韩国料理呢几年喺香港大行其道，所以拣韩国餐厅自然更严格，如果系韩国人主理嘅就更好，可以一试当地传统口味嘛！今次食呢间Bingo & Cook 就系厨师至楼面都系韩国人为主，最重要老板都系韩国人，仲会亲身落场煮，味道更贴近韩国人口味。
一入店映入眼帘嘅系浅色木条，由门口延伸至天花到墙壁，加埋垂吊小灯泡丶可爱小物装饰，系一种温暖小店感觉。呢度嘢食路线唔系花巧路线只畀大家打卡，反而着重食物质素同韩国味道。
开放厨房食得更放心。
米酒生菜包肉&猪脚套餐
讲到最招牌菜嘅，一定系米酒套餐～可以配生菜包肉或猪脚。想试真啲Oppa 老板手势所以拣咗Special Menu 米酒生菜包肉&猪脚套餐，一个价钱食晒2款肉感觉几抵。
一上枱系估唔到咁大份，先讲碗里其实系韩国传统米酒—Makgeoli，无烧酒咁呛口；但又比啤酒香，轻带甜味，亦可以要求Makgeoli 加梳打水试另一种口味。上枱时，侍应会畀埋小碗我哋舀嚟饮，韩国人最锺意用Makgeoli 配生菜包丶猪脚，米香酒香可以引味解腻，三五知己边食边饮几Chill，即刻谂起韩剧中韩国人夜晚去小店饮酒食肉嘅生活画面。
生菜包肉同猪脚系用各种香料丶香草同店家特制调味料一齐煮，唔会太咸可以放心配辣椒丶腌萝卜丝同甜辣酱，佐酒啱啱好。口感方面，猪脚皮煮得弹牙，入口又有种骨胶原化开嘅口感，好锺意韩国人用蔬菜包住嚟食嘅方法，健康啲口感又丰富啲。
韩式无骨烤鸡
香港人最熟悉嘅韩国料理，不得不提必有韩式炸鸡，Bingo & Cook 系用新鲜鸡肉同自家配方，Keep 住炸鸡外皮超脆丶鸡肉Juicy 多汁，今次拣嘅韩式无骨鸡仲洒上花生粒，香口得嚟又有啖啖嫩滑鸡肉。仲有4款酱汁，可以食到几款风味。
牛肉炒粉丝
早於韩风前，牛肉炒粉丝已系我好锺意食嘅韩国传统菜之一。因为韩国人处理牛肉有佢哋独有嘅方法，令牛肉特别软腍同咸中带轻甜，味道层次比较丰富。呢度嘅牛肉同样用特殊酱油腌制，再同蔬菜丶粉丝合炒，Oppa 老板特别介绍呢道系正宗韩国味道。
海鲜葱饼
葱饼都系传统菜之一，呢度嘅葱饼有6款口味拣，五花肉泡菜饼丶烤牛肉韮菜饼丶薯仔煎饼口味等都有。今次我哋就拣咗海鲜葱饼，店家喺控制葱饼嘅松脆丶柔软同湿润度落咗唔少心思，入口脆得嚟又有好多虾肉，内馅几软绵。
韩式炒年糕
好多人对烟烟韧韧嘅韩式炒年糕抗拒唔到，每间餐厅又会演绎出唔同味道，每次都有啲惊喜。呢度嘅炒年糕就用蔬菜丶拉面同辣椒酱煮制，味道辛辣中带甜，口感特别烟韧。食前将年糕沾上多啲汁，咬吓咬吓渗出甜辣味几过瘾。
鱿鱼劲道面
韩国有款超Q弹面叫쫄면，嚟到呢度就名为「劲道面」，系韩国特有嘅面条超软弹有咬口。一般劲道面都做成捞面，今次店家就煮得暖暖的～配埋炸鱿鱼丶芝士丶热汤食又系另一种味道！最吸引系炸鱿鱼超大只，直头要剪开先食到，香炸鱿鱼＋劲道面同样有咬口，好推介锺意QQ口感嘅人！
部队锅
唔少香港人都系部队锅嘅粉丝～所以Oppa 除咗落足料外，仲特别为香港人熬煮靓汤底，以杂菜汤长时间熬煮多款蔬菜丶五花肉煮出精华。最後铺上五花肉丶年糕丶午餐肉丶茄汁豆等配料，无论配料同浓厚汤底都好吸引！
Bingo & Cook
Instagram: https://www.instagram.com/bingo_and_cook/
地址: 铜锣湾骆克道487-489号骆克駅2楼
电话: 24558766