平时去旺角行街，又点谂到闹市之上会有间好Chill 嘅月球主题酒吧「J.moon」。其实係旺角想搵一间环境好仲要有室外空间，又要岩食饭打卡同时可以同三五知己于饭后黎饮番两杯，「J.moon」绝对係首选! 一入去已见到挂满过百月亮灯，而且每张枱都放有月亮灯，好啱拎住影相，自带灯光效果几靓㗎。
<店内挂满唯美月球灯，好有气氛>
<每枱都有月亮灯，好啱拎住影相>
【旺角少见户外酒吧 舒适大梳化 媲美港岛靓酒吧】
原来除左靓靓室内之外，推门一出仲有户外空间，旺角呢区好少有呀！介绍番係全新装修，大梳化同咕𠱸都软腍腍好舒服。而且设全电动天幕隔热挡雨，冬天半躺梳化一睹夜空好浪漫，情侣或年轻人嚟饮酒倾计好有气氛，小编都大赞啊!
<旺角少见酒吧有咁高质户外空间，梳化好舒服>
【好睇又好饮既12星座主题Cocktail 】
呢度有专业调酒师设计出好特别既12星座Cocktail(好好饮嫁)，而且餐牌上每杯Cocktail 都有独有语句讲出星座心声，我自己星座都几中心底话(笑)，嚟到一定要睇返自己专属星座呀！最惊喜係呢度仲有酒店级名厨主理Fusion 菜，有多款小食、主菜，终于唔使食饭同饮酒分开喇。
<12星座Cocktail 各有特色，好想知自己星座专属酒係点呢？>
<餐牌上每杯Cocktail 都有独有语句讲出星座心声>
双子座专属
“Falling in love secretly is not a crime, let others know how much you love this”
双子座用鲜花衬托好唯美，以接骨木花酒、Vodka为主调，再加入柠檬汁，味道清爽。
白羊座专属
“I know you are impatient, but this refreshing drink is totally worth the wait”
白羊座嘅型格黑色，係12星座中最突出。以Rum酒、杏桃香甜酒、日本梨味柚子果汁调製，香甜中带酒味。
天蝎座专属
“This mysterious combination is good that you will remember it forever just like the scorpios”
天蝎座配有J.moon自家调制既云呢拿cream，非常香滑，好味到可以叫一杯纯云呢拿cream黎食。依个云呢拿cream中和左以威士忌和Guinness为主既base，相信女仕们都一定会锺意!
12星座之首 神秘Cocktail
同场仲有神秘感十足嘅12星座之首—Signature Cocktail「J.moon」，但Menu 就无写用咩调製。一问之下，调酒师话因为想畀食客惊喜，所以专登唔写㗎。但味道係果香轻甜，大家嚟到睇吓饮唔饮得出係咩啦！
Signature Cocktail「J.moon」，一笃开泡泡即飘出仙气。
【酒店级大厨 Chill 住食Fusion 菜】
J.moon大厨曾于数间酒店同大型饮食集团任职多年，特别设计适合J.moon 气氛嘅多国元素主食、佐酒小食。可以一嚐酒店级味道之馀，呢度气氛轻鬆舒服，全无酒店用餐拘谨感觉。
大厨巧妙将西餐加入新加坡元素，估唔到意式阔条麵同新加坡喇沙风味几夹。Q弹阔条麵挂满喇沙汤，喇沙汤偏香浓，连埋爆汁豆卜食几正。
<新加坡喇沙大虾阔条麵>
好锺意呢度嘅Pizza 大细适中，唔会斋食Pizza 就饱咗，可以慢坐食吓小食、食吓Pizza 咁。笃开温泉蛋即流出蛋汁，批底又够脆，一绵一脆口感几丰富。
女仔唔想食咁多肉同淀粉质，好推荐三文鱼扒，厚切得嚟仲Keep 到丰富鱼油，鱼皮又煎得脆，加埋柠檬牛油龙虾蛋黄酱几满足。
<香煎三文鱼扒>
一向好锺意明太子微辛味道，大厨将Creamy 明太子奶油加埋弹牙鱿鱼圈，做出与别不同嘅意大利菜。
<明太子奶油酱鱿鱼意大利饭>
饮酒唔少得香口炸物，呢个小食拼盘有齐炸春卷、吉列炸鸡、吉列炸虾、薯条4款人气炸物，三五知己饮住酒Share 几过瘾。
<小食拼盘>
最后温提大家「J.moon」好有人气，记得去之前订枱喔！Walk-in 好大机会摸门钉嫁!
J.moon
地址: 旺角西洋菜南街1A-1K号百宝利商业中心4楼10-11号舖
电话: 95455738