一大班好友聚餐，想喺闹市揾间气氛轻松，食物又有水准嘅新店试试？旺角呢间「狮叔」就最啱喇！新店主打新加坡同马来西亚菜，团队特别亲自飞到马来西亚发掘地道特色菜，当中更有曾经喺新加坡任职嘅厨师。能够「神还原」当地风味，同时糅合创意元素，好有惊喜！
「狮叔」主打地道星马菜，加入新元素，以摩登风格重现南洋风味
餐厅名狮叔嚟自星马常用嘅俚语「Shiok」，译做广东话就系「好爽！」「好正！」，放落餐厅就系「好味！」咁解。的确呢度嘅菜式味道正宗又抵食，加上玩味十足又完全唔老土嘅怀旧风格装修，真系「好正！」
神还原星马风味 多款海鲜主食任拣
唔单止菜式有星马 Feel，连菜式名都一齐神还原？好似「叁巴酱炒啦啦」咁，少去马来西亚嘅朋友真系未必知，原来啦啦系当地人对蚬嘅叫法～新鲜饱满嘅蚬肉，加上香辣嘅叁巴酱，无论系送酒定配饭都一流！
叁巴酱炒啦啦
新加坡名菜之一「奶油麦皮虾」亦非常香口，外层嘅麦皮微甜香脆，衬托出虾肉嘅鲜甜弹牙，一试难忘。另一款「叁巴烧鳕鱼」用肉质细嫩、油份适中嘅鳕鱼加上香辣惹味嘅叁巴酱，醒胃之馀酱汁又唔会盖过鱼肉嘅鲜味，层次丰富。
奶油麦皮虾
叁巴烧鳕鱼
传统主食新演绎！IG-able 波波饭
掺掺即系两沟咁解，聪明嘅你应该已经估到，「槟城虾面掺掺」系指面底有齐油面同米粉。虾汤充满虾壳同虾膏嘅鲜味，再加上大虾、鸡蛋同油炸鬼，令口感更多变。而「槟城虾汤泡脆米饭」就用自家熬制虾汤配饭同脆米，既食到汤饭嘅香软，亦有脆米嘅酥脆，无论边种口感都同鲜味十足嘅虾汤好夹！连豆腐卜都吸满虾汤，一试难忘。
槟城虾面掺掺
槟城虾汤泡脆米饭
点解啲饭好似变咗一个个波咁？原来团队考察时，发现马六甲当地流行食乒乓饭，即系将糯米饭捏成兵兵球大细方便进食。餐厅推出嘅「蒜虎虾球饭粒」就将其改良，减少糯米分量，食落无咁腻。配搭大大只嘅爽脆虎虾、金黄蒜粒同自家调配嘅辣酱，令人忍唔住一啖接一啖咁食晒！
蒜虎虾球饭粒
最啱开心Share 香口小食推介
「鸡枣小捲配印尼虾片」当中嘅鸡枣小捲其实系炸鸡肉丸，外层金黄香脆，里面嘅鸡肉口感弹牙，加上印尼虾片更香口。「马来沙爹鸡串烧」嘅鸡肉先以香料醃过，加上师傅手势好，熟度得宜唔会太干，加上花生香气浓郁嘅沙爹酱，充满马来西亚风味！
鸡枣小捲配印尼虾片
马来沙爹鸡串烧
满足埋甜品胃～特色甜点一览
「咖央雪油烤吐司」嘅雪油大家又知唔知系咩？简单啲嚟讲其实就系雪冻嘅牛油，系当地嘅特别叫法。冻冰冰嘅牛油加上烘过嘅吐司再放入口，亦会好似雪咁慢慢融化！咖央酱柔滑香甜，同牛油、吐司简直系铁三角不败组合～
咖央雪油烤吐司
「咖央苹果金宝配冰淇淋」就系经典英式甜品Apple Crumble嘅南洋变奏，唔单止打卡够抢镜，冰凉嘅冰淇淋、暖暖哋嘅金宝，再加上咖央酱嘅椰香同甜味，冷热香甜交织，系饭后甜品之选！
咖央苹果金宝配冰淇淋
色彩缤纷嘅狮叔海报，打造轻松又有活力嘅氛围
狮叔
地址: 旺角奶路臣街17号THE FOREST 1楼110及111号舖
电话: 35861959