今時今日，要食自助餐，都唔一定去酒店先有得食。觀塘有間新開嘅café，喺午餐時段同本地營養師合作設計，推出健康有營嘅set lunch之外，仲有得用$88就食到成餐健康自助沙律餐啦~
呢個自助沙律吧，每日會有7款沙律輪流上場，包括香蔥煙肉薯仔沙律、蕃茄青瓜沙律配水牛芝士及羅勒、藜麥沙律等，仲有莎樂美腸同parma ham任夾。要清新有清新，要飽肚有飽肚，啱晒一眾追求健康、美顏嘅OL女生。
大食豬仔淨食沙律唔夠飽嘅，main course可以追加要香煎海鱸魚配薯蓉或者慢煮西冷牛扒等。後者先慢煮後炭燒，令肉質嫩得嚟同時可保留更多肉汁。
餐廳另外主打花茶同cocktail。花茶方面，嘗試製作混合茶，好似玫瑰菊花羅漢果芯茶咁就加入咗菊花同羅漢果，增加花茶香氣之餘，亦有多種保健之效，例如行氣解鬱、清熱潤肺等，養生啊。
至於洛神花乾果茶，就用咗洛神花、乾果同蜜糖，有美白肌膚，減少皺紋嘅作用，不過花味甚濃，未必人人喜歡。
Cocktail同樣靚靚仔仔，Velvet Goldmine用蘋果、桃、白酒、vodka調製，另外加入蝶豆花，做成夢幻紫藍漸層效果，唧多幾滴檸檬汁，辛辣、薄荷香中帶出酸味，有清新嘅感覺。
講多樣嘢畀酒鬼聽，全日任何時段都可以任飲紅白酒同Prosecco氣泡酒3個鐘（$128）呀！抵係好抵，但記得要量力而為，適可而止呀。
Little Tipsy Restaurant & Bar
地址：觀塘開源道71號王子大廈9樓A舖
文、相：Kar