去过东京大阪等地的钓鱼居酒屋，一定觉得好玩又难忘，而想喺香港边钓鱼丶边食嘢嘅居酒屋，一定系谂起呢间位於观塘全港首创钓鱼船的「钓鱼船屋」。可以坐喺入面用餐嘅大船已经好抢眼，仲有两个大鱼池钓鱼，真系几有气氛同噱头，唔驶去日本都有得边玩边食啦! 但唔好以为佢哋只系卖噱头，原来刺身丶热食全部都有水准，今次先唔讲钓鱼，睇吓佢哋有咩食先。
好大个鱼池，畀鱼游水同养海鲜。
鱼池有专人打理，确保鱼种新鲜乾净。
仲有几间VIP房用餐，私隐度高。
钓鱼船屋刺身盛(竹)
刺身款式够多，大热嘅挪威三文鱼丶日本三重县吞拿鱼丶海胆都有。全部都系新鲜来货，鲜味清甜亦唔会有雪藏味，食都食得放心。
海胆松叶蟹肉面豉甲罗烧
将鹌鹑蛋倒入蟹盖中，捞匀海胆丶松叶蟹肉同蟹籽已经闻到好香。海胆份量够多够浓，蟹肉相对清爽啲，另外都可以配面包食解解腻。
海鲜杂锦寿喜烧
海鲜寿喜烧份量比想像中大，海鲜类好丰富，日本蚝丶文甲鱿鱼丶帆立贝等等都有。清甜嘅寿喜烧汤底配海鲜就啱晒，唔会抢走海鲜鲜味，仲有提鲜效果。编辑觉得日本蚝最正，轻轻煮几分钟即食，保持到肉质肥美，咬开仲好Juicy。
蒜蓉片海胆炒饭
大厨将珍珠米炒至乾湿适中，再加入海胆粒炒香。所以口感有珍珠米嘅烟韧，又有粒粒海胆嘅软绵。
A4和牛马粪海胆名物卷
和牛同海胆呢个配搭真系无得输，而且卷物上仲有鱼子酱点缀。入口先系一粒粒爆开嘅鱼子同埋海胆嘅海水味。和牛味反而唔算好浓，而系食佢嘅软绵口感，大厨成功将几种矜贵食材加埋一齐，味道恰到好处。
清酒煮蚬
沙白蚬比一般蚬肉肥美丶爽口啲，唔会煮完缩得太细而无咩肉食。清酒汤底煮得清澈，加上日本大葱点缀，隐约酒味又带点清甜，食蚬之馀都忍唔住饮咗几啖汤。
海胆天妇罗卷
紫菜入面全部都系加拿大海胆，用料都几贵㗎，难怪坊间比较少食到海胆天妇罗卷。紫菜炸得脆口，海胆软嫩之馀，又会咬到少少一粒粒海胆，外脆内软嘅口感几丰富。
滨烧海鲜盛(2人前)
可能因为店家有大大个鱼池养住海鲜，所以烧完嘅贝壳类都唔会好乾，反而好有海水咸香。新鲜鲍鱼超大只，入口弹牙好食系预料之内；而北寄贝都好有惊喜，爽口又多汁。同场仲有生蚝丶沙白蚬丶马刀贝同日本元贝。
钓鱼船屋烧物拼盘
串烧拼盘有盐烧手羽丶免治鸡肉棒丶盐烧赤鸡肾丶日本青椒仔丶烟肉车厘茄丶鹌鹑蛋丶鸡皮同鸡软骨。
呢度有鱼钓又坐得舒服，其实好啱一家大细嚟，如果小朋友同老人家唔惯食生冷嘢，呢度嘅串烧都好推介。自问有选择困难症嘅话，就可以点呢个「钓鱼船屋烧物拼盘」，店家话呢个拼盘集齐晒最受欢迎嘅串烧喇！编辑自己就最锺意鸡翼丶鸡皮串烧，真系烧得好脆丶好香口。
菠萝雪葩
日本直送嘅菠萝雪葩用菠萝肉打成，味道微酸清甜，好啱饭後消滞。仲要系原个菠萝上，小朋友见到一定好开心。
钓鱼船屋
地址: 观塘骏业街56号中海日升中心2楼H室
电话: 36188260