神川日本料理

同幾個朋友去慶功 黎左呢間神川D野食真係好味到顛去之前師父又會打黎同我地傾好細心呀所以都好期待！！！食完真係好滿足之前冇寫過食評真係唔寫唔得呀今次！位置係偏左d 但為左食好西， 值！我地揀左900蚊一位。 我地有6個人。 師父話多d人食就多d budget 買料。大家食完都一致認為出面900冇可能食到我地估出面食加埋一最少都要1500食omakase 唔使加一都係第一次聽！食完已經話下次要再黎！我地都識做嘅 見佢地咁比心機都有比tips架～入正題喇前菜又正又開胃刺身好鮮呀，有d掛住食冇影到啊～嘩呢個龍蝦刺身真係又鮮又甜！呢個北海道響螺真係好好味，好味過我係九洲同沖繩食到嘅～～呢個toro 師父做左熟成！ 仲解釋左熟成比我地聽， 聽完唔記得左嚕， 淨係記得味道口感因此而提升左， 呢間鋪真係好有心！未食過呀，日本人好鍾意食羅蔔，佢地鍾意嘅做法 好好味呀日本生蠔 佢地好細心問我地想食熟定生，creamy ~~呢個日式燒蝦 用左秘制芥末籽醬！ 唔係齋燒隻蝦，不一樣的味道啊 ！ 滿意滿意 …查看更多

想食omakase又唔捨得比千幾蚊食餐晚飯嘅朋友仔，呢間「神川日本料理 My SuShi」真係真心推薦比各位！！！不過要提嘅係，呢間餐廳賣嘅係食物質素，服務，但環境方面就唔算太靚。所以如果想食好啲又唔介意餐廳無特別嘅裝潢嘅話，呢間真係超正！呢個係頭盤，由左至右，順次序咁食，味道好有層次，由咸，酸到最後清甜相信大家都知秋都魚一唔新鮮就一定好腥！而我又係好怕腥嘅人，但我食唔到腥味，仲食上癮，搶哂我朋友嗰份黎食，配醋黎食真係好正！然後醋鯖魚，係點豉油黎食，都係好新鮮！食完個口仲有餘韻然後就係呢個刺身拼盤，首先係池魚，佢係熟成左4日，好鮮甜！ 然後係竹籤魚，燒少少面嘅皮，配上檸檬汁！超正！然後係三文魚嘅頸部，唔少朋友會覺得omakase唔應該有三文魚，但其實呢個係大眾化價錢嘅omakase，而且佢用嘅部份亦係最好味嘅位置，所以其實我覺得係合理，可以接受！再者係呑拿魚赤身點少少海鹽食，又係好新鮮，超好味！魷魚韓國馬糞海膽卷夾紫蘇葉，我想講真係超級好味，原來呢幾樣野係咁夾，帶出海膽嘅鮮甜，魷魚亦無蓋過佢，加埋紫蘇葉真係very good最後就係人見人愛嘅拖羅，油脂分佈剛好，唔太肥！正！呢個係加左料理油嘅燒蠔，半生熟，我一啲都唔腥，可能平日我唔太好生蠔，我覺得半生熟好好味，加上落左少少料理油，甜甜地咁？呢個水波蛋沙津，幾好味，不過不失，而具餐廳係季節性咁出，每到下一季就會唔同～炸京都絹豆腐，個汁好好味，配落豆腐到好夾，我覺得幾好味，不過朋友覺得偏咸～最後係主菜～呢個牛肋骨係slow cook左9個鐘以上，但食落係超級juice，而具配埋佢嘅柚子皮粉，感覺好新鮮～幾得意～其實我仲食左佢地handmade嘅甜品～啤梨cheese cake，感覺幾新奇，都幾好味，但我掛住食所以無影到相呢餐兩個人食左$1440，我覺得omakase黎講算係平，而且真係品質保證，員工亦十分友善，向我地講解食物做法，傾下計咁十分推薦比各位想食omakase嘅朋友，雖然唔係啲咩好高級裝潢嘅餐廳，但食物質素絕對令你有驚喜！順帶一提，記得book左位先呀～…查看更多

同男友去慶祝周年紀念 預早book左夜晚omakase 師傅好細心 會問清楚你既飲食喜好同budget 再度身為客人準備唔同既菜式男友知我極愛海膽 所以就order左成板海膽 當晚用左成板海膽整海膽杯 海膽好鮮甜 無腥味 兩個食一板都唔會頂胃刺身好新鮮 有肥美既拖羅 魷魚紫蘇包海膽卷 蝦 三文魚等等基本刺身 師傅有建議刺身既進食次序 但我就隨自己中意咁食 無跟另外有成條魚刺身 唔記得叫咩名 配薑食都幾特別 多士跟魚子（都係我最愛）同用吞拿魚整既source 兩個人食唔曬咁多件多士 好飽軟殼蟹沙律好青新 呢個都係佢地既招牌沙律 好開胃！軟殼蟹卜卜脆最後有慢煮牛 唔記得影相 第一次係日式餐廳食慢煮牛 牛肉好腍 份量都多 因為最後一道菜黎 我地已經飽到食唔曬 甜品係豆腐雪糕加培茶cheesecake 由於飽得濟 我地只係食左雪糕 全晚大約有7/8道菜 食完真係超級飽 每樣菜都好滿意 師傅每上一道菜都會介紹 雖然環境唔高級 地方細細 但就有賓至如歸既感覺…查看更多

