打小人净系可以去鹅颈桥?咁又未必,因为而家餐厅都有打小人服务,听落又真系几有趣喎。无错!荔枝角呢间以打小人作主题嘅东南亚菜餐厅由Super Girls嘅Yanny同佢拍挡Kenny开设,佢哋话开呢间餐厅系因为觉得香港人生活压力好大,希望可以畀一个平台大家发泄,分享喜怒哀乐。每逢星期六都会有一位嚟自鹅颈桥嘅姐姐帮手喺餐厅打小人,同埋仲有张小纸仔畀大家写低想写嘅嘢,写得好仲有得贴堂添~
至於点解选择卖东南亚菜,佢哋就话留意到香港人好锺意亚热带国家,放假去旅行时都常去泰国呢啲阳光与海滩嘅地方,所以无论装潢定食物,都希望可以营造到度假嘅感觉。
海南鸡饭特意选用走地20天嘅粟米鸡,而且鸡有用上汤浸过,嫩滑之余有一层啫喱,口感宁舍特别。讲到海南鸡饭,个油饭一样咁重要,油饭添加咗造鸡过程中嘅鸡汁,油份较少,粒粒分明,食落去特别香~
更多【名人店直击】: |
咖喱喇沙用咖喱同多款香料熬制出一个浓郁嘅汤底,而且海鲜料都好足!
槟城炒粿条嘅粿条系由怡保空运到港,相对於香港嘅河粉口感特别烟韧。
炒咸牛肉厚蛋吐司,吐司选用丹麦面包,会特别重牛油味。蛋煎得好厚身,咸牛肉由厨师自己调味,一啖食落去真系好满足!
除咗主菜外,亦有多款小食如粉红酱通菜及脆卜卜春卷供应。
另外佢哋都对餐厅供应嘅咖啡好有自信,因为特意从台湾邀请了一位特别擅长调制咖啡嘅咖啡兵嚟,平时锺意饮咖啡嘅朋友要去试吓!
地址: 荔枝角青山道495号诚信中心地下1号舖
文: Yanica
相、片: Tom Li