搭小巴前先買啲嘢食返屋企，我間唔時會去幫襯黑布街間台式小店，但今日去到發現店舖已轉咗手😳。新店名叫「川長」，再加埋川字隻辣椒🌶️，就知道佢係主打川辣食物。小店位於轉角處，如果要堂食都可以嘅，但就未必舒服🙈，所以大部份人應該係嚟買外賣🥡。女店主主動介紹有乜招牌菜以及唔同涼菜嘅分別。我哋叫咗兩個麵食同兩款小食，麵食感覺抵食啲，因為小食定價仲貴，哈哈😆。雞絲涼皮($35)，涼皮近年喺香港變得常見咗好多，不過唔同店嘅出品各有不同。呢度嘅涼皮好特別，寬度有如皮帶一樣，形式有啲不規則；質感非常滑溜，咬落帶點彈性。由於涼皮夠闊，掛汁效果強，醬汁用上麻醬，好搭調，又唔膩😋。川長涼麵($30)，🍜涼麵都唔錯，加分位係麵條清爽，條條分明，有嚼勁。涼麵配以青瓜絲、花生、炸黃豆、芫荽、蔥以及辣菜甫等，黃豆粒超脆，正。辣度有得揀，我要咗BB辣，辣度明顯㗎，但食食吓習慣咗都覺得算易接受。花雕雞翼($38)，一客有六隻，每隻都係加大碼，性價比高。🐔雞翼大啖肉當然好，但隱患係驚入面會唔熟，不過呢度嘅雞翼令我好放心，每隻都浸到熟哂，酒味非常濃郁，但唔會過烈。酒香控制得好好，雞肉又夠滑，推介！麻辣牛𦟌($50)，🐮牛𦟌好大片，牛味幾出，有咬口。麻辣汁望落偏油，但浸辣味好香，底部啲青瓜索哂味，勁惹味，幾乎搶咗主角風頭，哈。總括嚟講，川長係一間幾有自家特色嘅川辣小店👍，呢類舖近嚟開到成行成市，但佢難得能令人留下印象深刻，起碼食嗰陣會覺得佢係與眾不同。下次經過我都會再買嚟食！…查看更多
