想喺尖沙咀搵个地方饮嘢唔难，但想搵个有Cocktail 饮又有大份量海鲜食嘅地方真系唔多，谂深一层香港本身就好少地方有大盘海鲜食，难得嚟到呢间Poseidon 有Outdoor 位，连海鲜拼盘都有冷丶热两款口味拣，确实有种去到外国嘅感觉。
海鲜拼盘一上枱真系好似唔喺香港咁，中间有大只波士顿龙虾，侧边铺满生蚝丶鲍鱼丶翡翠螺丶鸡尾冻虾丶蓝青口丶蚬，仲有一杯杯加拿大海胆。想食得尽兴啲亦可以再追加波士顿龙虾丶海胆或特级鲟鱼鱼子酱。不过呢度仲有好多其他海鲜菜式，细食嘅话可以留肚试多啲。
正值10月，亦系食法国生蚝嘅季节。海鲜拼盘就用No.2 法国蚝Size 啱啱好，肉质饱和丶海水味浓。拼盘跟埋泰式辣酱丶红酒醋丶鸡尾酒酱，系店家独家调制，微酸轻辣，试吓将海鲜配唔同酱开胃又唔会腻。
生蚝Size 啱啱好，海水味浓。
店家溶雪控制做得好，鲍鱼弹牙得嚟亦唔会冰到无味。
除咗海鲜冷盘，呢度仲有烤龙虾海鲜拼盘，热盘食落系另一种气氛，比较香口惹味。如果形容冷盘为啱情侣浪漫晚餐；咁热盘嘅气氛就好啱一班人热闹咁食～
Poseidon Grill
热盘海鲜有原只波士顿龙虾丶香蕉虾丶扇贝丶鱿鱼丶三文鱼丶蓝青口丶蚬，海鲜类同冷盘有少少唔同，换上更加挂汁嘅鱿鱼丶三文鱼，因为热盘系用猪肉肠丶烤蒜头丶牛油多士丶粟米一齐烤焗，令油香渗入海鲜更惹味。拼盘跟埋肯琼酱丶萝勒青酱，个人比较锺意香蕉虾同青口沾酱，个味丰富啲又Juicy 啲。
惊食唔晒成个海鲜拼盘，但又心思思想食吓龙虾海鲜，叫呢个波士顿龙虾海鲜烩饭都几好。海鲜烩饭唔系得个名，真系铺满蚬丶青口丶虾丶八爪鱼仔等等。龙虾就一分为二，分别用烤海鲜拼盘嘅两个酱—肯琼酱丶萝勒青酱焗，香口得嚟亦Keep 到龙虾味。
饭底系传统西班牙煮法，饭粒比较湿润，令海鲜精华更易融入每啖饭。
除咗大份量海鲜外，呢度仲有几多A La Carte 值得一试，好似呢款烟三文鱼他他就有惊喜。他他由几层组成，分别系最顶嘅金箔丶鲟鱼黑鱼子丶烟三文鱼，去到下层嘅红菜头丶藜麦等，全部都系有独特口感同营养，好建议由上层𢳂到底一次过食晒咁多料，口感味道都好有层次。
意粉方面同样以海鲜为主，并且系西餐比较少见嘅汤意粉，汤底系用马头鱼骨熬制12个钟，鱼味浓郁，夹杂日本灵芝菇丶海胆，令鱼汤更Creamy 同有咬口，食完意粉一定要饮埋。
扒类就有美国顶级肉眼扒配大头虾，10安士肉眼扒切开肉质几粉嫩，咬落亦有肉汁，配埋黑松露酱绝对合格之上。而大头虾出名虾味浓同虾膏多，绝对拍得上龙虾嗰种香浓虾味，肉质亦弹牙，比一般大虾吸引得多。
外国回流嘅大厨想创作更多海鲜为主嘅Fusion 菜，呢道酥炸麒麟马头鱼就系其中之一，唔用西餐常见嘅淡味鱼柳，改用脆口马头鱼几有惊喜。
点解话马头鱼特别脆口，因为佢特点系唔使起鱼鳞，炸後一支支鱼鳞会自然竖起，加埋独家啤酒秘方，鱼皮脆口丶内里鱼肉嫩得嚟有微微酒香，加埋轻酸柠檬牛油汁完全唔腻。
呢度好多菜式都大份量，食饱後用柠檬雪葩清爽吓确实唔错，雪葩连柠檬皮都食得，酸酸甜甜，食完几舒爽。
呢度亦有啤酒丶红白酒，同埋各款独家调配嘅Cocktail 同Mocktail，呢杯Poseidon 就系佢哋Signature Cocktail，梦幻蓝色系由Rum丶Blue Curagao丶菠萝汁同青拧汁调成。
仲有其他Cocktail 拣，唔少选择都几清甜好啱女仔饮。
唔饮酒嘅话都可以拣Mocktail。
Poseidon Restaurant & Bar
地址: 尖沙咀亚士厘道24-38号天星大厦4楼
电话: 25118299