北京樓 (星光行)

不少人對文化遺產的意識日漸提升，唔知大家有冇留意到，原來美心集團旗下的北京樓已經有40年歷史了，可算是品牌遺產嗎？一個品牌可以多年不倒，實在令我心生好奇，知道星光行的旗艦店剛剛完成了大裝修，並且推出全新菜餚，為食小隊這夜慕名而至。 其實從小至大都已經去過北京樓數次，最有印象的自然是招牌北京填鴨，一鴨三吃，除了片皮鴨之外，我十分喜歡惹味的生菜鴨鬆及香噴噴的鴨架湯。 此外，師傅即場示範製作北京拉面的畫面，同樣非常深刻，想不到在煥然一新的時尚新裝中，保留了這兩點特式，現在有開放式廚房，客人隨時都可以欣賞片皮鴨的手藝，而每晚八點半亦有拉麵工藝表演。 我唔記得從前的裝修是怎樣，現在就有古今合一的味道，但認得這幅名畫＂春回大地＂，據說從開業一直伴隨至今，蘇綉專家之作，細緻精工，縱使如我般沒有藝術細胞之人仕，也許亦會停留一會兒欣賞。 厚實的餐牌圖文並茂，據說多款招牌只限定這間旗艦店供應，既然如此，理所當然挑選最特色的。揚州龍青瓜 $88 一看便知，這道菜主要吃其刀工及外型，仿如盤龍的造型令人嘆為觀止，多得大廚的巧手！ 用上柚子青檸醬汁，配搭新鮮青瓜，清新爽口，非常稱職的開胃前菜。 麻醬雞絲撈起 $108 新年快到先來撈起，七彩繽紛的伴菜，青瓜絲、椰菜絲、蘿蔔絲、雞絲及粉皮的配搭，畫龍點睛在麻醬，調得非常美味出色！ 東海龍皇 $780 嚐新過後隨即回味不一樣經典，東海龍皇是40年前北京樓的經典菜色，今次被全新演繹。 栩栩如生的橙龍，以新鮮材料畫出龍形，大蝦、螺片及帶子以魚香醬炒香，鮮嫩美味，好一道既有氣派亦寓意中國文化的菜式，尤其款待外籍人士非常適宜。 富貴雞 $580 再一道另類演繹的菜式，果然極富創意。看來似石化了的富貴雞，別樹一格。 外層以麵粉刻意雕琢成精巧雞型上桌，咁嘅賣相已搶盡風頭！堂前弄作時更會淋上玫瑰露，打造火焰富貴雞的效果。 不止於此，再配以金槌扑開品嚐，玩味十足，心思創意！ 富貴雞內裡以荷葉包裹釀有鮑絲、螺片、冬菇等食材的黃油雞，滋味多汁，不過雞胸位難免有點點乾嚡！ 預訂這道佳餚的客人更可獲贈趣緻的小金槌及相片作留念，真窩心！ 糖醋桂花魚 $298 如此有動感的糖醋桂花魚，成功增加食慾，酥脆甘香、內心肉滑的魚塊，配合糖與醋混合成小芡的甜酸汁醬，醒胃可口。 烤北京填鴨 $480/只 鎮店菜式確實有水準，皮脆肉嫩，鴨味濃郁，配以海鮮醬、青瓜、京蔥及麼麼皮是不敗的配搭。 值得讚賞，每片麼麼皮皆以紙隔著，不會黏在一起，而且夠熱、又薄又香。 東坡肉 $158 東坡肉亦來個不平凡的出場，以古雅器皿盛裝，配上渺渺輕煙的效果，不只相機出動，影片更要先吃，肥而不膩頗滋味。 炒田園菜 $118 簡單的炒過個田園菜平衡飲食，全是爽脆的配搭，蓮藕片特別出色。 北京炒拉麵 $118 主食方面，基本的北京炒拉麵，簡單已經足夠。 