想食镬气小炒梗系要到大牌档！今次介绍嘅「建荣特色桑拿菜火锅店」就位于建荣熟食市场里面，唔系屯门街坊真系未必知呢间藏身于工业区当中嘅高质小店啊。佢哋以镬气小炒闻名，特色招牌菜包括冰淋酱烤骨、脆皮原只猪手等。气氛热闹，一家大细约饭局或者三五知己嚟食饭都一流。
位于传统熟食市场之中，餐厅室内有冷气开放，室外亦放置大型风扇，夏天嚟都绝对唔怕热。冬天嚟就有多款鸡煲、火锅选择。亦设有VIP房，有需要嘅话建议提早预订，私隐度更高。
送酒推介！脆皮原只猪手、红烧乳鸽
无论系放工后定放紧假，嚟到想放松心情饮返两杯啤酒，当然要嗌埋送酒小菜先够尽兴。呢度最出名嘅脆皮原只猪手炸至金黄酥脆，唔系讲笑、猪皮食落真系脆到好似食紧薯片咁！猪肉亦有咸香，口感软嫩唔油腻。
脆皮原只猪手
香口推介亦有呢碟红烧乳鸽，用大细适中嘅乳鸽先用餐厅秘制卤水浸过，再炸到啱啱熟就上枱。未食先闻到卤水同油香，令人食指大动。咬落皮脆肉滑，更有肉汁喷出！唔需要多馀调味已经好出色。
红烧乳鸽
送饭一流 冰淋酱烤骨、招牌小炒王
如果系同小朋友一齐嚟，可以嗌呢碟酸酸甜甜好开胃嘅冰淋酱烤骨，采用金沙骨（一字骨）先炸再加酱爆炒。酱汁啱啱好包住每一块烤骨，肉质松软好易咬开。而令人食到忍唔住连骨都吮埋嘅酱汁系用酸梅酱、XO酱、豆瓣酱调配而成，酸甜中带少少辣，令人忍唔住食完一件又一件。
冰淋酱烤骨
招牌小炒王同样热辣辣香喷喷好啱送饭㗎，用新鲜蒜薹，加上虾仁、鱿鱼、腰果、虾干、银鱼干等配料一齐爆炒。睇落好似同其他餐厅差唔多，胜在用料优质，火候亦掌握得宜，海鲜更系餐厅每日采购，鱿鱼食落零舍新鲜弹牙！
招牌小炒王
食材新鲜 结合镬气至好味
咕噜肉亦系餐厅嘅热卖招牌菜，用肥瘦适中嘅新鲜猪腩肉先炸过，再加秘制咕噜酱汁、洋葱、青红椒炒香。食落先有酱汁酸酸甜甜嘅滋味，再到猪肉嘅肉味同脂香。食到一半可以加埋碟边嘅菠萝，餐厅特别拣新鲜菠萝再烧香，食落香甜多汁，同坊间常用嘅罐头菠萝完全无得比！
招牌咕噜肉
上面都提到餐厅嘅海鲜系即日入货，因此呢度嘅海鲜菜式亦绝对值得一试。椒盐鲜鱿脆浆厚薄适中，食得出酥脆又够干身唔会成口油，里面嘅鱿鱼肉厚鲜甜。加上秘制椒盐同炸蒜提鲜，十分惹味。
椒盐鲜鱿
无辣不欢嘅朋友就要嗌呢份川味辣子鸡啦，用咗八种香料，包括四川辣椒干、孜然等爆香鸡件再洒上芝麻，每件鸡肉入口都有齐麻、辣、酥、香，非常过瘾！
川味辣子鸡
咸鹅嘅鹅肉非常入味软嫩，卤水嘅咸香突出，同时唔会盖过肉香。鹅皮亦够爽滑，带鹅油嘅甘香。当然亦系用餐厅嘅秘制卤水煮成，点少少酸汁中和油腻感。
白切咸鹅
建荣特色桑拿菜火锅店
地址: 屯门建荣街32号建荣熟食市场地下C6号舖
电话: 27725333