估唔到香港都有波斯菜食！可能大家对波斯菜有啲陌生，但其实系好多中东菜系起源嚟㗎。佢哋嘅料理都以天然香料、烤肉、蔬菜为主，系相当健康嘅饮食文化。今次介绍的"SAFFRON Persian Cuisine" 系波斯人Matin及Amin开设，他们居港10年发觉香港无波斯菜，加上受开餐厅嘅爷爷启发，毅然开咗香港第一间波斯菜。
地道波斯菜文化，冷、暖食物一齐食先最平衡。
波斯饮食文化 平衡身心
而波斯菜更深入讲究「食物平衡」—冷、暖食物互相平衡身体。试想像暖成分(如肉类、藏红花、薑黄、胡椒等) 增加血压；冷食物(如沙律、萝卜、核桃等) 则降血压，两者相衡令身心达致最佳状态。讲咗咁耐，其实想大家去"SAFFRON Persian Cuisine" 食波斯菜前，知道可以拣奶酪蘸酱、橄榄；同时又拣啲BBQ肉串、藏红花饭 一齐食，真正体验吓波斯菜文化。
波斯零油烤肉 多种香料醃数小时
呢度系清真认证餐厅，肉类以羊、牛、鸡为主，并依波斯BBQ烧法，一滴油都唔使落，用火力将肉嘅油花逼出，香口惹味又健康。波斯菜特点之一系味道变化丰富，就算BBQ肉串骤眼睇无甚特别，其实用咗多种天然香料醃4至5小时，所以每啖都好有层次。
波斯烤肉一滴油都唔使落，并会用天然香料醃4至5小时。
波斯羊肉碎烤串配饭 Lamb Koobideh with Rice
Matin透露呢道波斯烤羊肉喺当地好受欢迎！羊肉串系100%纯澳洲羊肉，唔会加入任何松肉粉。烧烤前则以香料醃制数小时，一上枱已经闻到好香。羊肉惹味唔羶，入口仲会爆出少许肉汁。
如果你细心留意会发现店名以藏红花(SAFFRON) 命名，因为佢哋嘅米饭、鸡肉同部分饮品，都加咗呢种全世界最矜贵香料。你见到金黄色米饭，正正系藏红花饭喇。
羊肉串系100%纯羊肉，喺波斯好受欢迎㗎。
【价值相等黄金】全世界最矜贵香料「藏红花」
藏红花作为最矜贵香料绝非虚名，其价值相等黄金。因为一定要人手采摘干燥，而且大量藏红花先制作到少量香料，其干草香味、甜中带咸辣嘅香浓味道，成为香料界中嘅黄金。
呢度可单买藏红花/茶叶，对健康好有益处㗎。
烤鸡胸肉串配中东烤饼 Saffron Joojeh Kebab with Naan
如果你想试真藏红花入馔味道，呢道烤鸡胸肉就用咗藏红花醃制，再烧至金黄轻焦。用中东烤饼包住，再加啲沙律、烤番茄、青椒食好有层次。
鸡胸肉以藏红花醃制，再烧至金黄轻焦。
波斯鸡肉碎烤串配沙律 Chicken Koobideh with Salad
钟意啖啖肉可以拣BBQ鸡肉串，同样用多种香料—香蒜、罗勒等醃数小时。而且全部酱都系用香料自家制，香蒜酱可以用嚟蘸鸡肉；罗勒酱则拌沙律。
BBQ鸡肉串用多种香料醃，啖啖肉。
杂锦烤肉串 Kebab Lovers
肉控想一次过试晒几款BBQ肉，拣呢个杂锦烤肉串最抵食！有齐烧羊肉串、烧鸡肉串、烤藏红花鸡胸肉、波斯风味烧烤鸡翼，及2客沙律、藏红花饭同各种配料，1道菜食匀多款料理呀。
有齐多款肉串，好抵食！
Gheymeh Bademjan
如果你想食得地道啲，呢道炖菜正正系Matin嘅童年回忆。佢忆述呢道炖菜好好食，但要边煮边搅拌4、5个钟，所以细个时妈妈会留喺厨房煮几个钟，加上波斯家庭都有好多兄弟姐妹，每次妈妈都会端出好大煲㗎。
锅内有炖到好软腍嘅羊肉、黄碗豆、青柠干同特制番茄酱。羊肉醃得好有香料层次，舀啲酱捞埋藏红花饭一齐食好正。
充满波斯人童年回忆嘅家庭料理。
呢度仲有多款波斯小食:
伊朗糯米鸡 Dolmeh
乍看之下真系估唔到咩嚟，不过唔好心急打开呀，因为地道食法系连埋藤叶一齐食。入面有肉碎、碗豆、鹰嘴豆同香草，香料味浓又有绵密口感。
记住连埋藤叶食，最有风味。
波斯风味烧烤鸡翼 Special BBQ Chicken Wings
鸡翼以特制酱汁醃制，再以波斯BBQ方法烧好惹味。
波斯风味鸡翼好惹味。
烤茄子泥配中东烤饼 Mirza Ghasemi
抢眼嘅太阳蛋下，系烤茄子、番茄、蒜蓉压成嘅传统茄子蓉，戳开蛋黄捞匀蛋浆，配埋中东烤饼食开胃健康。
茄子蓉捞匀蛋浆好绵滑，配烤饼食好夹。
文初提到嘅冷盘奶酪酱、沙律等，夹埋主菜一齐食可以平衡身心。
波斯风味青瓜奶酪蘸酱 Mast-O-Khiyar
自家制波斯奶酪，内里有青瓜、新鲜薄荷叶，用烤肉蘸嚟食更有风味。
奶酪蘸酱配主菜一齐食，可平衡身心。
消费券优惠:
埋单9折优惠 (原价加一另计及午市套餐不适用)
SAFFRON Persian Cuisine
地址: 中环嘉咸街47-53号嘉利大厦地下E号舖
电话: 25959900
*每间指定餐厅支援的付款方式有所不同，详情请向有关餐厅查询。餐厅保留最终决定权。
