麻糬波波口感煙韌又Q彈，而且通常細細粒食完都唔會太heavy，仲有好多唔同口味𠻹～今期搜羅咗幾間主打麻糬波波嘅麵包店畀大家，睇吓邊間啱心水！
大熱菠蘿脆皮 James Bonbon Bakery
圖：由前四季酒店西餅師傅主理嘅餅店～大熱係呢款菠蘿脆皮麻糬波波，每日新鮮製造，選用日本麵粉，外脆內軟帶點煙韌，高峰時期可以日賣2,000個！口味包括原味波波、菠蘿脆皮、伯爵茶、朱古力同抺茶，更不定期推出特別口味，如Lotus、Nutella等，建議買完即刻食感受脆皮滋味！
班蘭味麻糬波波 FW Shop
圖：灣仔呢間小店同樣有賣菠蘿皮麻糬波波，每個口味都有普通麻糬同菠蘿皮選擇，包括原味、朱古力、綠茶紅豆、紫糬、芝士同班蘭口味。紫薯麻糬每啖都有淡淡嘅紫薯味，裡面仲有少少番薯粒增添咬口；芝士麻糬表面有啲燒脆咗嘅芝士，鹹鹹甜甜好過癮。而班蘭味加入鹽去突出班蘭香氣，幾出色。
紫菜肉鬆拉絲芝士口味 簡品堂
圖：連鎖餅店主打立體造型蛋糕、各式曲奇、精美西餅、手工蛋卷，以及近期熱賣嘅怪獸波波同麻糬波波～佢哋嘅怪獸波波原來係紫菜肉鬆拉絲芝士麻糬波波，滿滿紫菜肉鬆包住鬆軟嘅麵包，再加上味道濃郁嘅拉絲芝士同麻糬，口感Q軟，味道有肉鬆嘅甜香同芝士嘅鹹香。而麻糬波波都有紫薯、黑糖核桃等口味㗎。
超惹味雙重芝士 梅窩麻糬王
圖：rbylife
呢間最出名嘅一定係佢哋外脆內煙韌嘅質地，口味唔多選擇，但款款都好高質！如雙重芝士味，芝士好鹹香，分量恰到好處唔會太膩。紫菜肉鬆一入口都好驚艷，入面超多肉鬆好足料同埋好香。原味波波味道簡單啲，但混合咗黑芝麻，令香氣更有層次。
文：Yanica
編：Cathy
