Slluks T2 (已結業)

最近好流行嘅黑糖珍珠奶茶, 基本上喺旺角登打士街 每隔一間舖頭就有得賣, 但其實珍珠奶茶有幾唔健康個個都知, 澱粉質再加埋黑糖嘅糖分, 一杯都起碼五、六百個卡路里， 如果想搵啲低卡路里嘅飲品， 除咗水果榨汁之外， 原來都有得揀。Slluk T2 喺旺角h&m對面， 其實就係在女人街街口， 鋪頭門面大都幾易搵， 鋪頭用銀鋼色做主調， 配埋自家設計嘅漫畫人物， 夠有個性夠有睇頭。tommy特調水果茶 呢度主打嘅tommy特調水果茶， 水果組合夠曬多元化， 有火龍果菠蘿西柚薄荷士多啤梨芒果， 仲非常夠料tim! 而個base茉莉花茶, 用冷泡嘅方法經過十幾個鐘浸泡而成, 賣相繽紛,用黎打卡簡直一流 , 最重要係佢唔會過甜，而且消暑解渴， 夏日炎炎之際飲番杯, 又唔會怕卡路里過多, 清新解渴。氮氣冰咖啡另外店入面仲有一樣吸引我嘅飲品， 係成條街得佢哋獨賣嘅氮氣冰咖啡。 呢度係冰咖啡同茉莉花茶一樣都係用冷泡萃取而成， 咖啡浸泡咗十幾個鐘之後， 再加入氮氣打進冷泡咖啡， 得出嚟嘅味道係甘香，卻又唔會有酸澀嘅味道，呢點係連鎖咖啡店所無得比既。 而且當啲啖氣打進咗冷泡咖啡之後， 面頭有一層綿密嘅泡泡， 入口細順滑。 最過癮嘅係， 店主特登訂製啤酒杯， 配合番用氮氣打出來的咖啡， 當走到上街就好似拎住一杯黑啤招搖過市， 但其實我飲嘅係比黑啤低卡路里好多嘅 氮氣冰咖啡，實在非常過癮！…查看更多

今日同個朋友行過旺角見到登打士街開咗間新嘢叫Slluks T2, 一經過已經俾佢個招牌同佢鋪頭入面個大螢幕吸引， 又有好多靚仔靚女喺度派傳單，而且我哋行哂成條街，全部都係得啲又甜又肥嘅糖水珍珠奶茶，得佢哩間唯一見到有氮氣冰咖啡同埋新鮮水果茶飲，所以同朋友一致揀咗Slluks 嚟買。我自己買咗一杯氮氣咖啡，見佢拎岀嚟時以為係杯黑啤嚟呀！佢用咗個好靚嘅啤酒杯載住啲咖啡。而且店主話飲完隻杯仲可以俾我keep 番呀！試咗一啖，首先係飲到好滑又細密嘅泡泡，跟住就飲到咖啡嘅香濃味道，佢有輕微加咗小小糖漿，中和到咖啡嘅微苦，一開始飲到嘅奶滑感以為係店主加咗奶去打，點知一問之下嗰啲奶滑感原來係全因爲由氮氣打岀咖啡時而帶岀嘅，所以原本怕飲齋咖啡嘅我一啲都唔覺得自己飲緊無奶嘅咖啡呀，而且更加令我更鍾意呢杯氮氣咖啡嘅原因係入面一粒冰都無加，唔會越飲越淡，但係仍然好冰涼，即刻可以令你喺炎炎夏日降溫呀！另外朋友就想飲水果茶，店主就話今日啲水蜜桃好新鮮，問朋友想唔想試吓水蜜桃特飲。店主果然無介紹錯呀，佢成杯嘢入面都充滿水蜜桃果蓉，個茶底應該係用咗紅茶去做。飲每一啖都會食到果蓉，而且又充滿水蜜桃嘅香味，飲落又清甜，係新鮮水蜜桃嘅甜，佢根本就唔洗落糖水，我覺得呢杯嘢真係真材實料，又健康！我同朋友都好鍾意！店主仲話佢哋會定時有新嘢岀，下次去或者又可以飲到啲時令生果嘅果茶。不過我自己又好鍾意佢個氮氣咖啡喎！所以睇嚟都係要去多幾次先試得哂啦！而家真係好小見到啲咁有heart, 有真材實料又健康嘅飲品店, 一定要支持支持呀！…查看更多