锺意食日本嘢嘅香港人，应该无几多个抗拒到鲜甜味美嘅鱼生丼饭！鱼生饭嘅选择有咁多，究竟边间最啱你心水呢？今期搜罗5间各有特色嘅日式丼饭专门店畀大家，由小店到omakase鱼生饭都有～

目录

海胆专门店 海胆仔

以海胆为主题嘅日本菜，主要供应由世界各地空运到港嘅新鲜海产，包括用来自日本或加拿大嘅海胆制成嘅海胆菜式、鱼类刺身及生蚝等，海鲜控必食！丼饭方面当然要食海胆丼，海胆唔使讲，鲜甜浓郁，连醋饭都好有惊喜，无论系醋同饭嘅比例定饭嘅温度都掌握得啱啱好，好出色。

人气日式海鲜丼店 爆丼屋

图: BearbearxKoala

旺角超人气嘅日式海鲜丼店，最出名系佢鱼生饭嘅份量够晒澎湃，见到满满一碗真系令人心情愉悦呀～必食招牌超份量三重大极上丼，大量粉红色嘅拖罗覆盖住饭，然後再加上海胆同大量蟹肉，拖罗油脂丰富入口即溶，海胆都好鲜甜无怪味，而蟹肉又为个饭添上一丝鲜甜。锺意香啲嘅推介火焰盛丼，三文鱼、帆立贝、松茶蟹柳、左口鱼裙边都经过火炙，迫出鱼生嘅鱼油，捞埋饭食更正！

贝三味丼饭 岚桥丼饭专门店 

图: stepcwing

想试吓新口味嘅，可以考虑吓呢间丼饭专门店。除咗鱼类丼饭，呢度都供应少见嘅喜之次、赤睦、鲍鱼、日本象拔蚌及北寄贝等海鲜，好推荐喜之次丼，材料包括喜之次、油甘鱼、三文鱼、韩国海胆、金目鲷、日本牡丹虾、松叶蟹肉及三文鱼籽。喜之次嘅鱼皮经火炙烧香，油香都完全渗透出嚟，非常加分。贝三味丼包括日本象拔蚌、北寄贝、帆立贝、葱呑拿鱼蓉、三文鱼籽、蟹钳，象拔蚌同北寄贝都爽口而不靭，令人满足。

鹅肝和牛丼 スーパー丼 

图: zanvsfood

如果食唔到生嘢嘅，呢间丼饭就啱你喇～人气鹅肝和牛丼，油炸处理过嘅鹅肝入口即溶，配埋脂香丰富嘅和牛片真系无得输，系好香嘅鹅油同牛脂香，加埋腌菜食又可以减低油腻感。酱烧广岛蚝丼选用广岛蚝，大只得嚟烧得好入味同埋劲多汁，一上枱已经闻到好香，加上茄子同木鱼碎简直系完美。

厨师发办鱼生饭 海言どんぶり専门店

图: fatkonggirl

高级版嘅日式丼饭，皆因佢系以Omakase嘅形式呈上，想食记得要预约呀。厨师发办鱼生饭套餐包括沙律、茶碗蒸、15-17款时令刺身丼饭及面豉汤，包括季节限定及时令款式，如海胆、三文鱼籽、香箱蟹、秋刀鱼、太刀鱼、石班、鰤鱼、鲭鱼、中拖罗、大拖罗、粒贝、赤海虾、鮟鱇鱼肝、沙甸鱼苗、白子、烧拖罗及北寄贝，每款都新鲜鲜甜，鱼肉爽弹滑口，价钱贵少少都值得。

文: Yanica