放假去屯门,唔少得到三圣墟海鲜市场,买完生猛海鲜就可以嚟「棠记海鲜小厨」揾师傅帮你煮!唔单止你想点整就点整,从豉油王、避风塘、开边蒸、豉椒炒等,都可以满足到;而且师傅非常用心,部分酱料更系自家调配、加上镬气足,风味只此一家。
喺香港提到食海鲜,唔少得保留渔港风情嘅三圣墟,集合十几个海鲜档,有多款时令海鲜任拣。因此附近嘅棠记海鲜小厨就提供自来海鲜加工服务,明码实价加工费海鲜每款每斤$75,拣啱煮法然后就可以坐低等食。餐厅环境阔落,装修走家常平实路线,最紧要系够干净企理。
外脆内鲜 即炸脆皮鲍鱼
唔少客人嚟棠记都会点脆皮炸鲍鱼,问过负责人先知,原来秘诀在于一定要生炸,而且要炸至七至八成熟而唔系全熟,咁样先唔会流失鲍鱼肉汁,食落特别鲜甜弹牙!脆浆亦经过特别调配,口感轻盈酥脆唔油腻,最后洒上少少椒盐提鲜够惹味。钟意食辣嘅朋友可以加埋辣炸蒜干,香气加倍。
脆皮炸鲍鱼
「芝」味十足 两款乾酪龙虾推介
肉厚爽脆嘅龙虾亦系唔少海鲜控嘅首选,经典嘅乾酪龙虾伊面呢度亦做得好有水准。选用车打乾酪等三款唔同种类嘅乾酪制作三色乾酪汁,加埋龙虾同伊面焗至金黄色。伊面吸收咗龙虾嘅鲜味,再捞埋乾酪汁一齐食真系无得输。
乾酪龙虾伊面
想乾酪香再浓郁啲?咁就要嗌脆皮乾酪焗龙虾!同样用三色乾酪配搭新鲜龙虾,唔同嘅系会将乾酪焗至焦香形成脆面,未食先闻到乾酪香,每啖食到嘅乾酪酱分外浓郁有「芝」味,同弹牙嘅龙虾肉系绝配。
脆皮乾酪焗龙虾
自选烹调方法 食尽海鲜鲜味
问过餐厅负责人,大部分加工方法只要客人提出都会尽量做到,好似新鲜大虾可以做黄金、茄汁炒、椒盐、避风塘、开边蒸等等,其中一个推介就系豉油王。简单用蒜蓉、干葱、葱花爆香,重点系加入秘制豉油王酱汁大火快炒,镬气十足,亦保留虾肉弹牙口感!
豉油王大虾
蛏子肉质爽口,本身味道较淡,所以可以用豉椒炒,加埋三色椒、洋葱等,衬托出蛏子嘅鲜甜。煎米粉亦系一大亮点,同坊间一般嘅食到会黐牙嘅炸米粉唔同,呢度真系由师傅用心将每块米粉煎到外脆内软,吸收晒酱汁精华又有咬口。
豉椒蛏子煎米粉底
必点巧手小炒 招牌咸鹅、拔丝咕噜肉
估唔到海鲜街嘅餐厅里面,咸鹅都做得几出色。负责人笑指因为附近餐厅都有卖烧鹅,佢哋想特别啲就做咸鹅。佢哋嘅卤水偏白卤水风格,食落带淡淡酒香同咸鲜。皆因自家卤水加咗酒同新鲜虾壳熬制,而且每只鹅都会卤至少90分钟至完全入味,香气层次丰富唔死咸。
招牌咸鹅
就算系平时唔打卡嘅朋友,见到呢碟卖相别致菠萝咕噜肉都会忍唔住相机食先!师傅特别拣用新鲜金菠萝,起完果肉然后再轻烧,令菠萝食落更香甜、更多汁。而咕噜肉选用新鲜猪腩肉,炸至金黄香脆后用自家咕噜酱汁炒过,酸甜开胃,更有脆皮拔丝嘅效果!
菠萝咕噜肉
送饭之选仲有招牌小炒皇,用虾干、虾仁、鱿鱼、腰果、韭菜花一齐爆炒。当中更有大银鱼干同自家秘制XO酱,大银鱼干鲜甜、口感有嚼劲,XO酱用料有诚意、特别加入虾子提鲜,令呢道小炒皇更香口。
招牌小炒皇
餐厅宽敞,以中式圆枱为主,干净企理
棠记海鲜小厨
地址: 屯门三圣村丰渔楼地下10-11号
电话: 24580636