Cafe热潮延续到新一年，呢间新店就开喺观塘海滨附近，楼底高又有多面落地大玻璃，有自然光感觉特别舒适。供应多款精品咖啡、意粉、轻食，好似其中一杯咖啡就叫「2019」，味道层次丰富。仲有唔少人大推嘅Tiramisu窝夫，咖啡香同朱古力香都好浓郁呀。
 

Master Room系同区One Little Room嘅姐妹店，店名嘅Master唔系指大师，原来系指地方大咗，供应嘅食物亦多咗，就好似主人房咁好重要。装修以水泥同木为主，木枱请嚟本地长尾工作室嘅木匠打造，好似中间嘅5m长枱就用咗香港嘅非洲桃花心木，靠窗嘅木枱就用木酒箱拼接意大利磁砖。
 

西班牙蛋饼（Lunch Set $108）

将本店最出名嘅西班牙蛋饼都带到新店，口感外脆内软，边位焦香味更突出。蛋饼嘅鸡蛋香，烟肉嘅咸香同肉味，薯仔嘅粒粒口感，甜椒同洋葱清爽，同Mozzarella芝士嘅香味都食得出，味道丰富调味得宜，果然系招牌菜。
 

冬荫功带子虾意粉（Lunch Set $128，单点$118）

原来本店之前有位咖啡师系泰国人，就教咗佢哋整呢个冬荫功带子虾意粉。先系闻落有浓郁辛香料味，食起嚟味道偏辣，建议唧埋青柠汁落去，酸酸辣辣更开胃。带子软嫩弹牙，虾肉亦相当结实。
 

提拉米苏窝夫（$78）

首先要讃下上枱嘅时候碟系雪冻咗嘅，可以Keep住甜品温度够贴心。虽然本店都有窝夫，但新店呢边会偏传统窝夫风格，牛油香味突出啲。两大块外脆内软窝夫中间同顶都有忌廉，再洒上餐厅嘅House Blend咖啡粉同75% Single Origin朱古力，所以食落无想象中咁甜，咖啡朱古力香并重。
 

 

Crispy Sweet Cappuccino（$44）

喺Cappuccino上面加一层黄糖，再用火枪烧成焦糖脆面，所以饮嘅时候亦可以好似食焦糖炖蛋咁，先敲开脆面嚟食，再饮下面嘅咖啡。焦糖唔单止脆口、富焦香，甜味亦带出咖啡醇香。餐厅嘅House Blend系哥伦比亚、巴西同衣索比亚嘅拼配，带黑朱古力风味。
 

2019（$44）

2019年对你嚟讲会系咩味？咖啡师就用一款有烟燻味道嘅辣椒粉去做咗呢杯2019。饮嘅时候建议唔好搞匀，会先闻到辣椒粉嘅烟燻味，然後系咖啡嘅微苦同微酸。因为House Blend系浅炒豆，果酸味都几明显。最後就会有辣椒粉嘅辣味，层次分明，味道多变。
 

Cafe亦有展示摄影作品

Master Room
地址：观塘伟业街223号宏利金融中心地下

文、相：Cathy