饮得嘅格仔饼同凤仙!新开港式怀旧饮品店(有片)
2019-11-14

今年开咗唔少饮品店,不过都系以台式饮品为主。最近喺九龙城就终於有间系主打港式饮品!糅合怀旧同创新元素,调配出大家细细个都会试过嘅味道:格仔饼、凤仙、唂咕、冻OT等等。亦有甜品供应,自家制布甸同软雪糕都有惊喜。
 


玖捌由一班钟情香港味道嘅朋友一齐开设,用咗九个月时间构思同准备,主打港式Mocktail同特调饮品,用摩登手法带出怀旧味道。
 


格仔饼($52)

呢杯格仔饼就系摩登演绎怀旧味道嘅好例子,饮得嘅格仔饼其实系由牛奶、朱古力、椰子、花生酱等调配而成。特点系杯边挂上花生酱制作花纹,饮品上面亦加上糖葱饼碎模仿格仔饼馅嘅香脆口感!饮落以花生酱香甜味道为主,而且仲咬到一粒粒花生碎。
 


(右)凤仙($52)

凤仙雪条又系香港人集体回忆之一,香蕉味脆皮包住云呢拿雪糕筒芒果酱夹心。呢度就变为香蕉芒果味嘅冰沙,配搭黑糖珍珠,忌廉同芒果乾碎。呢杯饮得嘅凤仙还原咗凤仙酸酸甜甜嘅味道,同时增加珍珠烟韧嘅口感,怀旧得嚟又有新鲜感。
 


(右)玖捌98($52)

其实即系芝麻糊版嘅奶茶!红茶底用萃茶机即叫即萃取,确保每杯茶饮都系最新鲜。奶茶加入黑芝麻粉Shake匀之後再加上黑芝麻忌廉,黑芝麻香味十足,但又唔会完全盖过红茶香,甜度适中。
 


新奇事唂咕(冻$44,热$40)

以前茶餐厅会用比较平嘅唂咕粉(Cocoa)取代朱古力(Chocolate)粉嚟冲饮品,到而家当然就唔使啦。呢度嘅新奇事唂咕即系橙味朱古力,朱古力味香浓,重点系个橙味好似细个食嘅橙味朱古力!一饮回忆真系返晒嚟。
 

更多【新店直击】:
1. 自己拣牛肉部位+越南名厨监修 上环新正宗越南粉专门店
2. 自家熟成黑安格斯牛扒 湾仔新开佛罗伦斯小餐馆
3. 惹味喇沙炸鸡、松软斑兰吉士酱冬甩 中环苏豪新开马来西亚酒吧餐厅

 

威士忌朱古力布甸($38)


呢度亦有供应甜品,部分系自家制作,包括呢杯威士忌朱古力布甸,选用比利时朱古力,入口先食到朱古力嘅甜香,之後就有威士忌个酒味,越食酒味越突出!口感非常Creamy幼滑,似慕斯多过布甸。
 


风乾菠萝软雪糕($30)


牛奶软雪糕配搭风乾菠萝碎,牛奶雪糕比较实身,口感绵密而且唔会太甜腻,原来秘诀系用豆奶取代一半牛奶,而且选用高质软雪糕机,压出唔易融又柔滑嘅软雪糕。菠萝乾味道香甜,而且烟烟韧韧增加口感。连装饰嘅朱古力都系70%黑朱古力嚟,细节位真系落足心思。
 




玖捌
地址:九龙城太子道西368-374号龙珠楼地下19号舖




文、相、片:Cathy

关键字
九龙城
港式饮品
格仔饼
凤仙
唂咕
雪糕
玖捌
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
5天前
【2019圣诞】早鸟优惠! 圣诞自助餐推介
7天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
2019-12-06