经历咗六个多月，相信好多小店都无乜心情谂冬日菜色。延期又延期，Seoulmate Café 终於推出「荣光喛冬日」 Special Menu 啦! 虽然可能 Special Menu 无咩 special，可能大家无乜心情出街食饭，可能农历新年太快到，但系都要和理 DINE 一 DINE，因为「五大小食 缺一不可」!
五大小食 缺一不可
「五大小食 缺一不可」，一听就知系五款小食拼盘啦。五款小食都炸得啱啱好金黄脆口，真系少一款都唔想呀，分别有韩烧猪仔髀丶炸鸡丶饺子丶虾球同甜薯条。铁板则放有煮溶嘅车打丶马苏里拉芝士，果然韩国菜就系要食芝士拉丝。
炸物唔会太乾太油。轻轻喺铁板一卷，就沾上厚厚芝士。
你拣良知白雪山定系愤怒了火山?
呢度最出名嘅就系「山」，每次见到软绵绵蛋白嘅山，加埋萌萌表情已经忍唔住要同佢影相。佢哋嘅表情仲会成日转㗎，每次都有惊喜。今次冬季限定就有「良知白雪山鳗鱼樱花虾饭」同「愤怒了火山鳗鱼饭」。
（左）良知白雪山丶（右）愤怒了火山
已经见到足料嘅鳗鱼樱花虾饭，唔洗再挥叉暴笃啦!
蜜桃烤蕃薯炸鸡
虽然韩式炸鸡热潮一直不减，但编辑最欣赏店家唔会「食老本」只卖一般炸鸡，反而Keep 住设计新口味。今次冬日限定嘅「蜜桃烤蕃薯炸鸡」就加入欧洲冬日元素，加上微微的肉桂烤香蕃薯和香桃。轻甜香桃配炸鸡食落无咁腻之馀，炸皮沾上桃汁亦更酥脆，烤蕃薯内软外脆十分甘香。
蜜桃炸鸡灵感取自欧洲。
泡菜蕃茄忌廉芝士意粉 配 香煎三文鱼
韩国菜嗰种浓郁软绵味道，真系好令人上瘾，喺冬天食特别满足。厚厚嘅自家制忌廉芝士下面，系酸酸微辣嘅泡菜番茄意粉。虽然厚忌廉系主角，但香煎三文鱼都有惊喜，鱼皮煎得够脆，咬落亦渗出鱼油。
厚厚芝士忌廉最啱冬天食。
Glory to Hong Kong 窝芙甜品拼盘
作为香港人，一定齐心爱香港呢个地方。望住迷你圣诞老人丶姜饼人链企埋一齐，可能就系店主嘅命名灵感。除咗可爱人物，仲有四件麻糬窝夫砌成嘅迷你树，比一般窝夫更烟韧，配埋忌廉丶两球雪糕一齐食，几种咬口加埋一齐几特别㗎。
可预先致电店家自订碟上字句。
韩国荷兰宝宝班戟配士多啤梨
呢道荷兰宝宝系经典班戟，外层少少焦脆，食落软绵绵得嚟又带烟韧，蛋味香浓，系即叫即焗先有呢个效果㗎。
荷兰宝宝班戟即叫即焗。
绿茶韩意米酒芝士蛋糕 (Tiramisu)
今次冬日限定推出咗两款芝士蛋糕口味，其中一款就系绿茶Tiramisu喇。平时食开嘅Tiramisu 多数都系用冧酒，今次就改用韩国米酒。闻落有米酒香味，但食落唔会好重酒味，反而突出咗绿茶独有嘅醇涩味道。
Baileys 咖啡意式芝士蛋糕 (Tiramisu)
相比绿茶口味，Bailey 味道嘅酒味同咖啡香更浓，可以话系一般Tiramisu 嘅进化版，所有味道都更强劲，Tiramisu 粉丝一定要试试。
（左）Baileys 咖啡 Tiramisu丶（右）绿茶韩意米酒 Tiramisu
冬日特饮
店家亦特别调制多款特饮，Mocktail 同Cocktail 都有，女仔大把选择。
（左起）桑格莉亚的白葡桃酒丶伯爵茶啫喱黑焦糖忌廉丶Baileys咖啡配海盐焦糖棉花糖丶血腥月娥几时酒 (Bloody Carrie)。
店主特别推介血腥月娥几时酒 (Bloody Carrie)，佢话 : 「你哋叫月娥走，我哋捐呢杯酒，唔知好唔好饮，爲求大家科金! 」