韓式吐司專門店愈開愈多，最近又入一間殺入葵廣！小店主要供應八款口味嘅韓式吐司，其中四款口味嘅吐司係自家配方，全部即叫即製，另外仲有得食香港比較少見嘅水果三文治，想嚐鮮嘅朋友可以去試吓！
以下呢幾款口味都係選用特別自家製吐司，再配上唔同口味嘅牛油。吐司係負責人自行搵麵包工場製作，質地鬆化，本身已經帶牛油香及少少蜜糖甜味。
原隻軟殼蟹配牛油果黃金吐司($58)
吐司塗上鹹蛋黃牛油後煎香，再加上大大隻嘅軟殼蟹、芝士、滑蛋及牛油果。鹹蛋黃牛油會令軟殼蟹鮮味更突出，而他他醬及酸瓜又可以中和返油膩感。食呢個吐司嘅時候食到每一層都會有唔同嘅味道，一開始會食到超多餡料、好豐富嘅感覺，食到中間就會好似食緊沙律包咁，而最後就可以感受返鹹蛋黃牛油吐司最原始嘅香味。
韓式玉子泡菜牛肉吐司($55)
鍾意韓式味道，不妨試試呢個泡菜牛肉，味道香辣惹味，面頭加上日本雞蛋黃，客人可以自己𠝹穿個蛋黃撈埋泡菜牛肉一齊食～加埋日本彩虹芝麻令成件事更香。
香蒜焗大啡菇配蒜蓉吐司($48)
而大啡菇就會配返加上蒜蓉牛油嘅吐司，蒜香味比較重，菇味香濃又多汁，係一個比較清新啲嘅選擇。
更多【新店直擊】： |
西班牙黑牛配香草碎茄醬吐司($48)
西班牙黑牛肉本身有醃製過，帶有陣陣嘅煙燻味，加埋自家製香草茄肉醬味道就更有層次。
小店亦有供應香港比較少見到嘅日式水果三文治，好似幸福鬱金香($28)及黃桔向日葵($28)，亦有方便食嘅一口水果三文治($28)，奶油甜而不膩，不過每日只限量發售30份，想食就要早啲去買喇。
地址: 葵芳葵富路7號葵涌廣場3樓Top世界3069-T3號舖
文、相、片: Yanica