想喺旺角揾个唞气空间唔易，就算露天餐厅都畀密集楼景围住晒。呢2个月新开嘅“REFLECT Restaurant & Bar”终于打破闷局，有个极开扬天台Chill坐梳化饮酒食嘢；室内仲大玩梦幻镜像反射，嚟紧哈佬喂饭局又多个选择。
“REFLECT”大玩镜象反射。
开扬天台有好多梳化位，包场开party、轻婚礼都好啱㗎。
限定Halloween Cocktail，哈佬喂饭局必饮。
10年墨西哥菜大厨 一享Party Vibe料理
唔只环境啱慢食饮酒，“REFLECT”更特别请嚟10年经验墨西哥大厨，主理好有Party Vibe嘅墨西哥菜。经典嘅Quesadilla墨西哥馅饼、Beef Fajitas烤牛肉莎莎大份丰富，好啱一班人share；同场亦有墨x西fusion菜，Margherita Pizza玛格丽特薄饼更将批底变成Tortilla墨西哥粟米饼皮，好松脆惊喜。
最难得系香港都饮到墨西哥风味Cocktail，最深刻系出名劲辣嘅墨西哥辣椒Jalapen联乘墨西哥人最爱嘅Tequila，酸、辛、甜喺口中多重变化。
【地道墨西哥菜】
Quesadilla墨西哥馅饼
其实墨西哥菜好健康，好似呢个经典墨西哥馅饼，饼皮系用粟米制作，有种独特谷物香。馅料就有2款乾酪，一咬落去即爆出软绵绵拉丝乾酪。馅饼上淋满酸奶油、自家制牛油果酱同莎莎酱，劲有层次。
邪恶拉丝墨西哥馅饼，每啖都多酱+浓郁乾酪好有幸福感。
Beef Fajitas烤牛肉莎莎
呢道热辣辣铁板牛肉，同Warm Tortilla饼皮分开呈上，自己郁手包到爆晒馅都得。纽西兰西冷牛肉用咗波椒、洋葱、白酒炒香，并一反传统额外加入秘制茄酱、乾酪，令呢道传统菜式更有风味。
3款酱汁都畀得好多，绝对可以疯狂蘸酱食。个人特别钟意新鲜制作嘅牛油果酱，口感绵密Creamy；莎莎酱就有新鲜番茄、洋葱，清新微酸好开胃。
自由包馅蘸酱嘅烤牛肉莎莎，惹味又好玩。
【墨x西Fusion料理】
Grilled Cuttlefish烧墨鱼须
烧墨鱼同饮酒真系好夹，大厨仲用咗新鲜墨鱼须即叫即烧，再洒上秘制香料。微辣Q弹，真系会一食上瘾。
新鲜墨鱼须即叫即烧，微辣Q弹好啱饮酒。
Margherita Pizza玛格丽特薄饼
Party vibe真系唔少得Pizza，加咗墨西哥元素嘅话就更有惊喜。批底用咗2层Tortilla墨西哥饼皮制作，比一般Pizza更松脆。上面就铺满新鲜车厘茄、罗勒同邪恶拉丝Mozzarella Cheese。
玛格丽特薄饼批底，用双层Tortilla墨西哥饼皮制作好松脆。
Beef Cheek Ragu红酒烩澳洲和牛牛脸颊
澳洲和牛脸颊以红酒烩煮4小时，和牛软腍又吸满醇厚酱汁。食嗰阵肉香更会喺口中慢慢扩散，真系有种齿颊留香感觉。记住将手工扭捲粉捞满酱汁，全部都系和牛精华嚟㗎。
红酒汁烩煮澳洲和牛脸颊4小时，入味软腍。
Lamb Striploin纽西兰草饲羊西冷
好有惊喜嘅外脆内嫩羊西冷，羊扒上面铺满Parmasan Cheese脆片焗制，新鲜出炉会有层咸香乾酪脆片，将羊扒做出双重口感。配菜花椰菜Puree更淋上松露烧汁，味道卖相都好精致。
羊西冷铺满Parmasan Cheese脆片焗制，外脆内嫩。
Homemade Nougat Glacé法式鸟结糖冰糕
呢度有好多手工甜品，会不定期推出朱古力心太软、手工Tiramisu等甜品外，长驻甜品嘅法式鸟结糖冰糕系必食㗎！因为制作需时、讲究手艺，好少餐厅愿意花时间焗制。
甜品师傅会先用橙酒Grand Marnier浸泡杏脯、提子干，加入烤杏仁片后煮成鸟结糖状态。最后要打匀奶油蛋白，先做出绵滑软糯口感。好钟意佢哋为香港人度身制作嘅减甜版本，连埋滑腻蜜糖一齐食，甜度啱啱好。
极花时间制作嘅手工法国甜品，好少地方有得食。
【墨西哥风味Cocktail】
呢度自家设计嘅Cocktail好有心思，加咗好多新元素调制，点谂到出名辣嘅墨西哥辣椒Jalapeño都可以用嚟调酒?
Fuego Agrio
调酒师将墨西哥辣椒Jalapeño浸入糖浆平衡辣度，辣中带甜。再以青柠、蛋白调制出酸、辛、甜嘅独特Cocktail。
一定要试吓用墨西哥辣椒Jalapeño调制嘅Cocktail。
Green Island
Cocktail基调系提子酿造嘅白兰地Pisco，独特香味更被喻为香水白兰地。调酒师再额外加入香印提子，配以冷泡茉莉花茶，入口先有提子果香，后续再渗出淡淡清爽茶味。
Nama Sabi
少见鸡尾酒以Wasabi为灵感，再以薄荷浸泡琴酒提升清爽香味，配埋蜜糖柚子柠檬撞出酸甜清凉感。
(左)Green Island、(右)Nama Sabi
REFLECT Restaurant & Bar
地址: 旺角西洋菜南街74-84号旺角城市中心12楼
电话: 94029697
FACEBOOK: https://www.facebook.com/reflect.hk
DM/WhatsApp 94029697 For Reservation