主打健康地中海饮食概念嘅“Cafe Bonita”，于木的地．R三楼全新登场喇！餐厅贯切木的地酒店嘅西班牙风格，环境舒适富有空间感，仲有户外空间可以随时出去散步唞气，好chill啊。酒店更设瑜伽中心提供各种瑜伽及颂钵工作坊，就算唔系酒店住客都可以参加，做完运动嚟食健康嘢就啱晒喇。
厨师团队以西班牙美食为灵感设计多款菜式，提供半自助早餐、午餐同单点菜式，午餐最平只系$88起，另有加一收费，性价比高，值得试吓。
注入地中海饮食模式的西餐 午市套餐 $88起
厨师每日都会喺本地街市挑选新鲜食材，主要以橄榄油、香草、海鲜、蔬菜入馔，炮制健康好食嘅菜式。午餐时段会供应「两道菜精选午市套餐」，每星期都会转换头盘同主菜，午餐仲会送咖啡或茗茶㖭。留意返，呢度嘅茗茶特以名牌茶叶冲泡一壶好茶，想饮其他特色茶仲有甚少见嘅烟燻茶叶、有机茶叶选择，比坊间冲制茶包更高享受，好推荐大家趁价钱相宜嘅午市套餐一试。
主菜亦有多款选择，包括招牌西班牙海鲜饭、沙律碗、精选义大利粉或义大利饭同埋扒类，总有一款啱你口味。
招牌西班牙海鲜饭
提到西班牙菜，点少得呢款经典菜式呢！以多种海鲜入馔，包括：青口、鲜虾、鱿鱼等，依西班牙传统做法煮得creamy惹味，可以一口气食到大海嘅味道啊！
焗杏仁蒜香比目鱼甜菜根烩义大利饭
呢度嘅义大利饭都好有心思，以红菜头烩制义大利饭，令饭粒沾满天然夺目嘅紫红色，净系颜色已经够抢眼啦！配埋煎得焦香嘅肥美比目鱼，极富鱼油香。
丰富杂锦沙律碗
平时想食得轻盈啲，呢度以素食为主嘅沙律都好丰富！以色彩缤粉嘅蔬果吸引眼球，再加入自家制酱汁，食落清新又唔怕口寡寡。更可追加烟三文鱼 或 蒜香虾补充优质蛋白质，系健康无负担嘅好选择。
单点菜单 | 地道西班牙小食+特色甜品
单点菜单有多款地道西班牙美食，包括当地西部嘅特色脆炸田鸡腿、招牌甜品肉桂油条、传统西班牙炸牛奶同西班牙肉桂多士等，难得喺香港都食到欧洲风味啊。
西班牙西部地道小食脆炸田鸡腿
原来西班牙都有炸田鸡㗎～师傅会将田鸡脚蘸上薄薄一层粉浆，落油镬炸到外脆内香，田鸡肉仲好柔软，唧埋柠檬汁提鲜仲好食。
西班牙油条（Churros）
相信大家对Churros呢款地道西班牙甜品唔陌生，金黄香脆嘅油条炸到超香口。食落脆卜卜，表面沾满肉桂粉，香气十足！
西班牙炸牛奶（Leche Frita）
当地招牌甜品大多以炸物为主，好似呢款Leche Frita都唔例外。薄脆炸衣包裹香滑软绵嘅鲜奶，外脆内软。趁热食嘅话，仲会食到冰火交融嘅冲击～
西班牙肉桂多士（Torrijas）
钟意肉桂嘅你唔可以错过呢度嘅多士喇！西多士烤至金黄色，卖相好吸引，外层微脆而内里松软。表面加上时令生果，如草莓、蓝莓、焦糖香蕉等作配搭，食落更开胃清新。最后再洒上肉桂粉，昇华咗成个甜品嘅层次啊！
搜罗各地精品咖啡及茗茶 口味多元化
Cafe Bonita对咖啡嘅出品都好有要求㗎，呢度会定期供应世界各地搜罗嘅精品咖啡豆，如巴西、哥伦比亚等地，尽量满足咖啡迷嘅口味。特别一提嘅系，餐厅即将推出由云南省普洱市孟连县引入嘅高海拔单品（SOE）咖啡豆，入口浓郁并伴随坚果同黑朱古力尾韵，层次好丰富，只要叫任何咖啡加$8就可以升级饮到喇。
除咗意式咖啡，呢度一样饮到带坚果风味嘅巴西黄波旁，同埋富果香嘅哥伦比亚卡杜拉手冲咖啡，每杯$68，性价比几高！唔想饮啡，亦有多款健康养生嘅有机茗茶，包括沉香茶、毛尖绿茶、松烟香小种红茶等都叹到。下午茶简单食件自家制英式松饼已经好chill，啱晒爱茶之人静落嚟享受慢活节奏。
营业时间
每日上午7时30分至下午6时，各段用餐时间如下： |
Cafe Bonita
地址：九龙佐敦长乐街19号木的地．R 三楼
电话：21219867
WhatsApp: 57222847