成日都見到好多卡通主題限定嘅嘢食，但Tomica嘅粉絲等到頸都長都未見到？有喇有喇，今日開始有喇！雖然係期間限定……但都好開心呀！
呢間位於屯門巿廣場嘅餐廳重新佈置過，周圍都係Tomica車仔，充滿童真，入到去都覺得自己young咗！
而食物方面，主菜、甜品、飲料夾埋有10款都包含咗tomica元素。例如珍珠帶子蝦肉意大利麵、意式肉丸意大利麵就係用Tomica車仔造型出場，個車仔盒好靚，如果食完可以拎走就好喇……另外有埋車仔嘜頭嘅方包，連芝士都係車仔形，cute cute~~
至於日式照燒雞扒蛋漢堡同吉列魚柳牛油果漢堡就插咗支Tomica旗仔，兩款漢堡都會配炸雞同薯格啊。
鐵板菜式都有，分別係鐵板香草吉列牛扒伴日式咖哩飯、鐵板香酥炸雞飯配黑松露芝士汁，前者肉味香濃，而後者嘅炸雞，仲係用雞脾嚟炸嘅添，嫩呀。
甜品當然唔少得，有Tomica嘅馬卡龍芭菲，配成3球唔同口味（雲呢嗱、朱古力、士多啤梨）嘅雪糕咁多呀，再加粟米片、棉花糖同朱古力棒棒，都幾呃like。
Last but not least，特飲都必須要講一講，冰果茶，啲冰呀，整到成架車仔咁嘅樣㗎！！好得意！嗚呀！求求天父做多幾十分鐘好人，唔好畀啲冰咁快融呀！
而10月期間，喺一期商場廣嗰邊，亦會有個Tomica展覽，有唔少打卡位呀。
地址：屯門市廣場2期1樓19-23號舖
期間限定：即日 至 2018年1月2日
文、相：Kar