如果你钟意欧洲古典风，一定有留意INN Group旗下多间华美风cafe，尖沙咀“Royal INN”就系其中一间喇。呢度仲将成个凯旋门搬埋嚟，更有古典水晶灯、法式花店充满法国小镇vibe。
凯旋门好抢眼，全店洋溢法国小镇vibe。
室内环境典雅浪漫，户外露天庭园又系另一种轻松氛围。适逢春夏，可以享受阳光微风下饮咖啡chill吓。
户外景观开扬，慢食倾计好chill。
不过呢度都唔只得咖啡饮㗎～大厨擅长传统法国菜，主打海鲜、肉扒，招牌菜海鲜冷盘、威灵顿羊架都好受熟客欢迎。精致法国料理加埋浪漫环境，好似飞咗去法国食饭咁，好啱约会、聚餐同庆祝特别日子。
【必食人气菜式】
鲜牛肉他他
虽然叫牛肉他他，但原条半开牛骨髓超抢镜！入面有新鲜牛肉、香烤牛骨髓，入口有满满肉香同油香～口感滑嘟嘟，好似每啖都补充紧胶原蛋白咁呀。
香煎原只美国野鸡仔
美国野鸡仔啲肉好嫩，一搣开已经见到好多肉汁！配埋松露汁同炒野菌，未食已经闻到好香。
炭烧安格斯平铁牛扒(8oz)
如果你钟意有咬口、肉味嘅牛扒，一定要试平铁牛扒(Flat Iron)。呢个系牛肩膀最嫩嘅位，口感紮实带软嫩，肉味愈食愈浓，8oz大份量绝对满足。
西班牙黑毛猪胺架
讲到黑毛猪，不得不提西班牙伊比利亚，系最顶级之一嘅黑毛猪嚟。严谨嘅饲养过程，令黑毛猪充满油香同独特果仁味。黑毛猪煎到粉粉嫩嫩，唔会太熟太韧，肉质仲好松软。
波士顿龙虾西班牙海鲜饭
西班牙海鲜饭好足料～除咗有新鲜活波士顿龙虾、青口、大蚬等海鲜，仲有你可能错过嘅矜贵香料—藏红花。其独特麝香味、微酸好突出海鲜甜味，具存在感又唔会遮盖海鲜主角，系呢道经典料理必不可少嘅香料。但藏红花相当矜贵，一定要人手采摘且过万朵花先有约100克，真系要食真啲呀。
【IGable鸡尾酒】
多款鸡尾酒都加咗水果元素，清爽酒香好啱春夏微醮。
I'm NOT the Classic Sangria
相信大家对西班牙水果酒Sangria唔陌生，红酒基调加入各种水果，清爽香甜。今次调酒师就将经典Sangria重新演绎，唔知同Classic Sangria有咩分别呢?
Apple-tini
呢杯鸡尾酒以波兰野牛草伏特加为基调，酒味本身带有青草、百里香气息，配上青苹果清新得嚟又有强烈酒味，好有层次。
Passionfruit Martini
呢杯鸡尾酒用咗原个热情果，果香浓郁，用作餐前醒胃鸡尾酒，或当做甜品都好啱。
Royal INN
地址: 尖沙咀弥敦道100号The ONE1楼L121号舖
电话: 23218289
