香港都食到地球另一端嘅味道，仲要系瑞士最南端嘅瑞士义大利语区提契诺(Ticino) 料理。当地靠近阿尔卑斯山，水质纯净又阳光充沛，造就一系列独特料理。主厨兼老板Matthew Ziemski 以简单初心开设「Nocino」，将自己家乡料理带畀香港人，好似小牛舌配意式吞拿鱼酱、红酒炖鹿肩荞麦玉米糊都系提契诺(Ticino) 特色料理，当然唔少得「Nocino」爆红手工意粉!! 而家陆续喺大坑、中环、观塘都有分店，可以随时嚟食啦。
踏入12月天气咁冻，瑞士人Matthew 都将佢由细食到大嘅经典暖笠笠瑞士火锅带嚟香港，限定推出「瑞士乾酪火锅体验」🫕！暂时预计去到2026年1月中，想试吓地道乾酪火锅就唔好错过喇。
🤩「Nocino」以每日新鲜自家手工意粉爆红，同场仲有多款瑞士Ticino 料理～
小牛腿醃核桃肉酱宽带面。手工意粉好有蛋香，宽带面更加令咬口Double！上面爆满嘅帕玛森乾酪泡沫好吸引。
红酒炖鹿肩荞麦玉米糊。欧洲常见嘅鹿肉料理，用红酒慢炖到好软嫩。
【冬日限定】真·瑞士人整嘅 瑞士乾酪火锅体验$168
香港都食到由真·瑞士人整嘅瑞士乾酪火锅!! 价钱只系$168，分别有6款乾酪火锅选择—经典格鲁耶尔乾酪‧艾门塔尔乾酪🧀、辣肉肠‧马斯卡彭乾酪🥩、醃墨西哥辣椒‧罗勒‧杏仁🌶️、黑松露‧白兰地🥃等等，仲有甜品版黑朱古力及海盐焦糖🍫𠻹。每份火锅都会配送橄榄油面包，畀大家吸满浓郁芝味真系好啱冬天啊。
正宗瑞士风味🧀「经典格鲁耶尔乾酪‧艾门塔尔乾酪」
瑞士格鲁耶尔乾酪、瑞士艾门塔尔乾酪、白葡萄酒、白胡椒、肉荳蔻
Matthew严选两款瑞士国宝级乾酪，包括略带坚果同微甜果香嘅格鲁耶尔乾酪(Gruyère)、轻盈奶香又拉丝嘅艾门塔尔乾酪(Emmental)，并加入大蒜同少少樱桃酒打造正宗瑞士风味。食嗰阵用橄榄油面包疯狂捲起长长拉丝!! 入口爆出满满乾酪味好正。
惹味辣肉肠🥩「辣肉肠‧马斯卡彭乾酪」
瑞士格鲁耶尔乾酪、瑞士艾门塔尔乾酪、大蒜、白酒、马斯卡彭乾酪、辣肉肠、樱桃酒
同样用上两款瑞士国宝级乾酪—格鲁耶尔乾酪(Gruyère)、艾门塔尔乾酪(Emmental)，再加码有马斯卡彭乾酪(Mascarpone)、西班牙辣肉肠，每啖都系烟燻肉香+乾酪，辣得温柔几过瘾。
海鲜风味🐙「墨鱼汁‧烟燻斯卡莫札乾酪」
瑞士格鲁耶尔乾酪、瑞士艾门塔尔乾酪、大蒜、白酒、墨鱼汁、烟燻辣椒粉、烟燻斯卡莫札乾酪、樱桃酒
将墨鱼汁加入呢两种经典乾酪—格鲁耶尔乾酪(Gruyère)、艾门塔尔乾酪(Emmental) 真系几有惊喜!! 独特海鲜味撞落乾酪咸香，再加埋义大利斯卡莫札乾酪(Scamorza)、烟燻辣椒粉又系另一种层次。
独特肉香🐮「牛肉汁‧醃核桃」
瑞士格鲁耶尔乾酪、瑞士艾门塔尔乾酪、大蒜、白酒、牛肉汁、醃核桃
格鲁耶尔乾酪(Gruyère)、艾门塔尔乾酪(Emmental) 做乾酪火锅底，再以牛肉汁、蜜饯核桃调味，天然微酸中和牛肉油腻，系香港好少食到嘅中欧风味。
经典奢华🥃「黑松露‧白兰地」
瑞士格鲁耶尔乾酪、瑞士艾门塔尔乾酪、白酒、奶油、大蒜、黑松露酱
将充满菌香嘅黑松露酱，加埋醇厚白兰地成就呢个奢华味道!! 当然继续有瑞士格鲁耶尔乾酪、瑞士艾门塔尔乾酪啦。一咬开面包即刻爆出松露+坚果+乾酪嘅独特咸香，再后续渗出深邃白兰地酒味。
香辣风味🌶️「醃墨西哥辣椒‧罗勒‧杏仁」
瑞士格鲁耶尔乾酪、瑞士艾门塔尔乾酪、大蒜、白酒、杏仁酱
一向辣得过瘾嘅醃墨西哥辣椒(Jalapeño)，撞上两款瑞士乾酪嘅坚果奶香，饮埋酒真系一流!!
甜品版火锅🍫「黑朱古力‧海盐焦糖」
64%黑朱古力、海盐、甜炼乳
将64%黑朱古力融化出可可独特微苦甜，再加入海盐、炼乳煮出咸甜咸甜嘅独特味道，冬天食特别有幸福感!! 啱晒嚟紧圣诞、除夕呢啲特别日子呀。
「Nocino」大坑店有欧洲小酒馆感觉。
观塘分店好开扬，木系大自然元素好温馨。
中环苏豪店门口简约型格。
Nocino (93WYS) (牛头角)
地址: 香港牛头角伟业街93号93WYS地舖
电话: +852 91722094