以前趁韩国旅行都会去澡堂爆汗，原来疫情下韩国好多澡堂都营业困难，估唔到转型餐厅后引爆人气。
曾韩国留学嘅店主就将澡堂餐厅概念引入香港，喺长沙湾开咗呢间「新沙洞澡堂」。唔只个名似足澡堂，估佢唔到入面真系有花洒、毛巾，相信香港都无咩餐厅去到咁尽(笑)。
澡堂主题餐厅，劲多打卡靓位。
烧酒墙参考梨泰院、弘大流行酒场，劲有气氛。
呢度好啱三五知己一齐share嘢食、饮烧酒。
店主留韩期间已经钟意周围食嘢，所以香港开店都想还原正宗韩国做法，请嚟曾任米芝莲餐厅大厨一同研制，特别系辣炒年糕、部队锅、韩式拌饭都系地道口味！招牌韩式炸鸡就有6款口味咁多，依韩国做法利用水果天然酵素醃制，特别松软juicy。
韩式炸鸡有6款口味—新沙洞特制原味炸鸡、韩式甜辣炸鸡、蒜蓉酱油炸鸡、麻辣劲爆芫荽炸鸡、雪花乾酪炸鸡、韩式柚子炸鸡。
韩式甜辣炸鸡最高人气！
炸鸡依韩国做法，鸡皮劲香脆～蒜蓉酱油口味更以韩国秘方调配酱汁，食落有蒜香又渗出酱油鲜味，劲有层次唔会「死咸」。
炸鸡嘅醃萝卜都唔好放过，好少店家花时间自家特制柚子萝卜，轻甜酸味同炸鸡劲夹，仲有浓浓的柚子香味。
蒜蓉酱油炸鸡
钟意韩国扫街嘅话，一定好挂住辣炒年糕味道！呢度嘅辣汁系韩国人大厨亲调，正宗香辣味同韩国食到嘅味一模一样呀！有别坊间用现成酱汁做法，软糯年糕辣而香超正～
辣炒年糕酱汁由韩国人大厨亲调，大胜坊间现成酱汁。
辣炒年糕仲有个隐藏食法，好似韩国人咁嗌多碟炸物，用嚟蘸年糕辣汁劲香口，配烧酒一流。
新沙洞招牌炸物拼盘，大推蘸年糕辣汁再饮啖烧酒。
韩国好多打卡甜品，呢度嘅Croffle同嘢饮都好IGable。Croffle早前已喺韩国爆红～牛角酥用窝夫机压焗，即叫即整热辣辣，一咬落去系窝夫嘅香脆，内里又有牛角酥嘅千层酥香。
呢度有6款甜品口味—Tiramisu、法式焦糖炖蛋、宇治抹茶红豆、草莓牛乳奶油、奶酱多、榛子朱古力香蕉；咸点口味就有韩国酱牛肉、韩式甜辣猪肉。
(左)法式焦糖炖蛋、(右)Tiramisu
甜食系用自家制牛乳奶油，有乳香又健康。
法式焦糖炖蛋系用火枪烧至金黄色。
仲有多款梦幻饮品㗎。
最挂住嘅韩国味，一定要讲埋部队锅。好多人以为部队锅只系韩国拉面丰富版，nonono…正宗味道系有浓郁泡菜乾酪味，呢度就完美还原咗出嚟喇。每日自家熬泡菜汤底，上枱前再落足车打乾酪，真系好似去咗韩国咁呀。
完美还原韩国部队锅，极量乾酪满满幸福感。
韩国人钟意用生菜包住五花腩食，呢道韩式猪肉包菜先用黑啤浸五花肉去除羶味，再以炆煮方法逼出猪油，所以望落好似好厚肥膏，但其实完全唔油又keep到Q弹滑嘟嘟。酱汁系自家用蒜、葱、辣椒、韩式面豉酱调配，加咗酱更加开胃香口。
五花腩用炆煮方法逼出猪油，完全唔油又Q弹。
澡堂嘅小清新环境，都好啱食碗健康韩式拌饭。有牛肉/猪肉拣。芽菜、菠菜等配料每日自家醃，无添加防腐剂，富营养又饱肚。
韩式拌饭配料自家醃制，富营养又健康。
除咗澡堂有多个打卡位，估唔到连小食都IGable，有韩国当地好红嘅炸韩国午餐肉条。
超厚切餐肉炸到劲酥脆，一咬开好咸香、超邪恶，外脆内软真系会上瘾，配埋特调咖喱蜜糖酱更好食。
韩国爆红午餐肉条，炸到劲酥脆。
【韩式High Tea Set】咸甜点满足少女心
下午茶时段15:00-17:30都可以嚟澡堂打卡～「复古韩风Cafe 特色咸甜点套餐」有16款自家制咸甜点 连2款Croffle口味酱料，并可自选2款饮品(转无酒精鸡尾酒需另+$10/维也纳咖啡+$15)。
新沙洞澡堂
地址: 长沙湾福荣街506-510号荣发阁地下A1号舖
电话: 26666881
