对唔少打工仔嚟讲，食晏最重要就系够快靓正，有多啲时间享受美食好重要。今次介绍嘅「Grill ขนทอง」就系个好推介，铜锣湾新店位于骆克駅，四款抵食嘅午市套餐供应至下午6:00！放工后Happy Hour或者想医肚，更有多款串烧同泰式小食选择。
日卖800碟！招牌串烧配炒饭
有去过兰桂坊嘅朋友一定认识「Grill ขนทอง」呢间泰式串烧店，难怪两间店最热卖嘅午市套餐都系串烧配炒饭！有齐鸡肉、猪肉同牛肉，分别醃至入味再高温烧熟，外层微焦而里面保留到肉汁。炒饭炒得够干爽，粒粒分明，加上豆角粒增加口感层次。铜锣湾更特别供应泰式串烧鸡肉配炒饭，唔食牛嘅朋友都唔使走牛肉啦。
泰式串烧鸡、猪、牛配炒饭（配餐饮）
三款串烧都够入味，微微焦香好加分
皇牌推介 嫩滑肉厚泰式去骨海南鸡饭
串烧之外，小店最出名嘅就系佢哋嘅去骨海南鸡，唔单止因为已经先去骨，食落啖啖肉够晒爽，更因为鸡皮爽滑、肉质更系非常嫩滑，连鸡胸肉都唔会干！点少少甜豉油同泰式辣酱已经可以带出鸡肉香气。原来秘诀系要用一定重量嘅鸡，太轻嘅话肉唔够厚，太重嘅话肉质又易老。油饭嘅油香亦好浓郁。
去骨泰式海南鸡饭（配餐饮）
海南鸡皮爽肉嫩，而且已经去骨，食得更方便！
午市套餐另有泰式青咖喱牛腩饭同青木瓜手撕鸡沙律选择，外卖堂食都好方便，特别系青木瓜手撕鸡沙律好啱有Keep Fit需要、或者比较细食嘅女士。
铜锣湾限定！杯装Single Shot冬阴功 + 青咖喱大鱼蛋
无论行街途中想食少少嘢医肚，定怕唔够饱加多个小食，都可以试呢两款为铜锣湾新店而新推出嘅小食：冬阴功汤同泰式青咖喱大鱼蛋。
冬阴功汤特别以杯装奉上，更取名为Single Shot，唔单止因为可以好似咖啡咁方便Grab & Go，亦因为冬阴功汤味道酸辣富椰奶香，同咖啡一样可以帮手提神！又或者放工后一个人想试串烧，配埋冬阴功汤立食一样得。
Single Shot冬阴功汤
泰式青咖喱大鱼蛋顾名思义就系用泰式青咖喱煮大鱼蛋，估唔到泰式咖喱同香港嘅经典街头小食鱼蛋又几夹。同样用杯装，内附大量香辣惹味嘅青咖喱酱汁，畀大家一路食一路点，就算系钟意重口味嘅朋友仔都保证满足到呀。
泰式青咖喱大鱼蛋
营业至凌晨5:30 特设高温烧炉炮制串烧
餐厅特设烧烤炉，最高可达300°C，缩短烧烤时间保留食材水分
无论系新开嘅铜锣湾店，定系中环店都营业至凌晨5:30，无惧疫情继续照顾各位「夜鬼」！放工后最受欢迎嘅自然系泰式串烧同啤酒啦。两间店都配备特设烧烤炉，因为食材烧得越耐越容易变干，所以用300°C高温烧串烧，要烧至啱啱熟保留到最多肉汁，而又唔会咬开中间未熟，就非常考验师傅手艺啦。
菠萝有层焦糖面，清甜多汁
猪颈肉肉质爽口，油香十足
串烧不败秘密：自家酱汁！
串烧本身出色之馀，酱汁亦系灵魂所在。负责人指中环店开业前筹备咗11个月，当中有5至6个月就系不断研发同调配酱汁！现时有泰式红鸡酱、黄咖喱酱、芫荽酸辣酱、沙爹酱、烤牛肉酱、青咖喱酱、青辣椒酱，每款串烧都有佢嘅「Perfect Match」酱。
客人可以选择辣定唔辣，再由师傅按食材配搭最适合嘅自家特色酱汁
而串烧嘅最佳拍档仲有泰国啤酒！On Tap嘅Singha生啤比起樽装啤酒口感自然更新鲜，而Singha生啤麦香适中，口感清爽，配任何串烧都咁夹呀。
Singha生啤
铜锣湾店装修同样走街头风格，环境舒适
Grill ขนทอง (铜锣湾店)
地址: 铜锣湾骆克道487-489号骆克駅地下
电话: 27166922
Grill ขุนทอง (中环店)
地址: 中环和安里1号地舖
电话: 25301022