荸薺餅 $72 (一客六件) 新鮮出爐的荸薺餅，口感煙韌，出奇制勝在於馬蹄做的酸味餡料，大減膩感，我唔客氣喇，多吃了一粒。 本身出場的造型亦精緻，留心注意，是個彷如鳥巢的設計。 青蘋果酥 $45 (一客三件) 以青蘋果入饌有新意亦配合，更造成精巧的小蘋果形狀，賞心悅目。 青蘋果蓉配搭上層層鬆化的千層酥，清新怡人而不膩，必選的飯後甜點。配合市場，現在除了有舒適寬敞的大廳外，五間私人貴賓房皆富不同風格。田園、紳士、淑女等各有特色，配合玻璃窗外的聖誕夜景相伴，充滿中西糅合之感。 時近聖誕兼且因利成便，飯後前往觀賞 Ocean Terminal 的聖誕燈飾，今年特別有燈影技巧，值得排隊入場感受。 刻意乘船返香港，維港夜景美極了！…查看更多

「北京樓」真喺好耐無幫襯過，睇番自己嘅記錄，對上一次光顧已經喺2015年6月嘅事，當時就喺大佬東搵小弟食晏，先到訪過中環歷山大廈嘅分店。今晚老友相約嘅飯局，選址尖沙咀星光行店，原來，呢間店已經有40年歷史。40年唔喺一段短時間，怪不得要隆重其事啦，睇樓下嘅廣告牌「京菜傳承40載、締造美饌傳奇」，單喺睇見廣告上呢一道「東海龍皇」，已感覺到唔簡單。上到酒樓，唔知喺咪新裝修過嚟，感覺新簇。近玄關位，一大幅巨形刺繡，名為「春回大地」，估計都喺大有來頭，手工極為細緻。入到大廳，地方非常之大，裝潢摩登而典雅，一邊對住天星碼頭、維港方向。而且，啲櫈非常舒服好坐。另一邊應該喺啲廂房，照方向計就對住1881海利公館嗰邊，果然，路經其中一個廂房時，趁無人又打開咗房門，快攝一張。感覺勁有田園氣息，非常特別！去洗手間時，路過啲通道走廊，牆上掛有石雕，非常別緻。而成晚嘅服務都非常熨貼到位，讓人食得稱心。雖然話傳承，但都會有側創新一面，跟隨潮流，都創作啲「茉綠泡泡系列」，共有4款選擇，配搭都幾清新。葡萄柚．荔枝泡泡 $34造型好西化，又帶有台式風格，唔講仲以為喺杯雞尾酒，其實只喺杯茶飲，總之賣相就好吸晴。茶底嘅茉莉幾清香，加入西柚汁，味道唔錯。揚州龍青瓜 $88相信手拍青瓜大家都食得多，但將一條青瓜，喺一條青瓜原條無斷開，而切成一片片，再盤成龍形，淨喺食咁巧手嘅「刀工」已值回票價啦。待客人影完相，侍應會幫手剪成小件，青瓜本身已經好爽脆，再淋上柚子青檸汁，極為清新，為今餐晚飯有個「新鮮」嘅開始。麻醬雞絲撈起 $108源自星洲嘅「撈起」呢度菜式唔使多介紹，一到過年前後就有唔少餐廳供應，好意頭嘛，撈到風生水起，美心嘅中菜系餐廳亦都大搞。將平常嘅雞絲粉皮搖身一變為「撈起」版，有心思喎！將雞絲、粉皮，仲有紫椰菜絲、青瓜絲、蘿蔔絲，加上濃香嘅芝麻醬，風味大不同，綿滑嘅雞絲增添咗爽口感，既香濃，卻又清新。東海龍皇 $780（需預訂）唔喺友人講，真喺唔知「東海龍皇」喺北京樓40年前嘅經典菜色，雕條龍不知幾多手工，雕得栩栩如生，賣相絕對喺可以先聲奪人。