远都有惊喜，好似法国料理常见嘅香橙汁，师傅就再进一步用上新鲜橙汁，即场喺你面前用鲜橙榨汁，食嘅时候仲好清新香甜，唔会因为煮耐咗而涩口。有时又会加入分子料理，好似之前餐牌有嘅法国鹅肝伴苹果泡沫酱，就将苹果酱变成泡泡，食落好有空气感再慢慢渗出苹果味。
【高级料理品牌】
唔知你有无食度身订造menu嘅经验，但“Hakata Concepts”喺呢方面就经验十足喇。因为“Hakata Concepts”隶属嘅Bar With Us Group Ltd.，旗下已有9间餐厅酒吧，涵盖日本料理、西班牙菜、西餐等，部分料理店更由日本师傅主理。
而呢间最新开业嘅“Hakata Concepts”就系品牌最fine dining嘅创意法日料理，无论品牌定师傅都极具经验，就算素食朋友都会帮你订购日本野菜设计料理。放心将你嘅谂法讲畀佢哋听，享受你嘅专属晚餐啦。
Hakata Concepts
地址: 屯门青山公路1号黄金海岸商场1楼25A-C号舖
电话: 59401632
Facebook: https://shorturl.at/HQW16