相信各位打慣卡嘅朋友仔，對呢間飲品店一定唔會陌生。佢哋嗰隻靚靚紅鶴絕對係呃like嘅好幫手，話說佢哋最近喺中環又開多間新舖啦~ 有新舖當然就會有新嘢飲~ 分別係清甜解暑嘅沙冰荔枝茉莉同粉紅少女心嘅玫瑰鮮奶烏龍。
雖然只係外賣店，冇位坐低，但裝修一啲都唔hea呀，有大大幅「打卡牆」，方便各位呃liker~ 新飲品玫瑰鮮奶烏龍，以全杯粉紅形象示人，仲要有幾粒玫瑰花冧喺面，輕易取得一眾女生嘅歡心。茶底方面，咪就係玫瑰烏龍囉，玫瑰味都真係幾突出㗎，而茶味就唔算太重，想有啲咬口同加強甜味嘅就加埋珍珠啦。老規矩，加錢就有得要埋隻靚靚紅鶴喇~
至於另一杯新飲品沙冰荔枝茉莉，就係用新鮮荔枝肉加茉莉茶blend 埋， 冰感重，好解暑，加埋正值荔枝季而今年荔枝又豐收，飲落都好清甜呀，茉莉茶亦淡淡地散發出佢嘅清香，低調存在而又唔搶fo。
當然唔少得固有嘅人氣產品啦~ 抹茶飛甩老拍檔紅豆，changing partner咁change咗去同士多啤梨夾，變成草莓抹茶奶綠。呢個新組合又有驚喜，同樣都係紅紅綠綠，份量唔少嘅新鮮士多啤梨果肉好鮮甜呀，同平時紅豆嘅蜜甜比又係另一種感覺。
多果油切烏龍唔使多介紹啦~ 舖頭主打果茶，而呢杯就一杯齊晒西瓜蘋果橙檸檬青檸熱情果……全部果欄入貨㗎，溝埋晒一齊都幾fresh。而且，油切，講緊嘅係烏龍嘅特性，去油脂呀！崇尚健康嘅女生，識揀啦~
Last but not least，行街嘅茶飲唔一定就係唔環保嘅，依家就先喺飲管方面著手，一步一步嚟，佢哋出埋鋼飲管同玻璃飲管可以買呀，size有粗有幼，唔使驚話會啜唔到啲珍珠~
Flamingo Bloom
地址：中環港景街1號國際金融中心1樓1032號舖
文、相：Kar