雖然話喺經典，但亦喺全新演繹登場，食材比以前用料更精、更鮮，以魚香醬炒大蝦球、鮮帶子、螺片，香辣惹味唔在講，啲料真喺精，大蝦球爽彈到不得了，帶子就好鮮甜，螺片柔中帶點點咬口嘅韌勁，傳3樣食材都盡顯本性，此外，都唔好錯過唧晒花嘅薯蓉，好軟滑架。糖醋桂花魚 $298型喎！甚有晌日本餐廳食原條喜之次魚生咁，單喺要炸出咁嘅形態，相信師傅都花過一番心機，仲有，如果有留意到，佢哋每道菜所用嘅碟都喺好精美。講番條魚，絕對喺使到外脆內嫩，魚肉好鮮嫩，外皮酥脆甘香，配以糖醋勾起個酸甜醬汁，份外好食。北京菜好多人第一時間諗到嘅就喺北京填鴨，「北京樓」嘅填鴨頗有名氣，尤其星光行呢間店喺做唔少遊客生意，當晚目測亦見唔少外國客。所以，店家晌近門口處，特設一個開放式廚房，專切填鴨，睇住幾個師傅不停做，真喺難以想像一晚會賣出幾多隻。題外話，依家仲喺好多人將北京填鴨同片皮鴨混為一談，前者喺皮連肉，後者顧名思義就喺淨皮，就正如啲人仲喺分唔清生炒骨同咕嚕肉嘅分別。烤北京填鴨 $460（全份） / $240（半份）既為鎮店菜式，水準唔需要點擔心，的確，鴨肉烤得香，可能嚴選鴨種，油脂都相對少，幾片鴨肉，加上青瓜條、京蔥、海鮮醬，嗰份美味確喺微妙。順帶一提，青瓜條及京蔥切出嚟嘅長短、大細都完全喺孖生兄弟咁，足見師傅嘅認真同專注。晌出面欣賞師傅片鴨嘅時間，已留意到其身後剩低好多鴨殼，所以，想二食可以考慮「鴨架湯」或「炒鴨崧」。東坡肉 $158晌昔日，喺完全無膽固醇憂慮呢個問題嘅，但依家人人都講健康，元蹄、東坡肉呢類肥膩嘢都少接觸。難得今晚大家都話膽固醇萬歲，小弟咁瘦底就更喺無有怕啦。「東坡肉」以一個古雅金鼎上枱，夠晒氣派。雖然，預期會肥肥哋，但真喺估唔到喺肥而不膩，師傅將層次分明嘅五花腩逼出油份，所以，入口既鬆化，又一啲都唔肥，加上味濃，好有驚喜。食到8:30pm，突出一陣起哄聲，原來每晚都會有大廚粉墨登場，即席表演製作北京拉麵，點樣三五吓手勢就將麵糰搓揉、拉延、折疊出細長的麵條。由於麵條晌中國有長壽嘅象徵，因此拉得越長，寓意健康越好，所以，師傅嘅表演絕無迤做，而呢樣就最吸引到啲外國客。最可惜喺是夜臨時有點事而早走，未能跟大家盡慶。新面貌嘅「北京樓」將傳統經典揉合創新意念，令傳統及摩登共冶一爐。用料貫徹精益求精，但重新包裝後令賣相更精緻、吸晴，一定為客人帶嚟驚喜，相信成績會更上一層樓。…查看更多

朋友選了在北京樓吃生日飯，尖沙咀的北京樓吃過多次，水準仍是OK的。:)前菜點了雞絲粉皮，不過不失沒甚驚喜。雜菌鍋巴很清新，即使不伴以鍋巴淨喝雜菌湯也很鮮甜。糖醋桂花魚是用黑醋煮的，有別於平時慣吃橙橙紅紅那種，這道菜是當晚大家最喜歡的，甜酸味道開胃又不嗆喉，好吃。每次必點的拔絲香蕉，香甜的香蕉配以脆脆的糖面，完美的句號…查看更多