生日或紀念日呢啲日子，要食得特別或揾間浪漫餐廳，可以參考吓開飯仔為大家搜羅嘅口袋名單，部分係期間限定特色套餐，一定令你留下難忘回憶！
金獎粵菜套餐 帝京軒 
今次推出含「金」量極高嘅「紫荊 · 饗宴」，都係餐廳獲得金獎嘅高質菜餚！好似《2025香港國際美食大獎》中式烹調組別獲得「金紫荊杯」嘅犇殿寶盒，集合外形似壽司嘅脆鍋巴牛米餅、惹味嘅金黃香蒜牛玉杯同埋養生虎掌牛肉豆腐盒，用料多元化，味道亦平衡得好好。另外中式現場烹調隊際賽則以「宮宴 - 雲霞 · 嚐鮮」奪金，當中包括五穀豐收蝦餅泡飯、流心糯米糕等巧手菜㗎～
供應期：即日起至2025年8月31日
米芝蓮一星+綠星 Roganic
圖：由英國名廚創辦，以「從農場到餐桌」理念供應英式美食同可持續餐飲。喺銅鑼灣原區搬舖後，環境畀人感覺更加natural，而且堅持選用餐廳160公里範圍內嘅本地有機農場採購新鮮食材，令每道菜更加獨特。例如Dry aged Guangdong Duck以百花蜜烘烤，配上醃漬李子醬同南瓜蓉，令鴨肉風味更出眾。
法國米芝蓮名廚主理一夜限定晚宴 CulinArt 1862
法國名廚Adrien Descouls係米芝蓮星級餐廳Origines嘅靈魂人物，今個月將親臨香港主理一夜限定晚宴，以七道菜法式饗宴演繹其家鄉嘅風土味道！菜單靈感源自奧弗涅地區獨特嘅火山地貌同豐富森林資源，其中燉煮小牛肉撻配法式蛋黃醬採用傳統慢燉方式，佐以酸香嘅gribiche蛋黃醬平衡肉嘅油香；北極紅點鮭排就採用日式活締處理法確保魚肉緊緻鮮美，搭配用Noilly Prat苦艾酒調製嘅綿密沙巴翁，風味相當獨特。主菜方面，金黃小牛里脊則選用飼養於火山土壤牧場嘅Veau d'Aurillac品種，佐以現刨黑松露薄片同埋巴黎蘑菇濃縮精華，令香氣更有層次。每道菜都咁別出心裁，啱想鍾意體驗各國美食嘅朋友。
供應期：2025年7月6日
黑鑽松露六道菜饗宴 Cucina
由意籍主廚Andrea Delzanno掌舵嘅福布斯旅遊指南四星餐廳，最近推出以矜貴黑松露炮製嘅六道意國菜餚。現時正值澳洲黑松露嘅當造時節，味道特別香濃。其中焗釀蟹蓋係Andrea得意之作，蟹蓋釀入鮮甜蟹肉、濃香大蒜同爽脆魚籽，再刨上黑松露增添香氣，有別於中式風味㗎～而經典之選推介自家製皮埃蒙特牛肉菠菜雲吞，配上紅蝦他他好似將兩道菜二合為一，加埋鮮黑松露片，味道層次好豐富。
供應期：即日起至2025年8月16日
味覺、視覺、聽覺三重享受！香港半島酒店今個夏日將舉行兩場融入歌劇《Les Amours de Carmen Wong》嘅晚宴，呢套歌劇以嶄新視角重新演繹法國作曲家喬治・比才的傳世鉅作《卡門》，配合呈獻法國高級料理精髓嘅晚宴，如法式牛肉韃靼配法國特級魚子醬及鵪鶉蛋、法國鴨肝配士多啤梨等，帶嚟別開生面嘅Fine Dining同藝術體驗。
供應期：吉地士 - 2025年7月21日；Felix - 2025年9月20日
文：Cathy
