南洋麵屋 (已結業)

北角呢頭都幾多嘢食，經過見到呢間泰國菜見到餐牌幾吸引，就入咗去試吓。一入去侍應好熱情招呼，餐牌有幾多嘢食揀，個人特別想試吓叻沙，就叫咗碗叻沙帶子拉麵試吓，碗叻沙湯底好濃，中辣而且大有濃濃花生香味，餸嘅款式夠多，雖然只係自選一款材料，我揀咗帶子，但係原來碗叻沙本身嘅配料都幾多，包括有幾塊魚片，大量芽菜同埋豆卜。原本只係以為有兩粒帶子，但係原來唔係，仲有好多細粒帶子係湯入面，每一啖麵都可以食到粒粒帶子肉，夠足料。媽咪就揀咗碗泰式海南雞飯，海南雞唔帶骨，而且雞肉夠滑，點埋薑蔥同埋泰式醬味道酸酸甜甜夠醒胃，而且同雞肉味都幾夾。一碟份量都算多，一個人食都幾飽。最尾見到隔離枱個泰式豬肉碎生菜包幾吸引，就叫左黎試吓。好彩冇令我失望，分量幾多，而且佢泰式豬肉碎啱啱炒起，酸酸地辣辣地味道好開胃，而且熱辣辣配上清涼嘅生菜一齊食味道好清新👍每一啖生菜都食到滿滿嘅肉碎好滿足~最後媽咪同我都食得幾滿足，而且食物質素都唔錯，下次會再嚟試吓其他泰式菜式😇

尼間餐廳環境大裝修舒服，而且食物種類多，可以自己配搭粉麵，晚市唔駛加一，所以價錢吸引好多。晚市7點半左右到，愈坐愈多人入黎食，而且好多人買外賣。叫左招牌自選湯粉叻沙豬扒摻摻($68)，泰式燒豬頸肉($58)，泰式豬肉碎生菜包($58)，凍泰式奶茶(跟餐半價，$13)。豬扒同湯粉分開上，所以豬扒保留外皮脆脆地，肉嫩，份量都唔少。摻摻非常吸引，湯底有雞湯味，仲有啖啖椰香味，微微辣。配料亦唔馬虎，有豆卜，蛋，厚切魚片，生菜。大大碗男仔一定夠食。豬頸肉厚切，食落有陣陣炭燒味，帶d焦脆口感。配上既醬汁好好食，係甜甜地，同豬頸肉好夾。如果覺得單調，可以叫烤餅，包住一齊食更好。生菜包擺碟精緻，大量肉碎連洋蔥，椒一齊炒香，辣度比叻沙辣得多，所以如果唔食辣，可以走辣。生菜提供既量最少包到10件。幾乎枱枱食客都有叫生菜包。泰式奶茶比平時港式既較甜，但入口唔係死甜既，後勁有茶味。顏色亦比平時飲開既橙d。跟餐叫飲品可以半價，所以抵飲。最後食完飯，餐廳送上每人一件紅豆糕。好特別，平時食既會見到一粒粒紅豆，但尼款係，紅豆已經變成沙沙地既狀態，食落口係沙沙既口感，唔識容易，但係好食，唔太甜。少少一件，飯後甜品最岩。