黄埔5万尺水产巿场即将开幕 鲜活虾蟹即叫即劏即食(有片)
2017-06-12

自从黄埔都有港铁站之後,就愈嚟愈多美食进驻,嚟紧呢一间,相信又会掀起一阵嘅排队潮喇!系香港人最爱嘅水产系餐厅呀,仲要占地成五万尺,好鬼大,用一站式水产概念场嚟形容应该会更加贴切。

呢个水产概念场总共会有大约10间嘅食肆,由今个星期五,6月16号起会分阶段开张。首先同大家见面嘅就有4间餐厅。

冬甩寿司  颐之味

一入去见到嘅第一间餐厅,分咗自助食堂同吧枱两部分,主力提供寿司、刺身等食,仲有鱼缸展示时令鲜活虾蟹同贝壳类日本海产,可以即点即劏即食。其中,喺美国同日本红咗一段时间嘅冬甩寿司,更加系香港首卖。即系扮冬甩嘅寿司,每款冬甩寿司都会有三种材料同酱汁,例如吞拿鱼加牛油果加蟹子,砌到好似冬甩形咁,呃LIKE最啱,不过只系喺自助食堂区先有得食。

西村寿司亦系另一推介之选,全部都系珍贵食材,一层叠一层,包括有九州免治拖罗蓉、北海道甜虾、北海道马粪海胆同三文鱼籽,记得要一啖食晒呀,咁先感受到种种嘅鲜味喺个口度一次过爆发嘅过瘾。

西村的味道  饶之味居酒屋

呢间餐厅以重现「西村的味道」作招徕,主理师傅跟咗西村先生20年,当中最推介嘅菜式一定系汁煮牛脷。美国牛脷用姜、大葱、昆布等材料煮个半钟,松软入味,肉汁丰富。而佐料嘅酱汁,就更加系西村自家秘制嘅原味鲍鱼汁,系用大、细鲍鱼一齐煲,加入多种调味配料每日煲一次而成,所以系有超香嘅鲍鱼味。

另一啲平时较少机会食到嘅菜式系汁煮吞拿鱼头、鱼眼,鱼头加入清酒、味醂、酱油等等调味,鱼皮够厚,好有口感。而鱼眼嘅胶质感更加系爱好者嘅飞佛。有心想食呢两道菜嘅朋友,记得要预早订定。

话明居酒屋当然有唔少清酒同烧酎坐镇,其中有款烧酎仲系用糯米酿造嘅,好香醇。

蒸北海道毛蟹  蟹筵

睇个名就知呢间主打食蟹,暂时冇得单点,全部都要一个个餐咁叫。全蟹宴套餐共有10道菜,都系以即叫即劏嘅鳕场蟹、毛蟹、松叶蟹入馔。鳕场蟹刺身够晒新鲜,啖啖肉亦充满海水嘅咸香味。蒸北海道毛蟹亦保留到佢最原始嘅味道,另外配蟹膏上枱,毛蟹肉点埋蟹膏咁食,又系另一种香甜嘅味道。

仲有款蒸蛋,系用甲罗蟹壳盛住嚟蒸,滑得嚟亦渗有蟹香。

江户前寿司  寿司翔太

呢间就主打江户前寿司,采用独特传统鱼生熟成柜,令鱼肉更加浓郁,而喺度仲可以食到大厨发办添,几款餐单各有不同,包括时令寿司、海胆蒸蛋、照烧日本和牛、烧大蚬等等。

海鲜大街、食材专卖店

除咗呢四间餐厅外,同时仲有海鲜大街同食材专卖店都会喺星期五开业,大家可以买到各式嘅新鲜海鲜,例如龙虾、象拔蚌、龙趸等返屋企,亦有住家食材,以慢煮、快煮等区分,方便锺意煮食嘅朋友可以挑选,四大名蟹:花咲蟹、鳕场蟹、毛蟹、松叶蟹都有得买呀。而场内其他食店,会喺嚟紧嘅3个月陆陆续续开张,听讲其中有间会系海鲜酒家,到时就可以好似西贡、流浮山嗰啲海鲜圣地咁,喺海鲜大街拣完海鲜,就拎去餐厅度请师傅即场煮埋喇,记住继续留意开饭仔嘅报道啦。

文、相:Kar
片:Cathy


关键字
黄埔
红磡
水产
日本菜
寿司
生蚝
居酒屋
新店直击
走在最前线,为大家搜罗及报道有关新开餐厅的资讯。
相关文章
【编辑推介】治愈系日本丼:渔兵卫
2016-06-14
试匀时令鱼鲜 春旬厨师发办推介
2017-04-27
熊本食材餐厅 水都系熊本直送!
2017-04-11
【开饭热店入围名单巡礼】观塘有宝!一区食匀多国菜式
2017-03-07
必试烧棉花糖意大利雪糕 Taste of Hong Kong今日开锣(有片)
2017-03-16
4月新主题自助餐推介
2017-04-10
餐厅资料
更多
收起
本月热门
【随时更新】零食速报 每周新款零食、酒品点评
1天前
【2021生日优惠】持续更新!7月寿星半价叹和牛烧肉套餐
2021-07-09
【恭喜张家朗、何诗蓓】多间餐厅立即推出限时优惠一览
2天前
榴槤Buffet真的很兴奋~ 九龙区酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08