香港5大日式丼飯推介 中環廚師發辦魚生飯、風味濃郁鵝肝和牛丼
2023-03-21

鍾意食日本嘢嘅香港人,應該無幾多個抗拒到鮮甜味美嘅魚生丼飯!魚生飯嘅選擇有咁多,究竟邊間最啱你心水呢?今期搜羅5間各有特色嘅日式丼飯專門店畀大家,由小店到omakase魚生飯都有~


目錄

  ►  海膽專門店:海膽仔
  ► 人氣日式海鮮丼店:爆丼屋
  ► 貝三味丼飯:嵐橋丼飯專門店
  ► 鵝肝和牛丼:スーパー丼
  ► 廚師發辦魚生飯:海言どんぶり専門店


海膽專門店 海膽仔

以海膽為主題嘅日本菜,主要供應由世界各地空運到港嘅新鮮海產,包括用來自日本或加拿大嘅海膽製成嘅海膽菜式、魚類刺身及生蠔等,海鮮控必食!丼飯方面當然要食海膽丼,海膽唔使講,鮮甜濃郁,連醋飯都好有驚喜,無論係醋同飯嘅比例定飯嘅溫度都掌握得啱啱好,好出色。


人氣日式海鮮丼店 爆丼屋

圖: BearbearxKoala

旺角超人氣嘅日式海鮮丼店,最出名係佢魚生飯嘅份量夠晒澎湃,見到滿滿一碗真係令人心情愉悅呀~必食招牌超份量三重大極上丼,大量粉紅色嘅拖羅覆蓋住飯,然後再加上海膽同大量蟹肉,拖羅油脂豐富入口即溶,海膽都好鮮甜無怪味,而蟹肉又為個飯添上一絲鮮甜。鍾意香啲嘅推介火焰盛丼,三文魚、帆立貝、松茶蟹柳、左口魚裙邊都經過火炙,迫出魚生嘅魚油,撈埋飯食更正!


貝三味丼飯 嵐橋丼飯專門店 

圖: stepcwing

想試吓新口味嘅,可以考慮吓呢間丼飯專門店。除咗魚類丼飯,呢度都供應少見嘅喜之次、赤睦、鮑魚、日本象拔蚌及北寄貝等海鮮,好推薦喜之次丼,材料包括喜之次、油甘魚、三文魚、韓國海膽、金目鯛、日本牡丹蝦、松葉蟹肉及三文魚籽。喜之次嘅魚皮經火炙燒香,油香都完全滲透出嚟,非常加分。貝三味丼包括日本象拔蚌、北寄貝、帆立貝、蔥呑拿魚蓉、三文魚籽、蟹鉗,象拔蚌同北寄貝都爽口而不靭,令人滿足。


鵝肝和牛丼 スーパー丼 

圖: zanvsfood

如果食唔到生嘢嘅,呢間丼飯就啱你喇~人氣鵝肝和牛丼,油炸處理過嘅鵝肝入口即溶,配埋脂香豐富嘅和牛片真係無得輸,係好香嘅鵝油同牛脂香,加埋醃菜食又可以減低油膩感。醬燒廣島蠔丼選用廣島蠔,大隻得嚟燒得好入味同埋勁多汁,一上枱已經聞到好香,加上茄子同木魚碎簡直係完美。


廚師發辦魚生飯 海言どんぶり専門店

圖: fatkonggirl

高級版嘅日式丼飯,皆因佢係以Omakase嘅形式呈上,想食記得要預約呀。廚師發辦魚生飯套餐包括沙律、茶碗蒸、15-17款時令刺身丼飯及麵豉湯,包括季節限定及時令款式,如海膽、三文魚籽、香箱蟹、秋刀魚、太刀魚、石班、鰤魚、鯖魚、中拖羅、大拖羅、粒貝、赤海蝦、鮟鱇魚肝、沙甸魚苗、白子、燒拖羅及北寄貝,每款都新鮮鮮甜,魚肉爽彈滑口,價錢貴少少都值得。




文: Yanica


关键字
日本菜
日式丼飯
丼飯
魚生飯
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
【隨時更新】最後倒數!2024即將結業人氣/老字號餐廳
3天前
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27