星記海鮮飯店 (一號廣場)

一早已經訂左位，因為得知佢嘅炸子雞需要提前預訂，未夠7點入座，已經差唔多滿座，睇嚟米芝蓮呢個牌頭係幾有影響力。除左炸子雞，我地仲叫左個例湯，例湯每日都會唔同款，即使例湯佢湯料都好足，另外仲有燉湯但都係要提前預訂，仲叫左聖子皇，頭抽煎焗大虎蝦，三蔬銀芽煎脆米，馳名鳳梨生炒骨，豆腐煲。炸子雞係真係名不虛傳，皮脆肉嫩，呢個值得預訂，而聖子皇都係當晚比較印象深刻嘅餐點，大蝦亦都煎得好入味。餐廳職員仲好熱情同埋好快手幫我地換碟執枱，值得一讚。…查看更多

幾位朋友相約午飯揀咗星記。朋友力推之前試過嘅椒鹽鮮魷，我就揀咗馳名嘅生炒骨同藕餅，最後點個清清地嘅蒸水蛋撈飯。等餸期間上咗個例湯紅蘿蔔豬骨湯，無乜味精味合格。魷魚新鮮炸起，全部魚身無魷魚鬚，配喼汁脆中帶稔有驚喜。生炒骨酸甜味道平衡，排骨唔會好肥食到一口炸粉咁，水準保持得好好。藕餅反而有少少跌watt，以前蓮藕比例多d咬落去脆脆地沙沙聲，今次魚肉比例多咗無乜𡁻頭太稔。而且鯪魚肉味道有d重會覺得腥腥地，但鍾意食鯪魚肉嘅朋友就話正。水蛋剛剛好，有蛋味，配料肉碎又唔會好鹹。最後仲送雪耳桃膠糖水，好滋潤~!…查看更多

今日三個人訂好枱，嚟米芝連飯館食飯，1點幾外面落住毛毛雨，上到嚟見到有好多枱未有人坐，侍應安排我地坐偏一偏嘅位置，冷氣抽風不良，好焗呀。點咗午市套餐4+2，即係有4樣餸選兩樣，冇影菜牌。點咗蒸雞同臘腸炒芥蘭。另外兩樣係一個炒飯，一個菜。套餐包一碗例湯，涼瓜炆斑頭腩，生炒骨，糖水。講食物喇，例湯好有水準，但係得一碗仔真係對於我呢啲水怪係到喉唔到肺。接住好快上蒸雞，乜上得咁快啊，蒸定好架。雞好香好滑，配埋個汁撈飯真係好味道。再好快上生炒骨，暖嘅。酸酸甜甜骨肉分離好味道。之後到臘腸炒芥蘭，都有少少煙出嘅。芥蘭唔老臘腸夠香。斑頭腩好出色，濃濃嘅芡汁包住魚魚，骨頭都啜到乾乾淨淨，涼瓜爽脆。最後係紅豆沙，有陳皮嘅香，紅豆起沙，但係我唔鍾意食糖水，所以食咗少少。埋單走嘅時候返到出大廳，得番兩三台客，係咁點解要安排我地坐到去咁偏呢。…查看更多