又到每月数榜时间，要喺同行餐厅中突围而出，获得大众好评，用心制作食物就梗啦，另外，创新嘅谂法都好重要架。今次上榜嘅餐厅，就有唔少特别嘅菜式配搭，好似鸡皮饺子、芒果鲁肉饭同麻辣牛肉烧卖等。
第10位 直烧和牛商店（*新上榜）
图：主打热石石烧和牛嘅呢间烧肉店，最抵玩系有得任食吉列牛脷，可以无限追加！一碟牛脷本身已经围满成只碟咁好壮观，每边轻轻烧一烧就食得，肉质软嫩。另外推介鸡皮饺子，用脆卜卜嘅鸡皮包住肉碎，特别酥脆。
第9位 面赐园（*新上榜） 
图：呢间café嘅特别，食港式牛筋牛腩面食，但又有高质本地焙烘咖啡，完全好似冇关系嘅两样嘢又夹得埋一齐喎。去到唔想拣就嗌牛队长汤面啦，一次过食晒4款唔同牛嘅部位，包括牛肚、牛筋、牛腩同澳洲和牛封门柳。鲜牛骨汤底用咗成几十斤牛骨去熬6个钟架，仲加埋腩肉同药材，唔系边得嚟咁浓味，兼自带甜香？
第8位 Follow（*新上榜）
图：木系装潢嘅西餐厅系有啲feel嘅，入到去见到枱枱都有碟抢晒火嘅德国火焰猪手，当然都唔可以执输啦。店员会喺客人面前即席浇酒点火烧猪手，记得准备好boomerang了。烧完即食，皮脆肉厚。另外有道几特别嘅配搭：酸奶忌廉封门柳手工阔条面，creamy得嚟带微酸，口感丰富。
订座预付套餐：意式情迷火焰猪手2人餐 86折 (按此预订)
第7位 辛手村（*新上榜）
图：旺角川式串烧干锅店，夹埋有30几款川式同日式川烧拣，多数都系辣辣地嘅，辛烧鱼腐串系推介， 仲有日式烧鳗鱼，两串都劲香。干锅可以自选几款食材，不过怕辣嘅朋友仔就要慎重考虑下，麻辣味都几刺激，就算沟埋咗黑松露嘅麻辣黑松露干锅，松露嘅香味依然唔能够盖掩到川辣嘅感觉，但嗜辣嘅朋友仔就会食得好过瘾。
第6位 啖啖燕窝（*新上榜）
图： 观塘呢间养生炖品店近期人气急升，有多款燕窝同其他养生甜品供应。主打嘅雪燕可以配搭唔同嘅生果，8月盛夏最受欢迎就梗系限量嘅日本山梨县水蜜桃，清甜可口。花胶仲有得拣要麻辣版，过足口瘾。
第5位 La Moo Moo' s Steak and Fries
图：呢间扒房嘅选择唔多，但就系够精够专。个个去亲都实拣安格斯肉眼扒，大大份又Juicy，牛肉味又浓，牛魔王表示满意。而且跟配嘅幼身薯条仲可以无限encore，非常抵食。
第4位 井巷子 by 锋膳（*新上榜）
图：又一间辣辣川菜上榜，佢哋嘅招牌菜系成都青汤水煮鱼，用上4种唔同辣椒制作，麻香强烈。片皮鸭亦系必食之列，皮香肉嫩，最特别系会加入金奇异果同哈密瓜，油腻感即刻轻咗。麻婆嫩豆腐伴炸馒头又系索晒啲辣汁之後，慢慢享受嗰份刺激感嘅菜式，每款菜式都花上心思创作，绝对值得入围。
第3位 舍利鮨
图：厨师发办系近年冇得去日本後，深受港人拥戴嘅餐厅类型。呢间喺元朗，装修充满日本特色，座位阔落，师傅仲会好细心咁同客人讲解菜式同交流，气氛相当唔错。刺身、寿司等食材新鲜，特别一提呢度有一夜干香鱼，肉质有弹性。
第2位 壹.01（*新上榜）
图：台湾菜必食鲁肉饭，呢间啲鲁肉饭就够晒特别，加埋芒果落去变咗芒果鲁肉饭，一甜一咸但你估唔到又几夹，清甜嘅芒果有助中和返重口味嘅肉香，愈食愈开胃。小食不妨拣拉丝芝士火腿蛋饼，分分钟有惊喜畀到你！
第1位 龙点心
图：今时今日，创意真系好重要。榜首呢间点心店，就系凭创意上位。将传统点心重新包装，烧卖变龙虾汁墨鱼烧卖同麻辣牛肉烧卖、肠粉变咗粉红色，虾饺都可以加酸菜鱼，吸睛又开胃。另外有个豆腐布丁都好得意，淋上热情果酱，酸甜有致。
文：Kar
