大公雞

自從無喺葵興返工已經無再踏足KCC🙃 今日黎到大公雞🐓一定要食返佢嘅 士林半筋半腩麵 ，係我見過最足料嘅牛肉麵，不得不說牛腩同牛筋都非常出色，牛腩軟腍又入味，煮得啱啱好，唔會過熟。牛筋好似啫喱質地，非常滑溜。麵條就煮得淋左少少。西門町鹽酥雞扒小腸飯 賣相一般，味道方面，鹽酥雞稍為遜色少少🤏肉鬆手抓餅（兩件）熱辣辣嘅手抓餅上面加左肉鬆同沙律醬，估唔到入口更香，配上鹹香嘅肉鬆都幾夾！肉燥西生菜🥬 爽脆清甜嘅生菜淋上肉燥汁特別惹味！飲品方面都有唔少選擇，今次試左金桔檸檬🍋 酸酸甜甜啱曬夏天珍珠奶茶🧋都係咁大杯😍…Read More

香港地做飲食真係好難！只做一方美食？市場太窄。做多國美食？又同茶餐廳差唔多，好難令人眼前一亮。今次幫襯嘅大公雞就係咁樣，店員响門口叫賣：「正宗台灣料理、又有馬來咖哩、仲有港式奶茶。」感覺好難定位，但行到門口都試下啦！😅其實打開餐牌，大部份都係台灣料理。今日點咗手工菜肉餛飩、炸大腸、紅燒牛肉麵、肉燥雞扒飯、珍珠奶茶、奶蓋朱古力。埋單免加一 （$237）唔算貴喎！炸大腸（$42）唔知係咪台灣料理，對我而言係香港懷舊菜。豬腸切成長條形，每條都炸到脆卜卜，外脆內嫰。而且裡面啲肥膏刮走晒，一啲都唔油膩，配酸酸地嘅菠蘿，愈食愈想食。手工菜肉餛飩（$45）手工餛飩粒粒飽滿，餛飩皮偏厚，好有飽腹感，係我鍾意嘅餛飩口味。湯底係牛肉湯，同牛肉麵撞咗。紅燒牛肉麵（$60）以前去台灣食牛肉麵，分兩派 - 紅燒，清燉。清燉似我哋嘅蘿白腩，口感清爽。紅燒味道偏辣。但近期食過兩次紅燒牛肉麵都係唔辣嘅，令我有少少懷疑「紅燒」嘅定義。講返大公雞嘅紅燒牛肉麵，佢都係唔辣嘅，湯底偏甜口要自己加辣，有少少藥材味。嚿紅蘿蔔超大嚿，有幾片鹵水牛展，炆得好入味，麵係扁麵，爽口彈牙，而且佢嘅份量幾足，一般男士都夠飽。肉燥雞扒飯（$60）肉燥偏甜口，餸飯一流。雞扒好厚，煎得外脆內嫰，肉汁爆棚。肉與肉嘅配搭再加隻鹵水蛋，唔係餓底都頂唔住。珍珠奶茶（$15）珍珠奶茶係粉開嘅，所以好一般，口味廉價，下次叫返港式奶茶好過。奶蓋朱古力（$15）朱古力味超濃，加咗奶蓋嘅口感幾滑，但好飽肚吓！唉～早知就叫佢啦！撇除佢係主打台灣料理，唔好理佢正唔正宗，以全新食肆體驗，大公雞其實真係唔錯！…Read More

今日和太太往葵興KCC 逛街, 中午我們往大公雞食台灣菜, 我們點了鹽酥雞鹵肉飯套餐配花枝丸和珍珠奶茶, 台南鹵肉飯、胡麻醬A菜、台北生煎包、士林蚵仔煎和桂圓紅棗茶。鹽酥雞鹵肉飯鹽酥雞食落熱辣辣, 食落香脆, 雞肉肉質鮮嫩, 十分惹味, 鹵肉飯食落有油花, 鹵肉肥而不膩, 飯食落軟綿, 足料美味的鹽酥雞鹵肉飯套餐；花枝丸食落味道彈牙乾身, 口感十足；珍珠奶茶茶味香濃, 珍珠甜度十足, 奶味香滑；台南鹵肉飯肉味香甜, 菜圃食落開胃, 飯味香滑；胡麻醬A菜菜食落新鮮爽口, 胡麻醬食落開胃；台北生煎包桌時熱辣辣, 台北生煎包餡食落香甜, 面包食落爽口；士林蚵仔煎醬汁辣度適中, 蛋煎得金香, 蚵仔食落新鮮彈牙, 口感醒胃；最後桂圓紅棗茶甜度適中, 桂圓紅棗食落開胃, 飲落清甜消暑。餐廳食物美味,座位舒適, 所有碗碟都有雞公碟, 好得意, 價錢合理, 食了一頓高質美味台灣菜。…Read More

