你可能唔知今期韩国兴食忌廉捞乌冬，但你一定知本土大热嘅阿华田饮品呀甜品呀。如果可以先食一碗忌廉芝士乌冬，再加埋阿华田忌廉窝夫就完胜啦!
大热韩国忌廉乌冬 进化版在港首登场
泡菜味忌廉芝士！
铜锣湾呢间Seoulmate Café新推出嘅2款忌廉捞乌冬又点会得忌廉咁简单，唔单止系忌廉，仲要系忌廉芝士。呢款「泡菜蕃茄忌廉芝士乌冬配煎三文鱼」，上面嘅忌廉芝士加埋泡菜汁一齐打成，所以有粉橙色效果，亦有淡淡的泡菜香味，然後仲好花心机将忌廉芝士唧系用泡菜蕃茄炒嘅乌冬上面，骤眼睇落好似蛋糕咁靓。再捞埋泡菜蕃茄乌冬，味道酸酸辣辣，又有忌廉芝士嘅浓郁，十分醒胃，乌冬滑滑溜溜，比起普通忌廉乌冬丰富得多呀！
自家制嘅忌廉芝士加入泡菜汁打混，制作需时，所以限量供应㗎，要食就趁早喇！
忌廉芝士上面嘅香煎三文鱼都好有惊喜，煎到鱼皮脆卜卜之馀，咬开仲有微微三文鱼油渗出，够晒鱼香肉嫩。
香蒜洋葱味忌廉芝士！
第二款口味就系「香蒜洋葱忌廉芝士乌冬配煎三文鱼」，呢款就将香蒜丶洋葱打混入忌廉芝士，忌廉芝士唧系以香蒜丶洋葱同蚬肉炒嘅乌冬上面，捞理一齐食，锺意蒜香洋葱嘅话拣呢款就啱喇，尼款都配有香煎三文鱼㗎。
滑溜香蒜洋葱忌廉芝士捞乌冬同煎三文鱼一齐食，真系有种幸福感！
秘制韩式甜辣酱 焗厚肉猪肋骨
专登嚟食韩国fusion嘢，斋食乌冬梗系唔够喉啦，呢度仲有多款fusion韩食。想食得满足，编辑就推介呢道「韩式甜辣酱烤猪肋骨」，猪肋骨系用韩式秘制酱汁腌到甜甜辣辣，再用焗炉焗到入晒味。而且只系微辣，好多女仔都食到㗎。
烤猪肋骨仲配有2款清新韩式前菜，可以一边食肉丶一边解腻。
韩式炸鸡 都可以Fusion四川
想多啲新鲜感嘅话，一定要提呢道炸鸡。骤眼睇只系韩式炸鸡，其实大厨加咗四川元素－花椒油丶花椒粉丶花椒粒丶乾辣椒等埋锅炒，食落有韩式炸鸡嘅脆口肉嫩，但後续会有四川嗰种麻麻辣辣味道，可以话系韩国丶四川Fusion菜呀！
夏天Go Fresh 特选韩式甜酸汁
想食得清清哋，就可以试「炸软壳蟹浸游酸甜西柚沙律」，加咗西柚同韩式甜酸汁，酸酸啱晒夏天食，够醒胃。
「阿华田窝夫大战烧阿华田棉花糖」
呢排阿华田曝光率好高，成日Crossover唔同甜品丶嘢饮，今次Seoulmate Cafe嘅麻糬窝夫都配上自家制阿华田忌廉，棉花糖洒上阿华田粉然後烤脆，加埋阿华田饼同雪糕，阿华田粉丝一定唔可以错过呀！
韩国K爆米饼遇上朱古力
K爆米饼其实系韩国传统小食，将米粒爆脆再压成饼，口感松脆唔腻。今次将米饼淋上厚厚嘅朱古力酱，味道浓郁唔偏甜，配埋焦糖香蕉同云呢嗱雪糕食就有多重口感。
韩国荷兰宝宝班戟配士多啤梨
荷兰宝宝班戟系一道韩国流行嘅甜品，最吸引就系充满蛋香嘅班戟，咬落软绵绵又有少少烟韧，系即叫即焗热辣辣先有呢个效果㗎！食嘅时候，记着配埋士多啤梨丶朱古力酱同雪糕呀。
仲有多款首创嘅特制饮品，编辑就锺意伯爵茶黑糖啫喱够咬口。
（左起）
伯爵茶黑糖啫喱黑焦糖忌廉：伯爵茶柔和清新，加上粒粒黑糖啫喱同上层黑糖忌廉同烧焦黑糖，味道丰富。
紫薯拿铁黑糖忌廉：上面系用韩国黑糖打成嘅忌廉，下面系紫薯拿铁，会饮到软滑紫薯蓉，当饭後甜品都得！
抹茶红豆拿铁芝士奶盖：上层系自家制芝士奶盖，比一般奶盖更幼滑丶有芝士同奶香。
（左起）
桑格莉亚 (Sangria)白葡桃酒：白酒加入葡萄同桃汁，系清甜版嘅Sangria。
热情桑格莉亚 (Sangria)杂果酒：以经典的Sangria为基调，加入热情果和杂果果肉。
Seoulmate Cafe
地址: 铜锣湾骆克道491-499号京都广场4楼
电话: 21046788
