我好鍾意飲奶茶，一直都想搵有咩茶餐廳嘅奶茶係好飲，以前會好鍾意金鳳，因為食咗10幾年，而且佢係奶味比較突出嘅奶茶，呢間係茶味比較突出，喺成年前已經試一次，今次特登再試都冇退步，甚至有奶茶關注組都有推介過，為嘅就係一杯瓦煲奶茶。 北記係一間係觀塘牛頭角街市熟食中心既餐廳，熟食中心係上世紀八十年代建成，而北記係1968年就開業，最初係牛頭角下邨8 座樓梯口擺檔，之後先搬入去熟食中心。餐廳由擺檔開始已經係用瓦煲沖茶，由店主跟爸爸幫手個時已經用緊。瓦煲而家係買少見少，因為佢唔耐用，一個瓦煲可能用一兩年就要換，所以好多茶檔都嫌麻煩，用不鏽鋼嘅黎沖。不過瓦煲保溫效果好，傳熱同埋散熱比較慢，所以冇咁易沖茶沖到過火，所以沖出嚟嘅奶茶唔止無苦澀，而且仲有好香濃嘅香味，入口溫潤但唔會搶風頭，老人家飲都唔會覺得好濃。店主話好多老人家日日黎飲，最老嗰個有90歲，所以店主堅持平民價錢但品質不減，對得起日日幫襯嘅街坊。老人家鍾意飲茶走，即係用煉奶而唔係用糖沖嘅奶茶，口感更加順滑，除左嘢飲，呢度嘅豬扒麵都係好多人會食嘅嘢。因為熟食中心係80年代起，所以呢度有大排檔嘅味道，可以見到天花大風扇、粉紅色牆磚階磚，而北記就喺熟食中心嘅角落，可以見到大大個白底紅字嘅招牌，即使係朝早都差唔多座無虛席，雖然熟食中心好似好冷清，但北記絕對唔會。餐廳環境當然唔算好理想，因為唔係新式嘅熟食中心，不過都算企理。餐牌非常簡單，有好常見嘅公仔麵、沙嗲牛、炸雞翼、飛碟、奶茶咖啡，而我點嘅就係最多人食嘅雪菜豬扒麵，價錢平民只係$35包埋嘢飲，冷熱嘢飲都係同價。-1️⃣ 雪菜豬扒麵 💰35（👅: 7.5/10）豬扒份量夠多，而且好細心已經切到一條條方便食客，咬落去幾鬆軟，肉質唔會太實，唔鞋口，唔會好乾身有少少肉汁，外層唔算脆口因為已經浸左落個湯度，食落去係醃得入味，唔多肥膏，香茅嘅味道比較突出，不過好似食到少少花椒八角味，有啲人覺得味道有啲鹹，不過我覺得可以接受。湯底就冇豬扒嘅味道咁重，唔係用調味包，鹽味比較突出，唔會係想飲嘅湯，主要係靠豬扒既味道。而雪菜同平時嘅唔同，顏色比較綠啲，而且硬身啲，咬落爽口，食落去唔會太鹹。麵方面係用大光面，生熟程度算啱啱好，唔會太腍亦都唔會太硬，佢嘅辣椒油夠香夠辣，落少少令到味道提升唔小，呢個價錢來講可以接受，感覺豬扒麵同大坑嘅炳記茶檔好似。-1️⃣ 煎蛋、牛油多士 💰0（👅: 7.5/10）如果淨係叫一個餸既豬扒公仔麵，會配煎蛋、牛油多士。多士夠熱辣辣，咬落去夠脆，食落去有牛油嘅味道，牛油份量多。煎蛋就覺得油膩左啲，蛋黃係啱啱熟，整體就比較普通一啲。-2️⃣ 熱奶茶 💰0（👅: 9.5/10）所有嘅麵餐已經包左野飲，所以就可以試呢度嘅瓦煲奶茶，用傳統瓦煲煲，所以特別保溫，有問過店主用瓦煲係咪會特別好飲，佢就話其實冇咩特別只不過用左瓦煲幾十年，個茶底唔好飲用瓦煲都唔會好飲。奶茶一入口非常順滑，輕身唔鞋口，芳香順喉，茶底好濃郁，茶味同平時有啲唔同不過好突出，但唔會因為落咗太少奶而令到佢有澀味或者酸味停留喺口腔，所以茶同奶嘅比例啱啱好，茶同奶嘅比例大概係六四，所以茶味會比奶味突出，但絕對唔會喧賓奪主，如果鍾意茶味出啲嘅話呢杯好啱你飲，要挑食嘅就係奶茶未夠厚身，無掛杯。成日覺得一杯好飲嘅奶茶，就算唔使落糖都好飲，呢杯真係完全做到，因為佢奶嘅份量已經有足夠甜度。飲完呢杯覺得佢唔止係觀塘最好飲，都算係我嘅top1/2嘅香港熱奶茶。-🌟食物方面就正常冇咩特別，勝在即叫即做，熱辣辣，唔知點解每一個出名買奶茶嘅地方都係食豬扒麵，好似大坑嘅炳記，如果係為食呢度嘅嘢就唔使特登嚟。如果你好鍾意嘆香港嘅熱奶茶，咁呢度嘅應該唔會令你失望，唔會輸比中環蘭芳園、上環炳記茶餐廳、大坑炳記茶檔，呢度嘅係茶味比奶味突出，如果你鍾意奶味突出啲嘅，灣仔嘅金鳳一直都係我嘅最愛。要挑剔呢度嘅就係夏天嚟嘅話會有啲熱，因為呢度始終係熟食中心，唔係新式嗰啲有冷氣。咁用瓦煲沖奶茶究竟係咪好飲啲，唔敢講，可能係因為茶底好，可能係師傅技術好，亦都可能係因為瓦煲，瓦煲可能只係呢度沖奶茶嘅習慣，不過瓦煲奶茶史會買少見少，係呢個年頭仲可以有機會品嚐，已經係最值得珍惜嘅一件事。再加上呢度有好濃厚嘅港式味道，朝早嚟幫襯過幾次，見到有唔少食客都互相打招呼，有傾有講，完全冇隔膜，睇嚟呢度唔止係食一碗豬扒麵同飲一杯奶茶咁簡單，而係食香港嘅風味同埋濃厚嘅人情味。-👅味道: 8.5/10🍴環境: 6.5/10💰消費: $35pp (服務費: NA)…查看更多