個多兩個月前，原本喺去KCC朋友推介嘅日本餐廳，但原來星期六晚好多餐廳都唔開，偶然間就過咗去Life@KCC，反而有幾家餐廳有營業，可以講喺KCC嘅附屬商場。當晚就試咗「康奇拉沙」（U Favorite），並發覺隔離有間台灣菜小店「大公雞」，是晚就喺晌度食晚飯。「大公雞」跟同層其他餐廳唔同，比較「入鋪」，所以，咪睇佢門面細細，裡面其實環境幾大，目測估計都有超過50個位。裝修簡約，地方企理，一邊有落地大玻璃對住街景，雖然喺馬路景，但感覺會更開揚。餐廳點解叫「大公雞」？晌門口旁嘅大海報就正正有介紹名字由來（照抄如下）：位於嘉義縣六腳鄉永賢村，每天清晨，伴隨着明亮的公雞蹄叫聲中，有一位留着鬍鬚，身型壯碩的大廚，天天於村裡食店埋頭苦幹，預備著新鮮牛骨及蔬果，動輒花上10多個小時去熬製湯底。這一碗牛肉麵，湯底味道甘濃鮮香，牛肉入味腍滑，麵條滑溜入味。由於味道奇佳，口碑載道，當地村民稱這碗麵為「大公雞牛肉麵」。除牛肉麵喺其招牌，另一邊嘅黑板仔又寫咗3款廚師推介。如果本身無乜心水，大可以從呢啲推介諗諗。至於主餐牌，攤開去，兩大版睇晒，分別有台式撈麵、寶島香飯、手工湯麵、士林夜市小吃及多種台風特飲，定價普遍都唔貴，又無加一。枱上已放咗點菜紙，自己剔完交俾侍應就可以喇。不過，同時留意到點菜紙上，仲印有午餐及下茶，但下午茶部份就被刪除咗，相信已經無再供應，只喺午餐本身嘅供應時間喺11:00am-6:00pm，都橫跨埋下午茶時段。餐具、紙巾、牙簽採用茶記「機關」，全部放晒晌枱下櫃桶，拉開就見乜都有，自己拎好過麻煩啲侍應。台南拼盤 $62想試佢啲台式滷水，叫一客台南拼盤就最好不過，因為一份有齊牛腩、大腸、牛筋、牛肚、滷蛋，仲有滷豆腐。細份賣$62，大份賣$82，我哋點份細嘅，覺得已好夠3-4人食。由於叫咗碗紅燒牛肉麵，所以，牛腩等陣先講，依家，就分享其他滷水嘢先。大腸跟港式嘅豬大腸好唔同，啲大腸刮晒啲肥膏，而且，洗得非常乾淨，食落一啲都唔覺肥，亦完全無豬臊味。牛筋正，啲牛筋炆到又軟又腍，咬落去有種啜口感，骨膠原爆發嘅感覺，最難得喺夠晒入味，嗒得出滷水嘅醇香。牛肚幾款滷水都有個特點，就喺十裁得比較大件，唔會碎濕濕，牛肚都一樣，口感柔軟得嚟帶少少爽口感。講開啲滷水，每款下面都墊有少少白蘿蔔，清甜無渣。滷蛋眾多滷水中，比較無咩特別，叫做正常無大問題，叫交到功課。滷豆腐老婆就好欣賞，因為，確喺好有豆香，口感實淨有咬口，同樣，食落好有滷水香。台北生煎包 $32一客3隻生煎包，隻隻外形包得一致，又漲卜卜。煎得個包底好脆口，而包身好軟熟，咬落唔黏牙，不過，個人略嫌包心嘅肉餡偏少。台灣紅燒牛肉麵 $62手工湯麵有4款：紅燒牛肉、紅燒牛肚、紅燒牛筋及雜錦紅燒，即喺有齊咁多款式。其實，我哋點一客滷水拼盤已試齊咁多樣嘢。肉燥、魯肉一類老婆嫌太油太膩，蚵仔麵線佢又麻麻，都有諗過嗌台式撈麵，最後，都喺決定點番手工湯麵，純粹睇吓佢個湯底喺點。好彩點咗紅燒牛肉麵，因為真心抵食。個湯底香濃而有肉香，飲咗大半碗都為口渴嘅問題；麵條採用粗身嘅關廟麵，耐浸具咬口，而且，份量十足；至於啲牛腩肉，炆到極之鬆化，一咬就扯出絲絲牛肉，亳不費勁，都喺同一句，夠晒入味，肉香中滲出醇厚嘅滷水香，更難得牛腩嘅份量比預期多，喺誠意之作，抵食。珍珠奶茶 $22台式飲品一向都頗有特色，如加入珍珠呀、仙草呀、奶蓋呀……等等，不過，今次就還原基調，飲番吓珍珠奶茶，因為都耐無飲，一過口癮而已。奶茶做出基本水準，茶底都幾香，入口都幾醇和，珍珠口感亦具煙韌，最欣賞喺唔會落到半杯都喺冰嘛。百香果綠茶 $20老婆就揀熱飲，佢一向都幾鍾意熱情果份酸甜果香，估唔到配上綠茶嘅「百香果綠茶」真喺幾好飲喎，嗰陣果香幾清脫，酸酸甜甜。事後我哋都有問喺唔喺以新鮮熱情果沖，回覆雖然話唔喺，而喺用上台灣產嘅果膠，再問會唔會問香港有得買，可惜喺原產地直送，佢哋都唔知。否則，買嚟秋冬天沖茶飲，感覺一流。上次都總結過，呢個商場一到星期六、日都幾鬼靜，小店生意一向唔易做，希望憑其質素，撐得住，如果呢個場做得起，「大公雞」應該都算喺開國功臣之一啦。…Read More

