愉快地等待著美女出現，每次都早點到達，先等位先打點一切，心滿意足。被安排到最入的臉壁位，心情好無所謂。最想食豚骨湯菠菜，不幸地賣晒，真係非常人氣好受歡迎喎。唯有轉食一風堂爆烈豆腐，無湯字既？唔係湯嗎？睇完 menu 悶悶地，八掛下檯面調味料。嘩，居然有芽菜任食，最衰我唔食芽菜架呢。仲有醃海藻、原粒生蒜、即磨芝麻、七味辣粉、胡椒粉、豉油，好多款喎。美女還未到，嘆杯冰凍啤酒順順氣。竟然買 1 送 1 咁爽？Asahi 加冰杯夠晒凍，正呀﹗炸紫菜墨魚鬚，油淋淋反晒光，炸漿鬆散，好采裡面墨魚鮮甜嚥韌，紫菜味就食唔到喇，一試無妨。南蠻雞，賣相未算吸引，新鮮出爐熱騰騰，大大舊外脆而內裡肉嫩肥美多汁，醃味可口，其貌不揚十分意外。黑松露汁一風堂餃子，大量蔥大量薑，但我唔食架。另上的黑松露汁嚐不到半點黑松露味，算吧。餡料塞得滿滿，脹卜卜靚靚仔仔，底脆面黏黏的餃皮，包著大量甜美豬肉，不乏肉汁，罕有好食的餃子。一風堂爆裂豆腐，砂鍋熱騰騰噴住煙送上，百福滑豆腐來的喎，超嫩滑散發豆香，香辣無比滑嘟嘟好好味。有類似媽咪麵點綴，咁得意既？連湯連豆腐掃入口，好食到不得了，清得一乾二淨一滴不漏。如果撈飯食，必定兩三碗走唔甩。特製赤丸新味，短髮阿妹錯單喇，我係叫兩個特製赤丸新味架，落錯特製赤丸新味及普通赤丸新味各一，少左玉子及紫菜，唯有與美女共享，而且我要走蔥囉。流心半熟蛋甘香甜美，無得彈。肥美彈滑厚切叉燒驚喜萬分，不乾不鞋又不硬，肥瘦適中高質甜美靚豚肉。回想一蘭細細薄薄瘦叉燒片，十足腳皮既所謂叉燒真的想喊呢﹗原來拉麵硬度有 4 種選擇架？其實我食開超硬，依家叫左硬，都係比正常麵質腍少少。辣度係 standard 無得揀大辣？濃濃湯底，黏黏厚厚的小辣程度，合格。讓腍腍曲曲拉麵拖著入口，中規中矩還可以。嘆完原味，來點即唧生蒜試試先，香蒜辛味，錦上添花真的更惹味可口喎。我覺得拉麵質素還可以，但美女堅決表示不合口味，不再選擇一風堂喇。…Read More
