睇返9月嘅十强，都系以小店、café为主，无论食物款式定口味都几多元化，有港式亦有南洋风味等，但少有地竟然冇日式餐厅上榜。
第10位 Butlery（*新上榜）
图：沙田成日畀人话唔够多美食，今次十强终於有间餐厅上榜，为沙田争返啖气。呢间café系区内人气餐厅，成日都排长龙架。去到无论主菜食juicy安格斯牛肉burger又好、定系冬荫公fusion意大利饭都好，记得要留肚食甜品——梳乎厘pancake真系重点。抹茶、伯爵茶味都有浓浓茶香，pancake松软，推介。
第9位 吃扒（*新上榜）
图：复古主题嘅餐厅，成个环境、播歌、装饰全部都好60年代旧香港嘅氛围，无论想去怀旧一下定系去打个卡都好啱。餐厅主打各款铁板扒餐，推介特选肉眼扒配薯条，块扒好大块又有肉汁，仲要有热溶芝士畀你淋上去，视觉效果一流。
第8位 Owens（*新上榜） 
图：行文青风嘅café通常都深得大众欢迎，呢间近日喺IG大热嘅餐厅都唔例外，登上十强榜内。而且难得地唔系净系食环境，连嘢食都又抵又好食。红酒汁烩牛胸腹肉意大利饭都几多人嗌，牛胸腹肉腍嫩，味道浓香，risotto又索晒牛汁精华。甜品要选麻糬抹茶蛋卷，口感松软、麻糬软糯。
第7位 马来椰爷（*新上榜） 
图：南洋风味小店，手工酱料都系自家炒制，汤底以新鲜食材同天然香料制作，浓味但绝对唔系味精味，难怪大受欢迎。汤底主要有6款选择，并配搭唔同食材，推介虎虾帆立贝配叻沙掺掺汤底，汤底鲜香，海鲜新鲜爽甜。另外可试鲜牛油班兰椰香手工咖央多士，好香口。
第6位 辛手村
图：呢间特色川菜餐厅连续2个月打入十强，实力得到肯定。佢哋主打干锅以及串烧，仲有日式寿喜烧。锺意松露嘅朋友仔，可以试试估你唔到麻辣黑松露干锅，两样重口味嘅嘢夹埋一齐都冇话撞到嘭嘭声，各有发挥。啲配料既有辣香，又吸收埋松露香，系几惹味。
第5位 GRIND SIZE
图：两层高嘅纯白色café，大大只字写住见字饮啡，仲有梳化同塌塌米位置，全部都系打卡嘅设定。食物方面同样啱打卡，龙虾虾虾多士劲澎湃，啲炒蛋同龙虾肉叠到高一高，几乎见唔到块多士。另外，蟹膏三文鱼子、带子、明太子手卷粉亦系人气美食之一，手卷粉挂汁烟韧，捞埋蟹膏、三文鱼子一齐食，啖啖鲜味。
第4位 Awesomeism CAVE（*新上榜）
图：以银、黑色为主调嘅餐厅，装潢型格，Menu配搭创新。好似鸡翼咁，平时唔系蜜糖味就系水牛城咁，呢度居然加埋花生酱落去，变咗花生酱咸蛋黄单骨鸡翼，先唔讲单骨有几方便，两款口味原来几夹，咸咸香香。冬荫公烤粟米又系得意之作，酸酸甜甜仲要辣辣地。嚟到好多枱都会叫埋自家制嘅scone，牛油味香、口感松软，值得一试。
第3位 南本草（*新上榜）
图：长沙湾主打养生料理，并将凉茶元素加入食物中嘅呢间餐厅，得到第3位。健康得嚟又有得打卡，nice。推介一下「日简五品」，包括咗主菜、2款配菜、玉子烧同饭团，拼埋一齐影相几靓。其中，养生腐皮福袋乌冬几特别，福袋入面收埋咗啲乌冬，仲有虫草花同杞子，味道清甜。
第2位 叁不馆
图：以古式茶档同电影为主题嘅港式火锅店，再度上榜。牛魔王唔可以错过佢哋多款特别嘅牛肉部位，例如手切封门柳、安格斯牛颈脊等，份量都几多下，包满足。平时打边炉锺意食响铃嘅朋友仔，要试呢度嘅紫菜炸响铃，新鲜炸，脆卜卜。要爽就要点莫生气椰椰鸡汤汤底，可以拎住成个椰青倒啲椰青水落个煲度！
第1位 鱼事者（*新上榜）
图：旺角系街头小食必争之地，呢间新开冇耐嘅小食店，极速上位，登上榜首。佢哋本店喺炮台山，分店开喺旺角自然更就脚。全店以鱼肉制成小食为主，好似炸鱼扮薯条、鱼肉面等等都系热门之选，仲有芫荽控大爱嘅无猪肉芫荽烧卖，即系芫荽鱼肉烧卖，荽味十足！
文：Kar