葵涌呢個地方，自己真係好少黎，因為始終呢區都好似無乜特別大既商場，或者，可以話係無特別大既誘因去吸引我過黎，說起呢個區，頂盡我都只會諗起葵芳既新都會廣場。要不是朋友在這附近開佐間workshop，要不是朋友介紹有好野食，我都可能真係會錯過佐呢間滿有特式既台灣餐廳。呢間餐廳位於葵涌既Life KCC 商場，係一個新開既商場。呢間台灣餐廳命名為「大公雞」，個名都真係幾特別，原來喺背後，係有一個故事。「位於嘉義縣六腳鄉永賢村，每天清晨，伴隨著明亮的公雞蹄叫聲中，有一位留著鬍鬚，身型壯碩的大廚，天天於村裡食店埋頭苦幹，預備著新鮮牛骨及蔬果，花上10多個小時去熬製湯底。這一碗牛肉麵，湯底味道甘濃鮮香，牛肉入味腍滑，麵條滑溜入味。由於味道奇佳，口碑載道，當地村民稱這碗麵為大公雞牛肉麵。」步入餐廳，環境光猛，窗可以外望，雖然只係橋景，但係感覺開揚，值得加分。設有皮座卡位，座位舒適。餐牌既食物選擇都幾多，而且價錢唔貴，備有午市及下午茶套餐，不過就只限星期一至星期五，假有就只可以散叫啦。台式古早肉燥飯 $38台灣食品既 signature 之一，肉燥飯，當然要一試。肉燥份量好足，滿滿舖滿一整碗，而肉燥帶有濕潤感，用黎伴飯真係岩岩好。白飯用上珍珠米，每一粒米都好完整好圓渾，食落帶點甜甜既米香。旁邊伴上兩條菜，簡簡單單就是平時台灣人的一頓午餐。雜錦紅燒手工麵 $68牛肉麵有4款，分別係(1) 紅燒牛肉，(2) 紅燒牛肚，(3) 紅燒牛筋，和(4) 雜錦麵，心多多既我一直都好糾結，到底吃多一點牛肉，還是吃多一點唔同既配料? 最後我選了後者。雜錦麵裡面有齊牛肚，牛筋，牛腩，和大腸，一次過滿足4個願望。呢碗雜錦麵好大碗，碗係好厚身既一款，把捧著，令人很有滿足感。 湯底係比較清既一種，有牛骨香味，帶點甜香，但係假如再帶一點辣度會更好。手工麵條都幾厚身，食落有口感，唔係好有彈性既一種，而係食落去，會有少少漿口，夾落去，會有少少重手既一款。呢度既牛腩，肉同膏大約係7:3之比，肉煮得好淋身，牛味都好濃，既有質感，又夠入味。台灣小香腸 (香蒜味) $32呢度既小香腸，唔係細細條，脹卜卜既那一種，而係比較大條，再切片既一款。食落香香甜甜，唔算太油身，我個人覺得油份控制係得宜既，而香腸既皮亦有帶香脆感，好好味。士林蚵仔煎 $38呢度既蚵仔煎做得十分正宗，蛋漿係七分熟既狀態，蛋味夠濃又唔會太實，而粉漿亦唔會落得太多，無濕濕稠稠的感覺。蚵仔唔可以用「仔」去形容，因為其實每一隻都好大隻，好飽滿，食落帶鮮甜感。惟獨美中不是既係夾起既時候比較容易散開，而將佢地一粒一粒夾番埋再拼埋一齊才入口。夏季風味新鮮水果茶 $29近年台灣興起水果茶，餐廳也來湊一下這個熱潮。水果係用新鮮既，而且份量都好多，基本上成杯都滿滿的，而且因為係無蓋既設計，飲完茶可以食埋水果，唔會浪費。茶底唔算係好濃，不過係好香既，而且甜度得宜，唔會「死甜」，飲完唔會令人「更口渴」已值得一讚。珍珠奶茶 $22作為台食既signature - 珍珠奶茶，一場來到，我也當然要一試。茶底好夠濃，冰亦都落得唔多，唔會過於稀釋那份茶香，粉圓有Q彈口感，但個人覺得佢既質地硬佐少少，如果煮得淋身一點，會更好一點。香港真不愧係美食天堂，萬估唔到，去到葵涌呢個工廠區都有高質素既美食，所以幾時都話，喺香港搵食，真係唔需要重覆咖，除非真係好好味啦！而呢間台灣餐廳，係絕對值得我再訪既，說它為工廠區爭一口氣，實在最貼切。…Read More