4月份好評餐廳十強
2023-05-05

綜合4月份上榜嘅餐廳,似乎大家都希望喺平凡嘅生活中,尋找一啲新鮮感。多間十強餐廳都有佢哋過人嘅創意,例如用牛肉製叉燒、用腐乳整意粉、芒果糯米飯又整到好似壽司咁,好fun。

第10位  漁吉海鮮丼專門店(*新上榜)

 圖:Pinkyeeyeehkgirl_hkfood

觀塘呢間海鮮丼專門店CP值幾高,口碑唔錯,吸引咗唔少丼飯迷前往。如果想食到最多刺身款嘅一定係揀漁吉特選丼,有齊三文魚、油甘魚、海膽同大大隻赤蝦等等,仲要款款刺身都勁厚切,鮮味十足,絕對係大滿足。惟一美中不足係收好早,8點就閂門,有心想去食嘅朋友仔要早啲到啊。

第9位  886巷(*新上榜)

 圖:jmfoodie126金魚姬札記

元朗親民台式小店,平平地可以食盡台灣美食,麵線、滷飯、小食、台式甜品等都有。麻辣鴨血當然係重點,麻辣鴨血無骨鴨掌豬大腸麵線夠晒足料,而且仲好入味,絕對過足辣癮。另外推介呢度獨有嘅黑金鋼牛尚燒飯,餐廳以牛肉加秘製醬汁製成黑麻麻嘅叉燒,但係肉味香濃,值得一試。

第8位  研香(*新上榜)

 圖:SoFood.hklhmdon

基本上去親呢間中式糖水舖嘅,十個有九個客都係衝住佢哋嘅開心果露而嚟,因為真係真材實料呀!用上意大利西西里島嘅開心果製作,味道濃郁,啖啖都係果仁香。嚟緊夏天最啱就係食埋鮮果冰,芒果味同龍眼味都好清甜,榴槤就更有驚喜。混合D24同金枕頭兩款榴槤製作,有埋真‧果肉食,一個字,爽。

第7位  Mr. K Pizza N Chicken    

 圖:vanessafoodiaryvvv.foodies

嚟韓式餐廳必食炸雞啦梗係,呢度仲可以揀雙拼添,蒜香蜜糖係最受歡迎嘅,鹹甜有致,炸雞依然保持脆嫩口感。手工薄餅係呢間餐廳嘅另一主打,特別係好澎湃嘅拉絲芝加哥Pizza,芝士控一定會心心眼。Pizza邊邊位仲搽咗蜜糖,層次豐富。

第6位  樹蛙咖啡(*新上榜)

 圖:lee wai tunghungergirlll

鍾意周圍打卡嘅朋友仔,嚟呢間以樹蛙為主題嘅樓上café就啱晒,呢度個個都係係打卡位,而且冇限時任影唔嬲。食物方面亦有水準,珍寳帶子蟹肉蟹膏意粉好creamy,而且仲有大大個嘅扇貝殼,影相好有儀式感。甜品有tiramisu同brownie等,推介要試開心果手工曲奇,外脆內軟,開心果味香得嚟又唔假。

第5位  Second Draft  

 圖:piggychickilankiman6330

成功留榜嘅銅鑼灣Taproom,全部嘢食都非常之啱送酒,大家都熟悉嘅大坑薯條就唔特別介紹喇,今次講下fusion菜——腐乳卡邦尼,點諗到用腐乳整意粉?又夾到喎,鹹鹹香香又creamy,撈埋隻流心溫泉蛋口感更滑。最近仲有啲新菜式,食得辣嘅酒友仔不妨試下紅油蝦餃,大大隻蝦肉好彈牙,食完再飲返杯IPA就夠晒爽。

第4位  泰玖(*新上榜)   

 圖:skfoodtravelhkyoooosi

由泰籍廚師主理嘅泰國餐廳,有上下兩層,仲有吧枱坐,泰國菜嚟講都幾少見。佢哋嘅菜式除咗一般常見嘅生菜包、咖喱等外,特別推介招牌蟹肉煎蛋捲,蛋捲大大件仲包住滿滿嘅蟹肉絲,面頭仲有好多蟹籽,蘸埋酸辣醬食幾惹味。芒果糯米飯都係必點,一片片芒果放喺一嚿嚿糯米飯上,整到好似壽司咁好得意,有白糯米同紫糯米,椰汁香甜。

第3位  Seoulmate     

 圖:Little.Cyantung117

位於將軍澳嘅韓式Café,最出名就係造型可愛嘅烏卒卒火山飯同埋小雪人北海道帶子黑松露燴飯,實在太cute啦。小雪人係蛋白梳乎厘,口感鬆軟,狠心嗶開佢入面就係香濃嘅松露燴飯。而韓式年糕扮腸粉、燒賣、 仲有鵪鶉蛋會唔會太搞笑,但又扮得幾似。年糕口感煙韌,同平時啲腸粉一樣都係跟麻醬甜醬同豉油。

第2位  CAMPSITE(*新上榜)  

 圖:aa100027025micheel

旺角商場內但做到勁露營feel嘅餐廳,環境間格似模似樣,仲要連上碟都勁有gimmick。烤原隻龍蝦同原隻魷魚都會畀個小火爐你,好似露營煮食咁,好玩又好食,熱溶芝士加埋彈牙蝦肉係唔錯嘅。另外甜品必點營火朱古力棉花糖夾餅,呢個又係有個爐仔畀你玩,自己燒完棉花糖後,仲可以點埋朱古力醬加夾餅食,咁過癮抵佢哋上榜。

第1位  麺屋こころ

 圖:SoFood.hk

由上個月嘅第10位躍升至呢個月嘅榜首,呢間嚟自日本過江龍嘅撈麵店確實有料。餐廳主打日本撈麵,就咁食咗三分一後,可以跟餐廳建議試下再分別再黑胡椒同秘製香醋再食,食得落嘅最尾仲可以加飯,撈晒啲汁食。一麵幾食,不斷有新嘅層次同味道衝擊,係幾有新鮮感。撈麵麵條煙韌,掛汁力高,所以撈勻後食都好入味,特別係如果你揀咗啲辣嘅口味,就十級刺激啦。

文:Kar



关键字
十強
十強名單
報榜
灣仔
旺角
銅鑼灣
將軍澳
Cafe
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
2024-07-09
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18