今次同媽媽黎到西環嘅一個隱世巷仔食日本菜～～聽朋友介紹佢地係做比較特別嘅Omakase 唔係一般要用上千幾蚊 而係客人講自己嘅人頭budget 師父再根據個budget配搭時令嘅材料去煮菜式😯😯.我同媽媽都係第一次呢種Omakase新體驗 我地決定set 500 budget☺️試下呢款新式omakase 由師父拍板～.前菜有兩小碟～一邊裝住蘿蔔一邊裝住魚肝!呢款係昆布煮蘿蔔 用上麵豉作調味 食落清甜無渣 好味啊！另外一款係鮟鱇魚肝 面頭加左柚子作點綴 令到食落鮮甜 無腥 食到魚香入口即融.之後就係刺身有赤貝 咬落非常爽甜～鯖魚加上香蔥 好新鮮 蔥薑襯托重口味嘅鯖魚超好味！海膽墨魚卷 彈牙墨魚緊緊捲住海膽 中間用上紫蘇葉 令味覺層次更豐富～仲有肥美嘅三文魚同中toro.之後係大根沙律 上面灑上木魚絲同芝麻醬 啲蘿蔔係薄切 食落爽口帶甜 超難忘！😍.一個辣三文魚蓉反卷嘅卷物中間除左夾住三文魚蓉外 仲加上炸蒜 咬落中間脆卜卜辣勁十足 真係好惹味💓.鹽燒吞拿魚鮫 真係第一次食～啖啖魚肉都散發住魚香💓魚質超嫩滑 烤得陣陣炭燒味 超和味！點上柚子醬油 平衡左魚膩感👍🏿.最後師父端上一份豆乳鍋 去暖和我地嘅身體～蔬菜加上長崎縣地雞～ 雞肉好嫩滑！😍而個湯底令我愛不釋手！超大陣豆乳奶香 香濃好味！.最後仲有一件師父自家製嘅芝士蛋糕作為甜品～蛋糕質感超綿密芝士味濃而不膩🤝.媽媽都超滿意呢餐Omakase! 估唔到係西環嘅小巷都可以搵到呢啲真係好隱世嘅日式小店❤️…查看更多

琴日同朋友慶生，由於最近食厭左放題之類，所以特意地book左呢間由廚師發辦嘅日本菜，希望可以食到較高質嘅日本野呢間餐廳由我book枱果一刻已經比我一種好有心思嘅感覺，book果陣廚師問我地budget大概幾多，有冇咩唔食，我就問佢budget每人400左右得唔得，佢都話可以（平時啲omasake都千千聲）所以係未去餐廳之前印象已經非常好。去到嘅時候發現餐廳都比較遠，入面位置唔多，裝潢亦唔係特別吸引，但係我地在意嘅係食物嘅質素去到店員好熱情咁簡介左一次我地果晚會食嘅野。等左冇幾耐就有前菜食前菜分別係芥末八爪魚、鰻魚同日本蕃茄加芝士，要由左至右咁順次序食。我個人非常鍾意日本蕃茄加芝士，芝士配合埋清甜嘅蕃茄，成個感覺好清新好開胃。之後就到刺身拼盤，有甜蝦、帶子、鯖魚、三文魚同海膽魷魚。店員好細心咁同我地講解個食法同食嘅次序，我特別鍾意個帶子同三文魚，帶子上面加左青檸汁同少量鹽，食落感覺好新鮮;三文魚肥美得黎唔會太膩，而其他魚生都非常新鮮，比起放題食到嘅果然出色好多!呢個野菜沙律有勁香嘅黑松露味，食落非常開胃。鹽燒秋刀魚係我成餐飯最喜歡嘅一道菜，秋刀魚外層燒金黃色，非常香脆，食落有秋刀魚特有嘅油香。店員同我地講魚嘅內臟先係精華，食落果真如此! 秋刀魚嘅內臟有一種好獨特嘅甘甜味，好好食! 食過呢條秋刀魚之後發現自己以往係其他日式餐廳食嘅秋刀魚都係不過如此。之後就到壽司，廚師為我地準備左時令嘅鰻魚牛油果卷，呢種創意小卷係其他地方都有食過，但係呢道嘅鰻魚感覺較為肥美，同牛油果配合埋相當唔錯。最後就到蕎麥冷麵，個人覺得蕎麥麵嘅精髓在於醬油，而呢度嘅醬油同配料就調得非常唔錯，醬汁有少少甜得黎又有濃郁嘅芝麻同芥末香，雖然有啲飽但係我都成碗食晒。最後就到甜品，係handmade嘅朱古力蛋糕，朱古力味濃厚得黎唔會太甜，幾岩我口味。呢間餐廳令我最鍾意嘅一點就係佢係設計相當有心思，會考慮到顧客嘅budget,喜惡同時令嘅食材等去設計菜單，雖然冇得比我直接選擇食咩，但食到嘅野都令我好滿意。感覺有啲似食緊日本懷石料理，用咁嘅價錢食到咁嘅質素，我覺得性格比相當高…查看更多