爱辣同爱牛之人有口福啦！位于北角嘅「九龙坎麻辣火锅」最近推出「牛气冲天」拼盘，一次过可以试到唔同种类嘅牛肉。餐厅之前就以正宗成都麻辣火锅同多元化嘅配料选择而获得唔少好评，加上中式宫廷风装修，实力与颜值兼具！
华丽气派 古代宫廷风装修
餐厅佔地6,000平方呎，枱同枱之间都有足够空间，想私隐度再高啲更有多间VIP房，三五知己共聚更尽兴。装修摆设都走中式宫廷风，古色古香、气派十足，好似从现代都市穿越咗去古代咁！
餐厅以中式宫廷为装修主题，古色古香又有气派
正宗成都风味！手炒牛油红锅
火锅嘅灵魂绝对系汤底，餐厅主打嘅招牌牛油红锅顾名思义系用牛油起锅，加入人手炒香嘅自家麻辣胆而成。麻辣胆选用从大陆各地搜罗最靓嘅香料，例如古代皇帝御用嘅汉源贡椒，亦有辣椒、豆瓣、陈皮、桂皮、茴香等27款材料，其中5款更系「秘而不宣」嘅重要食材，正正就系呢5款材料先可以彰显正宗成都风味，令其麻、辣、香只此一家。食落香麻浓郁带后劲，辛香层次丰富，唔死辣唔呛喉。唔太食得辣嘅朋友都唔使担心，有四个阶段嘅辣度任拣。
经典鸳鸯锅（招牌牛油红锅+任选蕃茄/菌汤/高汤锅）
牛魔王必食 牛气冲天拼盘
对香港人嚟讲，打边炉点少得靓牛肉呢？餐厅推出嘅牛气冲天就最啱各位牛魔王，或者心大心细咩都想试嘅你。圆盘放满六款精选牛肉：日本A5、澳洲M9、美国牛颈脊、美国牛小排、美国雪花牛舌、美国和牛。当中以日本A5和牛嘅油花最多，脂香丰厚。澳洲M9和牛嘅特色系肉味同脂香平衡，而美国牛则胜在牛味丰富。
牛气冲天
超过80款火锅配料 精选肉类+海鲜推介
配料选择从牛、羊、海鲜，到四川常见嘅小郡肝、现炸酥肉等应有尽有。而且餐厅非常贴心，每款配料都写上建议涮烫时间。喜爱牛脂香气或者入口即溶口感嘅话大推A5和牛，A5系日本和牛当中最高嘅等级，油花分布细密均匀，口感软嫩柔滑、肉汁丰富！
A5和牛
羊肉亦系四川火锅常见配料，呢度嘅高钙羊肉红白相间、肥瘦适中。轻灼10秒熟度啱啱好，羊肉味香但羶味唔过重，建议配招牌牛油红锅，风味更正宗。
高钙羊肉
餐厅唔单止照顾牛魔王，亦有为爱海鲜嘅朋友推出海鲜3人餐。当中会有时令生猛海鲜，当日系鲜虾、珊瑚蚌、鲍鱼同日本广岛蠔。虾同鲍鱼都食得出非常新鲜，肉质扎实弹牙。日本广岛蠔亦有鲜甜蠔味。
海鲜3人餐
巴沙鱼已预先去骨，食落啖啖肉唔使惊有骨特别爽。因为切得比较厚，建议灼2分钟，更可以品尝到厚实鲜嫩嘅肉质。
湄公河巴沙鱼
成都特色火锅料 必食新鲜毛肚
毛肚即系牛柏叶，轻灼10秒就食得，稍微入味而且最大保留其爽脆有嚼劲嘅口感。而且完全无任何内脏异味，抵讃！
精品鲜毛肚
新鲜雪白嘅鹅肠用冰镇保留脆度，师傅亦已事先清除肠里面嘅多馀肥膏。记得同样轻灼10秒就食得，咁样入口最为鲜滑爽脆。
冰球鹅肠
小君肝则为鸡肾，用薑水、花椒粉、孜然、红油等先醃至入味，再串成一串串方便食。肉质爽脆、香辣带麻。
串串小君肝
蔬菜方面可以一试农家笋片王，竹笋切得厚薄适中，食落鲜嫩带脆。人数唔多就可以点蔬菜拼盘，分量适中又可以食到唔同蔬菜。
农家笋片王
蔬菜拼盘
可以到自助调料吧，配搭出适合自己口味嘅酱料
装修以大红加上金色为主色调，卡座空间感充足
九龙坎麻辣火锅
地址: 北角英皇道395号侨冠大厦地下28-31号舖
电话: 39564388