九龙区继续有新Cafe,呢间走黑白型格风,唔少食物亦加入黑白元素,好似黑色嘅糯米窝夫配白色嘅牛奶雪条,抢镜同时又好食。其他食物都有水准,必食鸡蛋布甸,淋上House Espresso後啡香同甜味交织够特别!
Contrast装修以黑、白、灰为主调,负责人指由店名到主题,都系想回应返而家嘅社会,希望可以表达容纳社会唔同角度嘅声音。店内亦不时有展览,例如最近就有香港摄影师林健恒嘅《都市·病》摄影展。
牛肉汉堡配牛油果角($96)
用安格斯牛肉制作嘅汉堡扒牛香浓郁,扎实得嚟又唔会乾。竹炭面包亦系餐厅特别订制,相当松软而且回弹快。里面仲有芝士、菇、蕃茄、沙律菜等,口感丰富而且减低牛肉嘅油腻感。配菜炸牛油果角外层松脆而果肉柔软,口感讨喜。
墨鱼汁扁意粉伴蟹籽($78)
扁意粉加上墨鱼汁,唔单止变成抢眼嘅黑色,亦增添一股墨汁嘅香气。意粉食起嚟够al dente,而且有蟹籽一粒粒嘅咬口,好过瘾。间中可以沾碟边嘅芝士同红椒粉一齐食,转变一下口味无咁闷。
鸡蛋布甸配House Espresso($58)
建议大家可以先试原味,再按自己喜好加入咖啡。布甸口感软滑Creamy,就咁食先品尝到鸡蛋香同甜味,最後有焦糖嘅微苦余韵,所以同有奶香嘅忌廉一齐食都唔会太腻。House Espresso风味偏莓果香,酸味同甜度平衡,同布甸嘅焦糖酱好夹!
Contrast糯米窝夫配自家制牛奶雪条($96)
窝夫呈黑色而且口感特别烟韧,因为加咗竹炭粉,加上系用糯米粉制作!食落有淡淡米香,脆边加上湿润烟韧嘅口感几特别。而白色嘅雪条其实系自家制牛奶雪糕,口感比起雪糕更似慕斯,牛奶香圆润明显。配搭香甜嘅忌廉、带酸嘅红莓酱同有奶香嘅鲜奶酱,甜而不腻。
更多【新店直击】: |
Latte($38)
House Blend咖啡糅合巴西、哥伦比亚同埃塞俄比亚三个产地,巴西嘅豆比较Nutty而其他两个地方嘅豆较为Fruity,所以咖啡饮落系偏莓果嘅酸甜味,Latte口感柔滑。
Valrhona Coco($42)
朱古力亦用咗两种朱古力配搭而成,朱古力香突出嘅同时甜度适中。
Contrast
地址:长沙湾福荣街512-518号依时大厦地舖
文:Cathy
相、片:Calvin Kwok