南美洲菜喺香港绝对系冷门菜系，令大家错过咗好多正嘢。其实南美洲菜包括咗秘鲁菜、墨西哥菜等，香料丰富、味道多变都系佢哋嘅形容词。食食吓仲会发现，有啲味真系从来未食过，坚有惊喜。
明明咁有特色，点解香港咁少机会食到？正正因为南美洲菜咁有性格，调味、烹煮都耗时又考手艺。雪藏食材更加免问，食材要够新鲜先煮到。
新鲜食材，每日由欧洲、澳洲、荷兰、日本等地运到。
终于！等到香港有南美洲菜新餐厅喇！新店Amusement Eatery由自小喺委内瑞拉长大嘅Alex掌厨，无论酱汁、醃料都系自家制，够晒地道。自家食谱，坊间真系唔会食到一模一样。
店内好有南美洲奔放玩乐气氛。
设户外座位，好欢迎狗狗嚟。
【招牌】秘鲁特色烧春鸡 外皮焦香，醃味香惹
正如文初所讲，食材质素对南美洲菜系好重要，所以呢度全部食材均由外国新鲜引入。招牌「秘鲁特色烧春鸡」就系用天然香料醃制，再依Alex家乡做法生烤春鸡，利用火力封住肉汁，鸡皮又烧到金黄香脆。
烧春鸡未食已经闻到好香，因为Alex用多种香料如番红花、西芹、萝卜等醃制，沾埋辣酱食好正，嚟梗仲会出个加辣版呀。
天然香料醃制，生烤劲juicy。
【秘鲁菜必食】秘鲁鱼生 酸得过瘾
如果无食过秘鲁鱼生，真系唔算食过秘鲁菜㗎。秘鲁鱼生同我哋食开嘅刺身唔同，系用柠檬生醃「醃熟」，再加辣椒、洋葱、芫荽等调味。Alex最后会火炙鱼肉，令大家食得放心㗎。
今次鱼生系日本刺身级平目鱼，嚟梗会有吞拿鱼。一入口第一吓好酸，但系酸得过瘾醒神～鱼肉好爽弹鲜甜，边咬边渗出香料辛辣味，估唔到一片鱼生有咁大味蕾冲撃。
秘鲁鱼生上有一片印尼香薯，天然硬脆香甜可清新味蕾。
【CP值劲高】加勒比海拼盘
全部海鲜、肉品都系由欧洲、澳洲、日本引入，简单烤熟已经劲juicy惹味。所以呢个拼盘真系必食，只系$598就有牛里脊肉、烤鸡、刺身级大虾、刺身级带子、鱿鱼、澳洲青口，2-3个人share都好够。
南美洲当地人会将全部食材、酱汁、柠檬汁捞匀，随手拎咩食咩，饮住啤酒倾计好chill。
个人最钟意大虾同鱿鱼，劲鲜甜～一食就知系新鲜嘢。
【即开各国生蠔】一试新兴杜拜生蠔
呢度按时令于世界各地引入生蠔，平时有日本、法国生蠔等，估唔到今次食到近年新兴嘅杜拜生蠔。口感爽脆、矿物味重，加埋自家用西芹、香草调煮嘅酱汁，轻酸辣中和矿物味啱啱好。
店家特意引入新兴杜拜生蠔，想畀大家试吓新嘢。
【自家制】手工薄饼 & 意粉
手工薄饼、意粉面团用鸡蛋、高质面粉搓成，新鲜出炉特别有蛋香。
双重辣肉肠手工披萨。饼底特别轻韧有咬口。
即刨新鲜松露杂菌手工阔条面。今夏用法国松露，无咁重煤气味，意粉弹牙挂汁。
【小食sharing】
蟹肉奶油乾酪炸云吞
炸云吞好爆馅，一咬开就有好creamy嘅奶油乾酪。
墨西哥粟米片 真系用新鲜粟米整！
南美洲系以粟米为主粮，所以你会发现好多料理都有粟米出现。相信好多人都钟意食墨西哥粟米片，但坊间多数都系用现货。呢度就用新鲜粟米全手工制，健康又有种独特谷物香。
用黑色同黄色粟米，全天然人手制。
【南美特色甜品】乾酪蛋糕都有粟米！
虽然话粟米系当地主粮，但点谂过连甜品都可以加粟米。呢道传统甜品—粟米乾酪蛋糕，真系食到粒粒欧洲粟米。
传统做法比较腍身，Alex稍作改良变得更紮实有口感。乾酪蛋糕唔会太甜，馀韵有种轻咸乾酪味，同粟米都几夹。
Amusement Eatery
地址: 长沙湾福荣街538号喜遇地下2号舖
电话: 26666019
