香港係美食之都，中菜、西餐同日韓菜一向深受歡迎，不過如果想嚟啲特別嘅口味，其實仲有唔少異國美食值得一試。今次就精選4間異國餐廳，帶大家一齊感受唔同文化嘅飲食魅力，開拓味蕾新體驗～
米芝蓮推介旁遮普菜 New Punjab Club 
圖：香港印度菜嘅代表之一，自2019年起連續七年榮獲米芝蓮一星，主打正宗旁遮普菜，無論係香料運用抑或烹調手法都保留到地道風味。裝潢低調奢華，牆上掛滿印度藝術畫作，氣氛滿滿。必試招牌Keema Pau，香料免治羊肉配上外脆內軟嘅牛奶餐包，好味到停唔到口；烤羊架Masalewali Chanp用旁遮普香料醃過再炭烤，外脆內嫩，肉汁豐富；想食清新啲可以揀經典菜式Palak Paneer，菠菜配芝士，用烤餅蘸嚟食一流。甜品方面，Sticky Toffee Pudding同Banana Cheesecake都係人氣之選，甜而不膩，為一餐畫上完美句號。
特色黎巴嫩菜體驗 Shahrazad Lebanese Dining Lounge & Bar
圖：裝潢好似阿拉丁故事入面咁充滿異國氣息，氣氛一流，食客好多都係外國人，整體感覺真係好似飛咗去中東。黎巴嫩菜講求香料同層次感，必試鷹嘴豆泥配羊肉，滑溜豆泥撈上橄欖油同香料，面頭鋪滿香煎羊肉、鷹嘴豆同松子仁，濃郁又惹味，用Pita Bread撈嚟食一流；Falafel外脆內軟，配上清香芝麻醬更突出鷹嘴豆香氣；Halloumi and Figs係鹹香芝士配上酸甜無花果醬，真係天衣無縫嘅組合。鍾意食肉又點可以錯過Mix Grill Meat，有齊羊架、羊肉棒、牛肉同雞肉，香料調味濃重，烤得啱啱好，特別係羊架粉嫩多汁，非常出色。
斯里蘭卡咖喱蟹 Hotal Colombo
圖：nrc
由斯里蘭卡籍主廚主理，帶嚟地道又充滿熱帶色彩嘅斯里蘭卡風味，斯里蘭卡菜整體較印度菜質感輕盈，少幾分濃重嗆辣，又添幾分香氣，喺香港嚟講算係相當少見。必食嘅係斯里蘭卡傳統小食Hoppers，用發酵米粉同椰奶製成，邊位香脆，中間鬆軟，帶有淡淡椰香，仲可以加隻半熟蛋，配上Lunu Miris辣椒乾醬或者椰子參巴醬夠晒地道。另一款特色炒餸Crab Kothu，將蟹肉、蔬菜、雞蛋同印度薄餅Roti一齊炒香，非常惹味。至於鎮店之寶Jaffna Crab Kari咖喱蟹就更加係招牌之中嘅招牌，用上北部傳統食譜，搭配小米椒、羅望子、咖喱粉同椰奶，味道濃郁但唔會太辣，蟹肉飽滿新鮮，咖喱汁配埋Paratha麵包一齊食，簡直完美。
百年摩洛哥咖啡店 BACHA COFFEE
圖：<IVY>
如果想喺香港感受摩洛哥嘅咖啡文化，呢間絕對係打卡同嘆咖啡嘅好去處，作為一間源自1910年摩洛哥馬拉喀什嘅百年咖啡品牌，唔單只係一杯咖啡咁簡單，而係一次文化同歷史嘅體驗。店內裝潢以金色同深藍色為主調，加上華麗吊燈同精緻瓷磚，充滿異國風情～咖啡選擇多，侍應會好詳細介紹唔同風味，無論鍾意濃郁或清新都可以搵到心水。推介Iced Tolteca Chocolate Coffee，香濃咖啡加入朱古力後平衡得好好，甜度適中，飲落順滑唔澀。想配埋小食可以試吓牛角包系列，好似杏仁牛角包就餡料飽滿，但比較厚重；開心果牛角包則帶淡淡甜香。
更多OpenRice詳細推介：
► 日式咖啡店合集2025！ 榻榻米日系Cafe/昭和風喫茶店/開心果軟芝士蛋糕 (按此)
► 慳錢上班族 30+港島/九龍/新界區抵食飯堂推介(持續更新！) (按此)
► 飯局訂座優惠低至37折 龍蝦/和牛/Omakase/薄餅等任你揀！ (按此)
文：Yanica
編：Cathy
